Lúkasa 20
20
Nány bugaga bá Yésu óloninó
(Mat 21.23-27; Mál 11.27-33)
1Buɔ́s búmodió, Yésu mabá ufúnyifunyi band wond wɔyɔ ndág ya nsɔ́m agá ɔnyɛb wá Gɔdányá. Bɔgɔ́gɔ, na bóŋ bisele, na bagɔn bá gɛdɔŋ abásiám. 2Bágányɛ gág ká: «Diɔ́yɛ́dɛ́n, nány bugaga báguala manda eme gúleniné, ányá unyá agufaán bugaga báguala mɔ́ e?» 3Uganyɛ gɔ́b ká: «Ngogúnuófún nŋófúny imoom. Ɔ́nuŋɔyɛ́dɛ́n: 4Ányá umádɔ́m Sáŋa ká úduenin? Gɔdányá e, band e?» 5Ebédúm guanɔna bɔ́bɔ́ na bɔ́bɔ́ bɔ́yɔ ká: «Dímóndinyi ká “Aga Gɔdányá”, ugogúdiófún ká: “Góbúsió bá giág numéen guádáb wɔ́ e?” 6Dímɔ́yɛd ká: “Band”, band bá gɛdɔŋ gidigid gediétenyi adány ká bɔ́diɔ́n, gágual ká bágúbɛ́dága ká Sáŋa mabá ibús.» 7Bɔ́bɔ́ guondinyi gɔg ká bádɛgɔ́lɛnsan. 8Uganyɛ gɔ́b ká: «Yaŋuá sɔ́n ndɛgɔ́gúnuɔ́yɛdɛn kɔɔ́m ɔgɔ́ bugaga báguala manda amaány óŋóloninó.»
Nsab ya bél buól bányá na biád bá ɛdɛm
(Mat 21.33-46; Mál 12.1-12)
9Uwedúm guɔyɔɔn band nsab eye ká: «Mɔnd máal gisién gá magɔ́nɛd bábɛ́laná ká Fíny. Uwéŋin gɛ́ gá band ká bálɛ́nda, uwɔb gá ɔŋɛnd gianta gá gɛ́sɛgɛl. 10Anyɛ́ gigúl gá gúgay méesiége, uwadɔ́m eŋél buol waga aga band abaány ká wɔ́gɔ́l gág gɛdám gá bɛ́gayagaya; abádɛgɛn wɔ́, ebégide wɔ́, ebégúgi wɔ́ ɛmbɔ́g gɔdɔ. 11Mɔnd uwaány guand gudɔ́mɛ́n bɔ́ eŋél buol ondodió; uwaány sɔ́n, ebégúgi wɔ́ ɛmbɔ́g gɔdɔ, ány bámámán gúsɛga wɔ́, bémégidé wɔ́. 12Uwand gɔdɔ́m sɔ́gɔ́ wa gádadɔ, uwaány, abákɔ́ŋɛ́d wɔ́ bámámán guág wɔ́ mfeŋ. 13Muát gisién uwɔbiɔ́yɛdɛn ká: “Yaál nanyá ooo? Ngagúdɔ́mɛ́n bɔ́ mɔɔn wám imenyené gubíléne. Ala, bɔ́gɔgɔ́l wɔ́ gianta gá buanda.” 14Anyɛ́ band abaány máal ná guán mɔɔn wá mɔnd uwaány, ɔbɔ́biɔ́yɛdɛn bɔ́bɔ́ na bɔ́bɔ́ ká: “Ogíndigínd ewe, nsɛ́ diɔ́n wɔ́, bigínd diɔ́bɛ́n!” 15Ebémi wɔ́ agá gisién, ɔbɔ́nɔɔ́n wɔ́ uguány. Muát gisién uwaány gaal nanyá nɔbɔ e? 16Ugólúgun, úfúfi band abaány, úgɔ́l gisién wéŋin gá band bóndodi.»
Band máal na guɔ́b anaány, bágányɛ ká: «Ta onkól ɔdiguɔ́yɔ.» 17Yésu gudámb bɔ́ eŋís sóŋŋŋ, uganyɛ ká:
«Guɔ́ŋ gúnyá agá mbɔbɔnɔ ya Gɔdányá eye guɔ́yɔ ká giág e?
Nɛdány ɛnɛ́ befuég móomb,
nɛ́nɛ́ níméesiíl nɛdány nɛ́bɛ́dɔ́ganá gians gidigid.
18Mɔnd uganúgua agá nɛdany iniány gagandagand, nɛ́mágɔɔn mɔnd, nɛ́ gagula wɔ́.»
19Bóŋ bisele na bɔgɔ́gɔ abámbɛd ká bábɛ́kuá Yésu kɔ́ nɔ kɔ́ ány, gágual ká bámalɛnsán ká, nsab iyaány gúlɛ́ŋa bɔ́, ta anaány, bédíne band bá gɛdɔŋ.
Tás wa Sesál
(Mat 22.15-22; Mál 12.13-17)
20Gubanyɛg ány, ebédúm gudédénenyi Yésu, bádɔ́maan band agág gá masiá ká bála anyɛ bányɛ band bányá besi; ká bófoon Yésu nŋófuny igegúnúgusi wɔ́, ány bábád gudú wɔ́ agá bugaga bá ngɔ́mɔnɔ ibiananá kɔɔ́m agány. 21Bágányɛ gág ká: «Ofúnyifúny, digúlɛnsaan ká buanda ubú ɔyɔnɔ́ na ubú efúnyifunyé band, búnyɛ meliŋítas. Ɔdigúgɔ́lɔɔn gɛsɛgɛl na ɛmbɛdágɛ́dɛ́n sá band, egúfunyifunyi agá meliŋítas buanda ubú Gɔdányá bílénené ká diála. 22Diɔ́yɛ́dɛ́n gɔ́g, digúbianan ká dínámaan taás aga ofuŋ uwɔgɔ́n bábɛ́laná ká Sesala#20.22 Sesál mabá ngɔ́mɔnɔ wa gɛdɔŋ gá Lɔ́m. e dɛdɛnamá e?» 23Anyɛ́ Yésu málɛnsán busiŋíd bɔ́b, owondinyi bɔ́ ká: 24«Ónuŋólónín mbámb yá muonyi yaán. Uganyɛ gɔ́b ká: Ányá unyá na giíyé na ɔfɛ́n ewe únyá ɔŋɔ́ŋɔ́n kɔ́ e?» Bágányɛ gág ká: «Sesála.» 25Yésu ganyɛ gɔ́b gɔg ká: «Ónuondónyínyí Sesála ubúnyá bág, nuéŋeén Gɔdányá ubú buɔ́bɔnɛnɔ́ wɔ́.» 26Uwayágán gɔgɔɔn agá gifondi agá eŋís yá band. Nŋondiny yág iyaal ká béméŋeméŋ ta bɔ́guoyɔ, ebélúŋ.
Guanyɔg gá ebeguén
(Mat 22.23-33; Mál 12.18-27)
27Gɛdám gá Basaduseyɛ́ŋ igiíl aga Yésu. Basaduseyɛ́ŋ nyɛ band bádiádábáná ká guanyɔg gá ebeguén nyɛ́ kɔ́. Obófún wɔ́ ká: 28«Ofúnyifúny, Moyíso mɔ́ɔŋ agá mbɔbɔnɔ ya bisele ká: Mɔnd mábianan endimen waga, endimen uwaány gú, utɛ́n gisi#20.28 Bómodió guɔyɔ ká gisig.gág kand mɔɔn, mɔnd uwaány gúbianan ká úgɔ́l gisi igiány, úbiénin endimen uwaány uméegú ban. 29Kányɛ belimen bátíndád nomo máabá. Wobusió, uwegiŋ agánd, uwegú kand mɔɔn a na agánd uwaány. 30Wa gándɛ uwegiŋ gisi igiány, 31wa gádadɔ uwegiŋ sɔ́n agánd, guám anyɛ́ bem bátíndád nomo méegíŋ gɛ́, ebégú ta wegubién mɔɔn naga. 32Agá gélem ány, agánd sɔ́n uwegú. 33Agá guanyɔg gá ebeguén, agánd uwaány gabá agány ányá e? Anyɛ́ búnyá ká bem bátíndád nomo mabɛ́dɛ́gaán wɔ́ e?» 34Yésu guondinyi bɔ́ ká: «Banɔ́mandɔ na bagánd bá gus egue, gúgiŋenin. 35Ebe ɔbɔ́ Gɔdányá máan ká bágúsigimanan guanyɔg aga ebeguén na ká bɔ́sɔ́dɔɔn medug mólonó, digebígíŋe. 36Búnyá ká bádigand gugú, gágual ká nɔbɔ, na ɛngɛlɛs, bágányɛ buanda búmoom. Bágányɛ baan bá Gɔdányá, anyɛ́ gúnyá bágubá aga ebeguén, Gɔdányá uwenyi bɔ́. 37Moyíso medíyé nɔ́ besé na besé ká ebeguén ganyɔgaan. Agá mbɔbɔnɔ ɛyɛ́ umɔ́ɔŋɔ́, kɔ́, uguɔ́yɔ buóny bá gidudu gímáalɔlá, ubɛ́laan Ɔgúnɔ́ ká Gɔdányá wá Ábalaháma, wa Isáka, Gɔdányá wa Yákɔba. 38Gɔdányá dɛ́bá Gɔdányá wa ebeguén, unyɛ Gɔdányá wa bɔgɔ́siɔ, gágual ká, agagá bem bádadɔ abaány, nyɛ bɔgɔ́s#20.38 Band bɔ́sɔ́dɔnɔ́, bɔ́bɔ́ bégúmenyé Gɔdányá, sá ebeguén. Kányɛ búnyá, ebe gidigid bábaná na busió na gusɔ́dɔn ta agá gélem gá nigú, gaban na busió na gugúmenyi wɔ́. .» 39Gɛdám gá bóŋ bisele ganyɛ gág ká: «Ofúnyifúny, amágálɛ́d bese.» 40Agá gélem ány ta mɔnd wa guand gumag guófún wɔ́ nŋófuny, udɛmabá.
Kilíse gúdɔ́mban Défide
(Mat 22.41-45; Mál 12.35-37)
41Yésu guófún bɔ́ ká: «Nanyá bányá bɔ́guɔyɛd ká Kilíse gúbianan ká úbá wa nigúl ná Défide e? 42Anyɛ́ gúnyá ká Défide uwɔ́ muát uguɔ́yɔ agá mbɔbɔnɔ ya ɛsag ká: Ɔgúnɔ́ ɔ́guɔyɛdɛn Ɔgúnɔ́ wám ká: Gesílukúmín agá ɔmbɔ́g wám uwɔnɛ́m, 43guám anyɛ́ nganúdiá bambɛ́lɛmbɛ́l bɔ́w, yág bɔ́ gúsigúsié wa ambaná yɔ́w. 44Défide uwɔ́ muát gúbɛ́laan wɔ́ ká Ɔgúnɔ́. Nɛnamá nínúm gɔ́g Kilíse nyá mɔɔn wág e.»
Yésu gugélenyi bóŋ
(Mál 12.37-40)
45Band máal bányá gúbɛ́dɔ́lɛ́gɔɔn gufúnyifunyi gág, uganyɛ gá bafɔ́nɔfɔ́n ká: 46«Ánubɛ́nyáŋanyáŋ na bóŋ bisele bebílénené gubúmdába na bianta bá bɛla, bébíléne ká bébígélígeli bɔ́ agá kɔɔ́m band nyá giod, bébíléne gulukumen agá eluku yá busió agá gians gá mbísógól, ta kɔɔ́m gá ɔnyɔ́. 47Bónd bányánɛn bisi bá bagánd, bála imbísógól sɛ́nyá guya gá gúbídíyenyi. Gɔdányá gegélenyi bɔ́ gɔdɔ́mb anaány#20.47 Nɛgál ɛnɛ́ bɔ́yɔnɔ aya nyɛ nɛgál ná gusúgúdenyi..»
လက္ရွိေရြးခ်ယ္ထားမွု
Lúkasa 20: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ