Lúkasa 19
19
Na Yésu na Sasé
1Anyɛ́ Yésu mébíŋín agá tísɔn wa Yelíko, ká úyɔɔg wɔ́, 2ɛnɔ́m ya mɔnd ɔfɛ́n ká Sasé mabá kɔ́. Umabá ɔgɔ́n wá bedús tás. 3Umaambá guán ányá unyá Yésu. Udɛmabia giás, anyɛ́ gúmáabá ká giŋi gá band mabɛndɛ́n wɔ́ nŋili, ɔwɔ́ nɔ́ osúg. 4Uwɔgɔ́l ɔdɛ́d uwasɔŋɔn agá busió, uwanabɔ́lɛ́g agá bɔdɛ́d bábɛ́laná ká sikɔmɔ́l ká waán Yésu umáabá ká údɔ́mbɛ́n ány. 5Yésu máal usiegén agá kɔɔ́m agány, uwabɛ́bɔ́lɛ́man, uganyɛ ká: «Sasé! Sém fiaŋ, gágual ká ínen ewe, ngegúkúlíd ɔgɔ́w gá gians.» 6Uwesem fiaŋ fiaŋ uwogóli Yésu na bɛdɔdɛn. 7Anɛ́ band máan anaány, ebédúm gugálɛ́n galɛn Yésu, bɔ́yɔ ká: «Ginɔ́g egie mébíŋín aga afalafal e?» 8Sasé gudélímin uganyɛ gá Ɔgúnɔ́ ká: «Ofúnyifúny, ɛ́mbɛ́dɔ́lɛ́gɛ́n, ngéŋin giéns gám gá bɔnɛ́m gá basɔ́gasɔga. Ɔgɔ́ imɔgɔ́l buanda bá mɔnd búmoom agá biɔgɔ, ngondinyi wɔ́ manda méní.» 9Yésu ganyɛ gág ká: «Ínen ewe, gisódio mébíŋín agá gians egie, gágual ká aŋuá sɔ́n anyɛ agá nɔgɔgɔ ná Ábalaháma. 10Búnyá ká yaŋuá Mɔɔn wá mɔnd nguúl gá gúsiambá, yónd nsódi ebe bányá benyímén.»
Nsab ya bél buól bádadɔ
(Mat 25.14-30)
11Yésu guand gudúmín band bɔ́mɔ́ɔbɛ́dɔ́lɛ́gɔɔ́n wɔ́ nsab anyɛ́ umáabá uganyɛ egúy na Yelúsalɛm. Bámabɛ́dágá ká Bufuŋ bá Gɔdányá gúleen ád ány. 12Uganyɛ ká: «Mɔnd wa nigúl ná befuŋ#19.12 Búnyɛ buɔyɛ́dɔ́n ká: baŋaŋ. máab agá gɛdɔŋ gá ayáyá ká bédényígényí wɔ́ ofuŋ uguány úbád gusiondo. 13Umáal uganyɛ ká údɔ́mbɔ, uwabɛ́lɛ́gɛn bél buol bág bát. Uwéŋen sig mɔnd a mbámb yá gól inyá na mfí giod. Uganyɛ gɔ́b ká: “Ánualá ká muonyi umuány biéné guám anyɛ́ ngonúsiondo.” 14Anyɛ́ mɔnd uwaány máabá na ɛmbɛlɛ giod na band bá gɛdɔŋ gág, ebésién bádɔ́m band na nsɔ́m ká bɔ́yɛ́d ká: “didigúbíléne ká úbá ofuŋ wás!” 15Ta anaány, ebédényígenyi wɔ́ ofuŋ wá gɛdɔŋ gág. Umáal na gusiondó, uwabɛ́laan bél buol bág ɔbɔ́ uméeŋén bɔ́ muonyi ká úlɛ́ns nanyá bányá guendenyi mú. 16Wobusió uwuúl, uganyɛ ká: “Ɔgúnɔ́, muonyi umɔ́ amáamfá égubíbién bɛsɛgɛl biát.” 17Mɔnd uwaány guondinyi wɔ́ ká: “Búnyɛ́ besé anaány, anyɛ ginɔ́g gá eŋél buol, emédíyé nuládád gá buanda bá sɛgɛsɛg. Buád buand Imégudényígényí ofuŋ wá batísɔn bát.” 18Eŋél buol wá gándɛ uwasiám, uganyɛ ká: “Muonyi umú amáamfá égubíbién bɛsɛgɛl bɛ́tán.” 19Mɔnd uwaány ganyɛ gág ká: “Imégudényígényí ofuŋ wá batísɔn bátán.” 20Gá guamaná, eŋél buol omodió ganyɛ ká: “Ɔgúnɔ́, muonyi mɔ́w emue, imabɛ́dɛ́gɛ́n mɔ́ múŋémúŋé agá giéns gá gɛla. 21Gá guán, ngúgudíné, gágual ká, anyɛ gulal, ɔgúgɔ́lɔn buanda búdiábáná bɔ́w, agaya ubú amáal adɛgɔ́n.” 22Mɔnd uwaány ganyɛ gág ká: “Ɔnɔɔ́n ewe, amásɔ́mb buóny bɔ́w aŋuá muát. Amalɛnsán ká nnyɛ gulal, ngɔ́lɔɔn búdiábáná bám, ngaya ubú mmáal ndɛgɔ́n. 23Góbusió bá giág ányá guen guág muonyi mám agá nimónsól ká yaŋuá nogusiondó, yɔ́gɔ́l mú na bɛdálág e?” 24Mɔnd uwaány guɔyɛd gá band bámáabá ány ká: “Ɔ́nugɔ́l muonyi umuány, nuéŋin sɔ́gɔ ɔwɔ́ mág nyá gubíbién bɛsɛgɛl biát.” 25Bágányɛ gág ká: “Wókó ɔgúnɔgɔn, ɔwɔ́ uganyɛ na muonyi giod.” 26Mɔnd uwaány ganyɛ gɔ́b ká: “Ngúnuɔ́yɔɔn ká mɔnd gidigid ubiananá, bɔ́gɔ́yɛ́kɛnɛn wɔ́, ewe udiábiánáná, bégéli ta gɛdám ɛgɛ́ unyá na gɛ́. 27Agá giáy gɛ́lɛ́ŋaná bambɛ́lɛmbɛ́l bám bányá gusáŋɔ́n ká ndiál ofuŋ wɔ́b, ónuŋólónín bɔ́, nuɔ́nɔ bɔ́ aya agám góbusió.”» 28Yésu máal úmáman guɔyɔ anaány, uwasɔŋɔn gá gɔb Yelúsalɛm.
Gubíŋín gá Yésu Yelósalɛm
(Mat 21.1-11,15-17; Mál 11.1-10; Sáŋ 12.12-16)
29Bámáal bágányɛ báguám Betefasé, na Betaní, giáy gá nɔgɔnd ná bolifié#19.29 Bɔdɛ́dɛ buómonó bolíf.. Yésu gusuŋunyi bafɔ́nɔfɔ́n bág bándɛ, 30uganyɛ gɔ́b ká: «Ánɔ́b agá gɛdɔŋ gɛ́nyá agán gá busió: Nugaguál númébíŋín gá gɛ́, nugɔgúfuɔg mɔɔn wa abaŋ bɛbia esúŋén, mɔnd mabása udɛbɔ́lɛ́g gá wɔ́ ta buɔ́s. Núsúŋun, núŋólónin wɔ́. 31Búmánɛ́g ká mɔnd mónuófún ká: “Nuguála anaány gá giág e?” Nuondinyi ká: “Ɔgúnɔ́ wambaná.”» 32Band ɔbɔ́ umáadɔ́m, abáb, ɔbɔ́fuɔgɛn manda gɔɔ́gɔ anyɛ́ Yésu mɔ́ɔyɔ́. 33Bámáal bágányá gúsuŋune mɔɔn wa abaŋ bɛbia, baát abaŋ bɛbia guófún bɔ́ ká: «Nugúsuŋune mɔɔn wa abaŋ bɛbia uwaány gá busió bá giág e?» 34Obóndinyi ká: «Ɔgúnɔ wambaná.» 35Abábaan abaŋ bɛbia uwaány agá Yésu. Anyɛ́ bámáab guége, ebélenyi bɛla bɔ́b bímodió bɛ́máabá ɔgɔ́b gá duɔ́l, abádála bɛ́ agá abaŋ bɛbia. 36Umabá wubaan, band ánɛgaan bɛla bɔ́b ibiány egegus agá nŋili. 37Anyɛ́ bámáal bágányɛ egúy na Yelúsalɛm, agá gindúnyígié gá nɔgɔnd ná Bolifié, giŋi gá bafɔ́nɔfɔ́n igiábanyɛg gugúmenyi Gɔdányá ekelu magɔ́gɔ́n gobusió bá mesey ɔmɔ́ bámáanaán. 38Bɔ́yɔ ká:
«Bese bá na ewe, ofuŋ wúlené agá ɔfɛ́n wá Ɔgúnɔ́!
Bumbén bá ugumuana, nugúm bá aga Gɔdányá!»
39Gɛdám gá Bafalisiɛŋ gímáabá agá giŋi gá band nagadá ganyɛ gá Yésu ká: «Ɔgúnɔ́, lúŋi bafɔ́nɔfɔ́n bɔ́w.» 40Yésu guondinyi: «Ngúnuɔ́yɔɔn ká, ta ilúŋi gulúŋi bɔ́, adány eye gaguánsa.»
Yésu gúbaŋa gá busió bá band bá tísɔn wá Yelósalɛm
41Umáal uganyɛ egúy na Yelúsalɛm, uwabɛ́bɔ́lɛ́man tísɔn, uwedúm gubaŋa góbúsió bá wɔ́. 42Uganyɛ ká: «Céh, búbá bágual ká núsɔ́ŋɔ́n gá buɔ́s bá ínen, nanyá nunyá báguán bumben! Nɛ́nuán gɔ́g, búgunúbiɔ́sɛgɛn, nudɛbá báguán bɔ́! 43Gɛsɛgɛl gasiám ɛgɛ́ bambɛ́mbɛ́l bán gɔnúnúbɔŋ bánuág agá ɔmɛndɛ, bánúbíliadɛn máy mem; 44Báganúsálɔ́n, banuá na tísɔn wanɔ. Bádɛgatɛɛ́n ta nɛdany nímoom nidálán agá sɔ́g nɛdany, gágual ká nudɛmásɔ́ŋɔ́n gigúl gá giyɔlɔ gá Gɔdányá.»
Yésu agá ɔnyɛb
(Mat 21.12-17; Mál 11.15-19; Sáŋ 2.13-22)
45Yésu uwébíŋín agá ɔnyɛb wá Gɔdányá, uwedúm gukɔ́ŋa bedús manda. 46Wɔyɔ gɔ́b ká: «Búnyɛ buɔ́ŋɔ́n agá mbɔbɔnɔ ya Gɔdányá ká: Gians gám gabá gians gá mbísógól. Banuá, núguíyi gɛ́ kɔɔ́m gá beéb.» 47Umabá sig buɔ́siɔ́, ufúnyifunyi agá ɔnyɛb wá Gɔdányá. Bɔgɔ́gɔ, na bóŋ bisele, na bagɔn bá gɛdɔŋ ámba nŋili yá guɔ́n wɔ́; 48bádɛ́lɛ́ns anyɛ́ bányá ká bámɛ́nɛn gágual ká band bá gɛdɔŋ gidigid mɔbɛ́dɔ́lɛ́gɔɔ́n Yésu bese na bese.
လက္ရွိေရြးခ်ယ္ထားမွု
Lúkasa 19: MMU2
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ