YOANI 13
13
Yesu asosi bigbota ba batingami ba nde.
1Ɛdikaka iswi imɔti boso ba tɛkɛ ɛ Bayuda ɛ Pasika. Yesu adjeba bo ehole tina ɛ nde ɛ odonga ta ngondo hee eimei bɛngɛ akɛɛ mbuti na Sango. Apalaka seko bato ba nde ibadaka ta ngondo ko abapala mbunoko suka. 2Na bea ehole ɛdaka bo baya engbanga, djabulu aisa ta molema ma Yudasi Isikaliote, mwana ɔ Simo, ilɛi la okaba Yesu. 3Yesu adjebaka boo adonga odii Ndjambe ko asɔmbɔke odii Ndjambe, ko boo Tata amopa kpati esusu. 4Ehole ɛdaka bo baya, Yesu aemaa, adongedja esendja ɛ nde ɛ diko, ko atomba esendja ɛsananga yo ta bongo. 5Ngɔngɔ djia aisa madiba ta saani ko abanga ososa bigbota ba batingami ba nde, na obihakoa na esendja ena ɛsananga yo ta bongo. 6Ɔimea ehole ɛ Simo Piɛlɛ, abala na nde boo: «Kumu, wɛ mɛɛnɛ ɔsoseni bigbota?» 7Yesu amosɔmbɛdja boo: «Imakɔkɔ mbai otamodjeba hadɛdi, endolo omodjebabi ngɔngɔ.» 8Piɛlɛ abala na nde boo: «Pɛpɛ, ososeteleani bigbota noko osinɛɛ!» Yesu amosɔmbɛdja boo: «Nga namiti ososa bigbota, odɛtebi engbanga na mbai.» 9Simo Piɛlɛ abala na nde boo: «Na bea, Kumu, pɛpɛ, ososani etoko bigbota ngasa, endolo, na mabɔ na molo koko!» 10Yesu abala na nde boo: «Moto ona osasosi mokuku adii mosɛnɔke ehele. Eboani na nde asasose oko bigbota. Odiini bapuamake, endolo titi ino basusu.» 11Yesu adjebaka ona omokabalea; ta tina hee abala boo: «Oditini ino basusu basɛnɔke.»
12Ngɔngɔ dja obasosa bigbota, Yesu alwa koko esendja ɛ nde, adaa koko ta mesa ko abala na bu boo: «Osipoini modjɔ mahulake mbai akɔɔ tina ɛ boono? 13Ɔbeakanini “Molehi” ko “Kumu”, obalini sooti, tina ɛ boo nadii bea. 14Bea ekada boo mbai ona odii Molehi na Kumu ɔ boono, naososini bigbota, ino koko oboanini osasosana bigbota. 15Naopini ekwanedjɛli bɛngɛ boo ino koko ɔkɔeni elengɛɛ moda momii mbai kɔɔ tina ɛ boono. 16Edii bea, nabali na nu sooti boo: mobuli tanɔe moswande ko molomami tanɔe moto ona oomolomi. 17Hadɛdi odjebini modjɔ mua; odabini na sepi ekadaa boo okɔini bea. 18Nitabalaka tina ɛ ino basusu; nadjebaka bia ibahɔɔ mbai. Endolo eboani boo ebaeli ena ɛ Makomi ɛkokedjame: “Moto ona ɔyaaka na mbai ipa esika emɔti aimei moloni ɔ mbai.” 19Donga hadɛdi nabali na nu, boso boo modjɔ mua makɔɔme, bɛngɛ ehole ekokedjamabi mo, ɔdhimebini boo “nadii ona odii”. 20Edii bea, nabali na nu sooti boo: moto ndani oosi ona olomi mbai aosini koko; ko moto ndani oosini aosi ona ɔlomani.»
Yesu adjebedjai bo Yudasi amokabalea
(Hokea koko Mat 26, 20-25; Mal 14, 17-21; Luk 22, 21-23)
21Ngɔngɔ dja bibaeli bia, Yesu asatungea obuke ta molema ko abala ohuu boo: «Edii bea, nabalaka na nu sooti boo: Omɔti ɔboono akabaleani.» 22Batingami basahokeanaka ko basahɔdjanaka tina ɛ odjeba moto ɔbalaka na nde. 23Omɔti ɔ batingami, ona ɔpalaka Yesu onɔ batingami bakina, adaka adii ta mesa mbuti na Yesu. 24Simo Piɛlɛ amonyitea, bɛngɛ boo ahɔdjae Yesu moto ona ɔbalaka na nde midjɔ mia. 25Bea motingami ona ahekoa odii Yesu ko amohɔdja boo: «Kumu, ona nda?» 26Yesu amosɔmbɛdja boo: «Nadubealea ekenge ɛ ipa ta mosua: moto ona oyepalea mbai, edii yo.» Bea Yesu atomba ekenge ɛ ipa, ayedubea ko ayepa Yudasi Isikaliote, mwana ɔ Simo. 27Ehole ɛmatomba Yudasi ekenge ɛ ipa, Satana aingea odii yo. Yesu abala na nde boo: «Modjɔ imahombake wɛ boo ɔkɔe, mokɔɔ pɛpɛlɛ!» 28Pɛpɛ noko moto omɔti ɔ bii ibadaka na nde ta mesa ɔdjeba tina ɛ bala yo na nde bea. 29Elengɛɛ ɔdaka Yudasi mobanyeli ɔ tɔmbi ɛ falanga, bakina bike balɛdjaka boo Yesu amoloma boo akɛɛ asomba mia makina tina ɛ tɛkɛ, kaoko akɛɛ apa epeeli odii bakwali. 30Bea ena ɔmatomba Yudasi ekenge ɛ ipa aimana ambuku. Busa badipa.
Mobeko ma yanie
31Ehole ɛimana Yudasi, Yesu abala boo: «Hadɛdi ekumu ɛ Mwana ɔ moto eenɛmi ko Ndjambe akumedjamalea ta tei ɛ nde. 32[Elengɛɛ odihalea Ndjambe ekumu ta tei ɛ Mwana,] Ndjambe koko apalea Mwana ekumu ta tei ɛ nde mɛɛnɛ ko akɔlea na pɛpɛ ekoka. 33Bana ba mbai, nadii na nu oko maa ehole mokɛkɛ. Ohombaleanini, endolo hadɛdi nabalaka na nu modjɔ imabala mbai na Bayuda boo: Otahɔnɔni okɛ ta esika ɛkeke mbai. 34Naopakani mobeko ma yeenie: palanani. Eboani boo ɔpalaneni moda maɔpalani mbai. 35Nga okapalanani, bato basusu badjebalea boo odiini batingami ba mbai.»
Yesu adjebedjai boo Piɛlɛ amoinganalea
(Hokea koko Mat 26, 31-35; Mal 14, 27-31; Luk 22, 31-34)
36Simo Piɛlɛ ahɔdja Yesu boo: «Kumu, ɔkeke wɛ hɔɔ?» Yesu amosɔmbɛdja boo: «Esika ɛkeke mbai otahɔnɔ okimanani hadɛdi, endolo okimanabini ngɔngɔ.» 37Piɛlɛ abala na nde boo: «Kumu, nitahɔnɔ okimana hadɛdi tina nda? Nadii mbuti na okaba mohelo ma mbai tina ɛ wɛ!» 38Yesu amosɔmbɛdja boo: «Odii mbuti mɛɛnɛ okaba mohelo ma wɛ tina ɛ mbai? Edii bea, nabalaka na wɛ sooti boo: Oinganaleani mbala isato boso boo kɔkɔ akɔkɔle.»
လက္ရွိေရြးခ်ယ္ထားမွု
YOANI 13: ngc
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2025 Communauté des Eglises Travaillistes (CET)