Mattuw 15
15
Áwúchù Wácha
1Yiibeli Áwáfaris wa wándó tà dɔ̀ wu Musa dà zu Urushalima be dò Yesu ma mbyeshé la, 2<<Áyɛ̄ sá waa áwátu'u hwoi sábɛ wúchù wácha ní? Wa hwoi tōvo'wa yii nyàshɔ wàgyegye pùnū yɔ̀ ma hwoi zyī wúzyī!>> 3Yesu zɛ̀ yí'wa la, <<Áyɛ̄ sá waa ni hwoi bàdɔ̀ Shidɔ yɔ̀ ishina wúchù'ni ní? 4Dizyi Shidɔ zɛ̀ la, <Yí da'o wa yī'o hwɛ̀>kàwa <Sásá pà wàma chō da'a tè kwɛɛ yī'a tè, wá lò'u bwā.> 5Dedee àwuni lá ni zɛ̀ la, nyunu waa panku ma bā wú waa u yi sázá da'a wa yi'a ni ní, u zɛ̀ la, <Sásá wú waa m bā wàsázá'ni ní, dedee ú zɛ̀ la, <Wàyila yi wu Shidɔ,> 6ú káwa yí da'a hwɛ̀ gɛ̀ yɔ̀. Yii nyàshɔ wàyila ni sìnì zyí Shidɔ mazyi ni sá wúchù wuni. 7Awuni wándóbɛfù! Ishaya zɛ̀'a gyegye wa wú waa u wya yii pyɛ̀ yiishina ni ma zɛ̀ lá: 8<<Apà hwoila hwoi yí'm hwɛ̀ wa nū, dedee ánwú'wa yii benashɔ wa'm. 9Wa hwoi wá'm nùchɔ̀; dizyi wa hwoi tà dɔ̀ panku yi sè ishina zyí Shidɔ.>>> 10Yesu bá bè panku ndɛ̀ gbayi yii pyɛ̀'a ma zɛ̀ la, <<Ni gā chùchú mazyi ni yìkyà. 11Áwúzyī waa ni hwoi zyī lá gbaa lò ni hwoi kà <wándósɔ́ ní yɔ̀,> dedee áwú wàyi zumyɛ yii nū'ni lá gbaa lò ni hwoi kà <wándósɔ́ ní.>>> 12Yiibeli áwátu be dò'u ma mbyē'ushé la,<<O yìnɔ̀ la, Áwáfaris hwo sáàpá yiishina wa zyí waa o zɛ̀ lá?>> 13U zɛ̀ la, <<Sásá fyī waa Ada'm wà yii dɔ lá ma tà ní yɔ̀, wa lò'u yi gbò wa dú'a. 14Me wa ní; wa hwoi bòzú wàhwoi gbe bòzú kutɛ̀. Nyunuwaa bòzú ma gbe bòzú kutɛ̀ sásá'wa hwoi kwèkwè yiifu shī>> 15Bitrus zɛ̀ la, <<Zɛ̀ tɛ́ lá waa o ká lá yí'i.>> 16Yesu mbye'wa shé la,<<Kwā wuni kà ndèndè dúdú?>> 17<<Ni wya waa wú wàma kà nū sásá yi kà jɔ̀fu ma yi zumyɛ yii dì lá yɔ̀? 18Dedee áwú wàhwoi zumyɛ yii nū lá, yi zu nwú, áwúli gbaa yí panku lò yi kà <ndósɔ́ ní.> 19Dizyi yiifu nwú waa zyíhwɛ̀ wàbɛbɛ hwoi zuni ní, sáyìna apanku wàbwāàbwā, wa bákyáàkyá wa lákpá, wa vyú, wa pyɛ̀bàbà wu zyígé, wa zyì pàsɛ wàsábɛ. 20Áwú wàhwoila gbaa lò panku yi kà ndósɔ́ ní>; dedee gba yi wúzyī wàzyī ma tōvo yɔ̀, gbaa lò'u yi kà <ndósɔ́ ní yɔ̀.>>>
Azyíbyɛ̀ wu Wàzu
21Yesu me beli ní ma ya zyoku wu Taya wa Sidon. 22Àwàzu yi ngo zyoku Kanaana zu beli be dò'u, u yi dákito yi zɛ̀ la, <<Adandō, Ango wu Dawuda, wyashishi'm! ango'm yi wya fyì wàbɛbɛ wa zyɔ̀ wàyii dì lá.>> 23Yesu zɛ̀ zyí zukponu yɔ̀. Yimamala áwátu'a be dò'u ma vá'u la,<Lò'u ká, dizyi u yi be'ini wa kito.>> 24Yesu zɛ̀ la, <<Shidɔ chō'm be ishina panku Isrela wàhwo mìzyɛ̀ lá.>> 25Dedee àwàlá be kàli yii pyɛ̀'a, ma zɛ̀ la, <<Adandō, sázá'm ni! >> 26Yesu zɛ̀ la, <<U sàsà mazyi wa lò wúzyī zyetifyi tá yí bɛ́ yɔ̀.>> 27Àwàlá zɛ̀ la, <<Ázyí'u yibyɛ̀, Adandō, dedee ábɛ́ yi zyī wúzyī wànyámbyɛ́ zu ishina tebul wu wasendo'a lá dúdú.>> 28Yiibeli Yesu zɛ̀ la,<<O yi wà waa zyíbyɛ̀'o hwɛ̀li! Áwú waa o vá lá, o lò dò.>>Yiibebeli, ángù'a lò gba.
Yesu dàgba Panku Ndabe.
29Yesu me beli ní ma zu bàbà wa núkù wu Galili. Yiibeli u né gā ma ya shíli. 30Apanku ndabe be dò'u, áwándó wàhwoi kyēkyū kà yɔ̀, wa bòzú, áwándó vo nyíìnyí, wa áwándó wàhwoi zɛ̀zyí yɔ̀, wa panku ndabe wándówànati wàfá vyā yɔ̀ lá, hwoi pyɛ̀'a; u lò'wa dàgba. 31Agbashu lò panku hwo pà dédēwaa wa wya áwándó wàhwoi zɛ̀zyí yɔ̀ hwoi zɛ̀zyí, áwándó vonyíìnyí hwo dàgba, áwándó wàhwoi kyēkyū yɔ̀ hwoi kyēkyū, áwándó wàhwoi wyabe yɔ̀ hwoi wyabe lá, wa ngyā Shidɔ wu Isrela. 32Yesu bá áwátu'a ndɛ̀ be dò'u ma zɛ̀ yí wa la, <<M ngyi wyashishi panku hwoila; wa wa'i hwoi dùdù zyina nyunu isa ma ba wuzukponu wàzyīìzyī yɔ̀. M ngyi fú mazyi ḿ ká me'wàni wáya wa mbɔ yɔ̀, yiishina wáká ya kwèkwè yii nyàshɔ yɔ̀.>> 33Áwátu'a zɛ̀ la, <<Yii fubyɛ́ lá, be wàni waa i ya hwoi dò bredi buu ma pi hwoi yí'wa hwoi zyī ní? 34Yesu zɛ̀ la, <<Bredi yi puna waa ni ba ní?>> Wa zɛ̀ la, <<Isumpyɛ̀ wa zyé wàtiti tima kɛ̀ ló.>> 35U yí bè panku sásá shí zyoku. 36Yiibeli u lò bredi isumpyɛ̀ wa zyé, dédēwaa u lò mamgba tá Shidɔ bwā lá, u lò'wa téká ma lò ndavo yí áwátu'a, áwátu'a lò gà yí bè panku. 37Sásá'wa zyī ma zɛ̀fu. Yiibeli áwátu hwo buburu wúzyī wànati lá yi tikishɛ idezepyɛ̀ 38Andabe wándó wàzyī wúzyī lá, fè panku ideipaichɔndoide kwazɔ̄ ini, wáwà wa zyetifyi hwoi fu'a yɔ̀. 39Gbá má waa Yesu lò gàfā wa'wa lá, u lò kà fu kɔ̀ ma ya'a zyoku Magadan.
လက္ရွိေရြးခ်ယ္ထားမွု
Mattuw 15: WBTP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Word for the World International and The Word for the World Nigeria