YOANI 14
14
Yesu adii ndjia ɛ okɛ odii Tata
1«Yesu abala na batingami ba nde boo: Yɛɛ boo milema ma boono madae pɛpɛ osatungea. Dhimani Ndjambe ko dhimani koko mbai. 2Ta ndako ɛ Tata bisika baodaa bidii bike; emiti daa bea eke nabalaki na nu boo nakɛlea aobɔngɛdjani esika? 3Ngɔngɔ dja okɛ ba mbai aobɔngɛdjani esika, nasɔmbɔlea aotombani, bɛngɛ boo ino koko ɔdaeni ta esika edii mbai. 4Ɔdjebakani ndjia ɛ esika ɛkeke mbai.» 5Toma abala na nde boo: «Kumu, lotadjebaka esika ɛkeke wɛ. Moda mohɔni na su odjeba ndjia nda?» 6Yesu amosɔmbɛdja boo: «Mbai nadii ndjia, sooti ko mohelo. Pɛpɛ moto ohɔni okɛ odii Tata amiti nɔɔ na ndjia ɛ mbai. 7Okadjebanini, odjebaleani koko Tata. Ko donga hadɛdi ɔmodjebakani ko ɔmoenɛni.» 8Pilipo abala na nde boo: «Kumu, loinedja Tata ko mua mokoki na su.» 9Yesu abala na nde boo: «Pilipo, ehole eyai edai mbai na nu, opakitadjebani oko? Ona oenini, aeni Tata. Bea tina ndani obali boo: “Loinedja Tata”? 10Otadhimaka boo mbai nadii ta tei ɛ Tata ko Tata adii ta tei ɛ mbai? Bibaeli babalaka mbai na nu bitadongaka odii mbai. Edii Tata ona oodii ta tei ɛ mbai, akokedjaka mikɔ ma nde. 11Dhimeanini ehole ɛbalaka mbai boo: nadii ta tei ɛ Tata, ko Tata ta tei ɛ mbai. Emiti daa bea, dhimani noko ta tina ɛ mikɔ ma mbai. 12Edii bea, nabali na nu sooti boo: ona odhimini, yo koko akɔbi mikɔ imakɔkɔ mbai. Amikɔbi onɔ mii imakɔkɔ mbai, tina ɛ boo nakeke odii Tata. 13Midjɔ misusu mihɔdjabino ta kombe ɛ mbai namikɔbi, bɛngɛ boo Mwana ainidjae ekumu ɛ Tata. 14Okahɔdjani eka ta kombe ɛ mbai, nayekɔbi.»
Mbuno ɛ oloma Mwembo Mosɛnɔke
15Nga okapalanini, osumaleani mibeko ma mbai. 16Nahɔdjabi Tata boo aopɛni mokɔmedjɛli okina boo adae na nu kɔbili: 17edii Mwembo ma sooti. Ngondo etahɔnɔ omoosɔ, tina ɛ boo tebamoenɛ ko tebamodjebe. Endolo ino, omodjebini, tina ɛ boo adii na nu ko adabi ta ndanda ɛ bono. 18Naokinetebini malike; nasɔmbɔbi odii no. 19Ngɔngɔ dja maa ehole mokɛkɛ ngondo enɛteleani, endolo ino, oenɛbinini, tina ɛ boo nahelaka ko ino ohelabini koko 20Ta busa bua, odjebabini boo nɔsɔ Tata lodii omɔti, elengɛɛ ino na mbai ko mbai na nu.
21«Moto oobanei mibeko ma mbai ko akamisume, edii yo moto okapaleni. Tata apalabi moto okapaleni; namopalabi koko yo ko nasaenɛmɛdjabi na nde.» 22Yuda titi Yudasi Isikaliote abala na nde boo: «Kumu, moda ndani oboani osaenɛmɛdja na su ko endolo titi odii bato ba ngondo?» 23Yesu amosɔmbɛdja boo: Moto akapalani, asumabi bibaeli ba mbai. Tata amopalabi; loduabi odii yo, nɔsɔ Tata ko lodabi ta tei ɛ nde. 24Moto ona ɔlonakani tasume bibaeli ba mbai. Bileho bii baokakano bitadongaka odii mbai, endolo odii Tata ona ɔɔlomani. 25Nabala na nu midjɔ mia ehole ɛdaka mbai engbanga na nu. 26Tata aolomaleani Mwembo Mosɛnɔke ta kombe ɛ mbai tina ɛ okɔmɛdjani, aolehaleani ko aolɛdjanaleani midjɔ misusu imabala mbai na nu.
27«Naokineini ogoo, naopini ogoo ba mbai. Naopitini bo moda mokapɛ ngondo. Yɛɛ milema ma boono madae pɛpɛ osatungea, pɛpɛ odani na bɔɔ. 28Ɔɔkanini nabala boo: “Nakɛi, endolo nasɔmbɔlea odii no.” Okapalanini, sepani tina ɛ odjeba boo nasɔmbi mbuti na Tata, tina ɛ boo Tata anɔini. 29Nabali na nu hadɛdi boso ba boo midjɔ mia maenɛme, bɛngɛ boo ehole eimeabi mo ɔdhimeni. 30Nawetelea bala koko na nu, tina ɛ boo kumu ɔ ngondo hee adoi. Aditi na kpati diko la mbai, 31endolo eboani ngondo ɛdjebe boo napali Tata ko nakɔkɔ oko moda imalomani yo. Emani, ladonge haa!»
လက္ရွိေရြးခ်ယ္ထားမွု
YOANI 14: ngc
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2025 Communauté des Eglises Travaillistes (CET)