Hechos 20
20
U Pablo x'e chpam Macedonia rich'il Grecia
1Echi' xu'xan un ch'oj, u Pablo xyusk'ij nk'aj mnaq che kikjom utzij Qajaw Jesús, xyupixb'ej, xukub'saj kk'u'x. Xyutz'ulej y xyuch'ab'ej kanoq. Tik'ri x'e pukwent Macedonia. 2Xyupixb'ej kan nk'aj mnaq kikjom utzij Jesús ptaq tinmit jachi taq x'ax wi. Kitjinik kuya kowlaj k'u'x chke, ast retal xo'pan pukwent Grecia. 3Uxib' ik' xkanaj kan chla'. Tik'ri xumaj unuk'ik rib', b'enam ku'ono k'e pukwent Siria, per echi' xuta rson che xa kkaj nk'aj aj Israel kik'an k'ax che, ena xa rmal xuchomaj kitzlij chik pukwent Macedonia. 4U Pablo o nk'aj rich'il xuriq b'ik, ena jnam xib'e kuk', jare u Sópater uk'jol u Pirro kpi jala Berea, rich'il u Aristarco, rich'il u Segundo kpi jala Tesalónica, rich'il u Gayo kpi jala Derbe, rich'il u Timoteo, rich'il nk'aj chik mnaq kikjom utzij Jesús kipi jala Asia, jare u Tíquico rich'il u Trófimo. Jare ke xib'e ruk' u Pablo. 5Ke, xinab'aj loq chiquch. Chla' xujki'ej wi chpam tinmit Troas. 6Ni qo'j axnaq chik nim'ij rech kitjiw kaxlanwa che ot ch'am kjom ruk' ti xujel b'i chpam tinmit Filipos, xuj'e chpam jun barco rech kuj'e chpam tinmit Troas. Ast retal echi' b'enaqch j'ob' (5) ij che, tik'ri xiqarqa loq jala chpam tinmit Troas. Ena jqub' (7) ij xujkanaj kan chla'.
Chi' kub'ij wi sutaq xu'on u Pablo chpam tinmit Troas
7Echi' xuriq nab'e ij rech un semana, xqariq qib' rech jnam kqatij qawa, na'tb'alre ukmik Qajaw. Nu Pablo xub'ij utzij Dios chke mnaq che kikjom utzij Dios. Chkab' ij nmister kel chub'i re chla', rech k'e chpam jun chik lyar, xa rmal che naj xch'aw kuk', ast retal echi' xuriq nk'aj a'ab' tik'ri xu'xnik. 8Chla' qarqom qib' chpam jun upja o loq chkaj, ch'oxtiq ujk'wi loq wi, k'i tzuk' nk'aj chaj o chla' che kitluwik. 9O jun ala chla', Eutico ub'i', ku'l chpam jun wantana. Xa rmal che mas naj xu'on u Pablo che ub'ixik utzij Dios, ena xpi mas uwram che nala, puk su xpitzar che ntuwram, y xuna' taj xtzaq loq chkaj, ch'oxtiq ja xtzaq loq wi. Echi' xyakik, kamnaq chik.
10Ena xqaj loq u Pablo, xichke' qaj pujlom nala, xub'orej, tik'ri xub'ij chke nk'aj mnaq che iy'o chla':
—Xa mix'ej iwib' mal kamnaq taj nala, k'aslik, —xche chke.
11Tik'ri k'ut xel chub'i u Pablo chkaj, y xupir wa chikuch nk'aj mnaq che kikjom utzij Jesús, jnam xiktij kwa. Tik'ri xutaqej ub'ixik utzij Dios, ast retal echi' xisqarik tik'ri xuk'is ub'ixik y x'ek. 12Ni nala che xtzaq loq chkaj, xkam taj, k'aslik xikk'am b'i chirchoch, ena mas xiki'kat che, che k'aslik.
U Pablo xel b'i chpam tinmit Troas tik'ri x'e chpam tinmit Mileto
13Qo'j xujnab'aj b'ik, xuj'e chpam jun barco, y xujo'pan chpam tinmit Asón. Xuj'ax chla', xa rmal ow kqama loq u Pablo chla', mal re xuchomaj che xa chaqan k'e wi, ena jala xu'on che. 14Echi' k'ut xqariq qib' ruk' u Pablo chla' chpam tinmit Asón, xok b'i quk' chpam un barco, y jnam xuj'e chpam tinmit Mitilene. 15Per xaq xuj'ax chla', xqataqej qab'e xuj'e puwi mar, ena chkab' ij xuj'ax chpam ch'qap ulew o nk'aj mar Quío ub'i'. Qataqem qab'e ujb'enaq, chkab' ij chik xujo'pan chpam ch'qap ulew o nk'aj mar Samos ub'i'. O jun chik tinmit xqarqa' Trogilio ub'i', chla' xuju'xan wi, tik'ri xqataqej qab'e xuj'e chik. Ast chkab' ij chik tik'ri k'ut qatz xujo'pan chpam tinmit Mileto. 16Jala xqa'ano mal xuchomaj u Pablo che k'ax taj chpam tinmit Éfeso, mal kraj taj kub'oy rib' pukwent Asia. Xa rmal mas alnaq uwuch, mal jare kraj re ko'pan chanim chpam tinmit Jerusalén, rech kuril nim'ij Pentecostés chla' we kikunik.
U Pablo xch'aw kuk' nk'aj ajk'mal b'e chpam tinmit Mileto
17Echi' uj'o chik chpam tinmit Mileto, u Pablo xutaq ksik'xik nk'aj ajk'mal b'e chke nk'aj mnaq kikjom utzij Jesús chpam tinmit Éfeso. 18Ena echi' xujo'pnik, xub'ij chke: «Ix iwit'am su nmow ninom iwuk', soq iwit'am sutaq xinriq ruk' nchak xin'ano, xaw xmajtaj loq nab'e ij echi' xink'un iwuk' pukwent Asia. 19Runjel jumpa ij xinkje iwuk', jare xin'an uchak Qajaw Jesús. Xinmirsaj t wib' che u'anik uchak, xani mas xinkoj nchu'ab' che u'anik, ast retal xino' rmal nchak, y soq rmal k'ax xik'an nk'aj aj Israel che xkaj wet xinkamsaj. Per miskini' jala xinriqo, xinch'ijo, xu'on t keb' nk'u'x ruk' nchak. 20Xani xinya t kan ub'ixik utzij Dios chiwe, ximb'ij chiwe chinchke nmister ki'ano rech kiriq utzil rmal. Runjel ximb'ij chiwe chikuch kmon mnaq, soq ximb'ij chiwe chitaq iwchoch. 21Xinch'aw kuk' mnaq iyaj Israel, rich'il nk'aj che iyaj Israel taj, ximb'ij chke che nmister kikk'ex kmow chjuch Dios, kikya kan u'anik kmak y jare kikkub'a kk'u'x chrij Qajaw Jesucristo.
22»Chewa chanim nmister kimb'e chpam tinmit Jerusalén, mal jare Tyoxlaj Uxlab'xel knutaq b'ik. Miskini' wit'am taj su kinrqa jala', per nmister kinkoj utzij, kimb'ek. 23Xaw wit'am che runjel jumpa tinmit jachi taq kimb'e wi, ri Tyoxlaj Uxlab'xel ub'im chwe che kinoksax na pkarsa, y k'an na k'ax chwe. 24In wit'am chik che jala k'an chwe, per kinx'ej t wib' chjuch runjel wari'. Miskini' kinkamsxik kimb'soj taj, mal jare taj nk'asnmal mas nim u'ij chinwuch in, jare mas nim u'ij nchak chinwuch che uy'om Qajaw Jesús chwe. Ri nchak che uy'om chwe, jare ub'ixik utzlaj taq rson chrij Qajaw Jesucristo. Chla' kub'ij wi che ri Qajaw Dios, mas k'ax uk'u'x chke kunjel jumpa mnaq iy'o chi' chuchlew, rmal ut'ob'.
25»Chewa chanim, wit'am chik in jumpa iwuch ix che ximb'ij utzlaj atb'altzij rech Dios chiwe, ot jun chiwe che kuril chinwuch. 26Xa rmal, chewa chanim kwaj kimb'ij chiwe che ot nmak in che, we o jun chiwe kkam chpam umak. 27Mal ximb'ij chiwe runjel su uchomam Dios pqajlom, ot su kri' ch'in xinwaj uwuch chiwuch, runjel ximb'ij chiwe. 28Xa rmal, china kwent iwib' ix, y soq china kwent chke kunjel jumpa mnaq che ixukjom Tyoxlaj Uxlab'xel che kchijxik. Kunjel ke, jarewa kikjom utzij Qajaw Jesús. Ri Jesusi' jare xkam chjuch un cruz kmal kech mnaq, y jare ujk'el xulo' kk'asnmal mnaq jumpa kiyikjon che. 29In wit'am che echi' n'o t chik iwuk', kipi na mnaq kiyok chixo'l, rech kik'an k'ax chiwe, jala peche kik'an nk'aj utiw che kiktij nk'aj chij. 30Ast chixo'l ix mismo kiwa'laj na keb' uxib' mnaq che xa iyajb'nal tzijtal, ke xa kixksub'u, kikmaj ub'ixik chiwe: “Jarewa ri saqlaj tzij”, kiche chiwe, per qtzij taj kikb'ij, xa ch'anik kikb'ij chiwe, xa jare kkaj ke che kikoj ktzij rech kix'e kuk'. 31China kwent iwib', chixk'ask'atoq, chna'taj chiwe che uxib' jnab' xintaqej che chip'ij cha'ab' xiximpixb'ej, xinya utzlaj taq rson chiwe chijunjnal, ast retal xino' rmal.
32»Chewa chanim kixinjach kan pu'ab' Dios rech kixuchjij. Chikub'a ik'u'x chrij utzij, mal jare Re kuk'ut chiquch che mas k'ax uk'u'x chqe, rmal ut'ob'. Jare utzij Dios kuya ichu'ab' rech ku'on ko chiwe, soq jare Re kuya chiwe che kiwechb'ej na jala peche uy'om chke jumpa mnaq che irech Re. 33In ot jun chiwe xinrij uwuch urjil mowni ritz'yaq. 34Ix mismo iwit'am che in xinchkunik rech xinch'ak rjil ninmister, soq xinch'ak rjil kinmister nk'aj wich'il che iy'o wuk'. 35Echi' ximb'ij utzij Dios chiwe, xink'ut chiwuch che nmister kujchkunik rech kqach'ak rjil su nmister chqe, y soq rech o mow kqato' mnaq chintaq o nmister chke. Chna'taj chqe su xub'ij kan Qajaw Jesús. Re, jawa xub'ij kanoqi': “Jare mas utz re un mnaq che o su kusipaj chjuch jun che xaq kuk'amo su ksipax che”. Jala xub'ij kan Jesús», xche u Pablo chke.
36Echi' xuk'is ub'ixik nk'aj tzij u Pablo ri', xixke'ik tik'ri xu'on uch'ab'al ruk' Dios kuk' kunjel jumpa iy'o ruk'. 37Ena kunjel jumpa iy'o chla', xiyo'ik, xiktz'ulej u Pablo y xkitz'b'aj uplaj.#20:37 K'manaq chke mnaq kikjom utzij Jesucristo kkitz'b'aj jun chik mnaq ti kikya rtzil uwuch, we jnam kikjom utzij Jesucristo. 38Per mas kiyib'sonik, mal xub'ij u Pablo chke che otchich jun b'welt kikkil uwuch. Tik'ri xib'e ruk', xkijcha kan ruk' un barco.
လက္ရွိေရြးခ်ယ္ထားမွု
Hechos 20: qucSAS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global