YOANI 15
15
Yesu, mole ma vino ɛ sooti
1«Mbai nadii mole ma vino ɛ sooti ko Tata adii moswa gue. 2Etape esusu edii ta tei ɛ mbai edii pɛpɛ obota mbuma, ayedongedjai, ko abɔngɛdjai etape esusu ɛbotaka mbuma, bɛngɛ ɛbote koko mbuma djike. 3Ino osɛnɔdjamani ehele tina ɛ ebaeli ɛopani mbai. 4Nɛngɛdjani ta tei ɛ mbai, ko mbai nanɛngɛdjalea ta tei ɛ bono. Etape etahɔnɔ obota mbuma yo mɛɛnɛ, emiti tingama ta mole ma vino; na bea, otahɔnɔni obota mbuma omiti nɛngɛdjani ta tei ɛ mbai. 5Nadii mole ma vino, ino odiini bitape. Moto ona onɛngɛdjai odii mbai ko ona odii mbai onɛngɛdja odii yo, akabote mbuma djike, tina ɛ boo emiti daa na mbai otahɔnɔni okɔ eka emɔti. 6Ona odii pɛpɛ onɛngɛdja ta tei ɛ mbai adumbami osokolu, elengɛɛ etape ɛ mole, ko ekakani; bitape ibikakanu, bakabitute, bakabimae ta mosa ko bikayoe. 7Okanɛngɛdjani ta tei ɛ mbai ko bibaeli ba mbai bikanɛngɛdja ta tei ɛ bono, sɛngɛni eka ɛpalakano ko oyedihabini. 8Tata akumamalea: okabotani mbuma djike, na njia ena oenɛmɛleani boo odiini batingami ba mbai. 9Elengɛɛ ɔpalani Tata mbai koko naopalani. Na bea nɛngɛdjani ta epaeli ɛ mbai. 10Okasumani mibeko ma mbai, oyeyoaleani ta epaeli ɛ mbai, elengɛɛ odii mbai osuma mibeko ma Tata ko nakanɛngɛdjae ta epaeli ɛ nde.»
11«Nabali na nu bea bɛngɛ boo sepi ɛ mbai ɛdae ta tei ɛ boono ko sepi ɛ boono ɛdae na osusu. 12Hokeani mobeko ma mbai: Palanani elengɛɛ okaopaleni mbai. 13Pɛpɛ epaeli enɔi boo moto akabe mohelo ma nde tina ɛ baminande. 14Odiini bamina mbai okakɔɔni midjɔ maolomakani mbai. 15Nataobeakani babuli, tina ɛ boo mobuli tadjebe modjɔ mokakɔe moswa nde. Naobeakani bamina mbai, tina ɛ boo naodjebedjani midjɔ misusu maikoa mbai odii Tata. 16Editi ino bato ibahɔni, edii mbai moto ɔɔhɔni; naolomani boo ɔkɛɛni, abota mbuma ko mbuma idjikanɛngɛdjae. Bea, Tata aopabini midjɔ misusu imihɔdjabino ta kombe ɛ mbai. 17Hokeani mobeko ma mbai, palanani ta tei ɛ boono.»
Ngondo eini Yesu na batingami ba nde
18«Nga ngondo ekaolonani, djebani boo ɛlonani boso ba boono. 19Okɔkino daa bato ba ngondo, eke ngondo eopalini; tina ɛ boo okɔki daani bato yu. Ngondo eolonini tina ɛ boo naohɔɔni ko naoimanedjani sokolu ɛ ngondo ko oditini bato ba ngondo. 20Lɛdjani modjɔ imabala mbai na nu: “Mobuli tanoe moswa nde.” Ekadaa boo bato banyɔkɔlɔni, baonyɔkɔlɔbini koko; ekadaa basumi bileho ba mbai, basumabi koko ba bono. 21Endolo baokɔbini midjɔ mia misusu tina ɛ kombe ɛ mbai, tina ɛ boo tebadjebe ona ɔlomani. 22Okɔkɔ mbai daa pɛpɛ odoa ko ɔkɔkɔ mbai daa pɛpɛ obala na bu, eke baditi na isumu. Endolo hadɛdi batayɛɛmɛ ta isumu la bobo. 23Ona odii na swɛ ɛ mbai, adii koko na swɛ ɛ Tata. 24Ɔkɔkɔ mbai daa pɛpɛ okɔ ta ndanda ɛ bobo mikɔ imikadae moto okina pɛpɛ okɔ eke baikwa ta isumu. Noko bea, hadɛdi, baenɛ mikɔ ma mbai ko baokini swɛ, na Tata koko. 25Endolo ɛkɔmɔ bea bɛngɛ boo midjɔ imakomama ta mobeko ma bobo makokedjame: “Baokani swɛ pɛpɛ tina.”»
26«Ehole edoabi Mokɔmɛdjɛli: edii Mwembo ma sooti imodongalea odii Tata. Naolomeabini mo ko mopabi tati ta tina ɛ mbai. 27Ko ino koko opabini tati ɛ mbai, tina ɛ boo ɔdaani engbanga na mbai donga ibange.»
လက္ရွိေရြးခ်ယ္ထားမွု
YOANI 15: ngc
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2025 Communauté des Eglises Travaillistes (CET)