Imbombo 13
13
U Balanabasi nu Sabuli bakusaliwa nu kutumiwa
1Muchipanga cha mukaya ka Andiyokiya mukaba abasololi na bamanyisi, u Balanabasi nu Simiyoni yo bakati mufitu, u Lusiyasi uwa mu Keleni, u Manayi yo akakulilagha poka nu malafyale u Helodi, nu Sabuli. 2Bo bali pakwiputa kwa Malafyale nukutusya pakulya, u Mbepo Mwikemo akababusya akati, “Musabulile u Balanabasi nu Sabuli ukuti babombe imbombo yo ngabitisya.
3Po bo batusya pakulya nukwiputa, bakabika inyobe pa pabo nukubatuma.
Muchisu cha Sayipulasi
4Bo batumiwa nu Mbepo Mwikemo u Balanabasi nu Sabuli bakabuka mukaya ka Selebukiya nukuloboka nu bwato pakubuka pa kasungo ka Sayipulasi. 5Bo bafika mu Salami, bakalumbilila amasyu gha Chala mu nyumba sya kwiputilamo isya ba Yuda. Bakaba poka nu Yohani uwa kubafwa.
6Bo babukilila mosi mu kasungo bakafikila ku Pafosi, bakamwagha umundu uwa mayele, umu Yuda umusololi wabumyasi, ilita lyake akaba we Bala Yesu, 7yo akaba nu Saligiya Pabuli, yo akaba mundu wa mahala, weyo akamwitisya u Balanabasi nu Sabuli ukuti bateghelesye Isyu lya Chala. 8Loli Elimasi uwa mayele (pakuti ilita lyake likang’anamula bububu) akabasusya nu kughesya pakumunyosya umulaghili wa chisu ukuti atakasubile. 9Po u Sabuli yo bakati Pabuli, akisula nu Mbepo Mwikemo, akamulolelesya uwa mayele yula 10nukuti, “We mwana wa Satana! We mulughu wa chindu chosi cho chisa, sona wiswile nu bumyasi nu kusimbula, imba utakuleka pakunyongannya isila inyisa isya Malafyale? 11Pololi, tesya inyobe ya Malafyale yili pa uwe, po ukwisa pakuba mufwa maso nukupotwa pa kutesya isuba pakabalilo akapala.”
Papapo na papapo ukabefu ni chisi fikamuwila, akapulumbagha pakulonda yumo uwa kuti amukole inyobe. 12Bo umulindili wa chisu atesya syo sikabombiwagha akasubila, pakuti akaswigha ni chimanyisyo cha Malafyale.
Mu kaya aka Andiyokiya mu Pisidiya
13Po u Pabuli na banine bakenda pa bwato ukufuma mu Pafosi nukubuka ku Peliga mu chisu cha Pamufiliya, ko u Yohani akabaleka nu kunyokela ku Yelusalemu. 14Loli bakenda ukufuma ku Peliga ukufika ku Andiyokiya uwa mu Pisidiya. Po bakingila mu nyumba ya kwiputilamo pisiku lya kutusya nu kwikala pasi. 15Bo babelenga mumabuku gha Ndaghilo sya Mozesi nagha basololi, abalongosi ba nyumba yakwiputilamo bakabatumila amasyu aghakuti, “Bakamu, pala muli na masyu aghakubabusya abandu aba, yugha.”
16Po u Pabuli akimilila, akabatebesya ichongo ni nyobe yake akati, “Banalume ba mu Izilayeli, namwe mukumoghopa u Chala, teghelesya. 17#Ukf1.7; Ukf12.51.U Chala uwa bandu aba mu Izilayeli abanyenya bitu, akabakwesya abandu bala bo bagheni mu chisu cha Ijiputi, po akabatisya mu chisu cha Ijiputi namaka ghake ghosi, 18#Ukb4.34; Ukk1.31. pakuti akayimba nabo ifinja fote mungolongo. 19#Ukk7.1; Yos14.1.Akakomannya ifikolo fya bandu seveni mu Kenani, nukubapa ichisu chabo ukuti bapyane pakuba chabo. 20#Abl2.16; 1 Sam3.20.Fyosi fififi fikasenya ifinja folo handeledi fifite. Panyuma pasisi akabapa abalongi ukufika pakabalilo ka musololi u Samuyeli. 21#1 Sam8.5; 10.21. Po abandu bakasuma u malafyale, u Chala akabapa u Sabuli umwana wa Kishi, umundu waluko lwa Benjamini, pa finja fote. 22#1 Sam13.14; 16.12; Mas89.20.Bo amutisyapo u Sabuli, akabasalila u Devedi ukuti abe we malafyale wabo, yo akasimikisya ukuti, ‘Namwagha u Devedi umwana wa Yese, umundu wa pamoyo wangu, yo ayukubomba ubwighane bwangu bosi.’ 23Akaba we Yesu, uwaluko lwa Devedi, yo u Chala akamubika pakuba Mupoki wa Izilayeli ukuyana nipangano lyake. 24#Miko1.4; Luk3.3. Bo akali atisile umwene, u Yohani akalumbilila ulosyo lwa lupinduko ku bandu bosi aba mu Izilayeli. 25#Yoh1.20; Mat3.11; Miko1.7; Luk3.16; Yoh1.27.Bo u Yohani ali papipi pakumalisya imbombo yake, akabalalusya abandu bala akati, ‘Imba mukwinong’ona ukuti une ne wenu? Une tenene yo mukumulindila. Loli tesya, umwene akwisa panyuma pa pangu. Ndabaghile napo papala pakusatula utukungilo twa sapato syake.’
26“Mwee bakamu bangu ba Izilayeli, abaluko lwa Abulahamu namwe mukumoghopa u Chala, isyu lya bupoki lya tumiwa ku utwe. 27Pakuti bo bakwikala mu Yelusalemu na balongosi babo, bo batakamumanya u Yesu, pamo amasyu gha basololi gho bakabelengagha isiku lyosi ilya kutusya, bakakwanilisya syosi sisisi pakumughogha. 28#Mat27.22; 23.Napo batakamwagha ni nongwa nayimo iyakumughoghela, loli bakamusuma u Pilati ukuti u Yesu aghoghiwe.
29 #
Mat27.57-61; Luk23.52-56; Yoh19.8-42. Bo bamala syosi syo amasimbo ghakayugha nisya yuyo, bakamwisya pambinjika nukumubika mwipumba. 30Loli u Chala akamususya kubufwe, 31#Imbo1.3.po amasiku amingi akababonekela bo bakenda nawe ukufuma mu Galileya ukubuka mu Yelusalemu, bo ipano bo bakamboni bake ku bandu. 32Po tuli pakubabusya Amasyu Amisa gho u Chala akapangana na banyenya bitu, 33#Mas2.7.ukuti akwanilisya ku twe bana bake pakumususya u Yesu kubufwe ukuyana namo mukasimbiliwa mwa masalimo uwabubili ukuti,
“Uwe we Mwana wangu, ipano na kupapa.”
34 #
Yis55.3. Loli pakuti akamususya kubufwe, ukuti atakanyokele sona pakubola. Ngati mo u Chala akayughila ukuti,
‘Ngwisa pakubapa ulusayo ulwikemo ulwa bwanaloli, lo akapangana nu Devedi.’
35 #
Mas16.10. Pololi akayugha sona mwa Masalimo uyungi ukuti,
‘Utakitikisye ukuti u Mwikemo wako atesye ukubola.’
36Pakuti bo u Devedi abomba ukuyana namo u Chala akabatikila pakabalilo kake, akafwa nukusiliwa poka na banyenya bake, po umufimba wake ghukabola, 37loli yo u Chala akamususya kubufwe atakatesyapo ukobola. 38Pololi bakamu bangu, musimanye ukuti mwa Yesu, momo mukufumusiwa ukuhobokeliwa kwa mbibi, 39ukwendela mumwake wesi yo akusubila akubwagha ubupoki bo wesi angayughiwa pakuba mwisa pakukonga indaghilo sya Moses. 40Muchebe ukuti syo abasololi bakayugha sitakabombiwe ku umwe. 41#Heb1.5.‘Tesya, mwe balobesyo umwe!
Muswighe nu kufwa!
Pakuti ngubomba imbombo une mumasiku ghinyu,
imbombo yo temukasubile,
napo pala yumo akubabusya.’ ”
42Bo u Pabuli nu Balanabasi bakafumamo munyumba yakwiputilamo, abamanyili bakabasuma ukuti bise bababusye sona amasyu ghagha pisiku lya kutusya ilingi. 43Bo abandu bafumapo palukomano lula, aba Yuda abingi na bakupindukila ku Chiyuda, bakamukonga u Pabuli nu Balanabasi, bakababusya nu kubakasya ukuti bendelele pakwikala ukuyana nichisa cha Chala.
44Po pisiku lyakutusya ilingi, bakabungana bosi poka ngati kaya kosi pakwifwa isyu lya Chala. 45Loli bo aba Yuda batesya ichilundilo cha bandu, bakisula nakabini, bakasusannya nasyo u Pabuli akayugha nu kumusamula ngani. 46Po u Pabuli nu Balanabasi bakayugha nubukifu ukuti, “Chikaba chakulondiwa ukuti Isyu lya Chala liyughiwe tasi ku umwe. Loli pakuti mwaghakana, sona ukuti mukwinong’ona mutabaghile pakupokela ubumi bwa bwile na bwile, tesya, tukunyokela ku bapanja. 47#Yis42.6; 49.6.Pakuti u Malafyale akatupa ilamulo lyakuti,
‘Nakubika uwe pakuba bwelu ku bapanja,
ukuti abandu ba muchisu chosi bapokiwe.’ ”
48Bo abapanja bifwa sisisi, bakahoboka nu kupala Isyu lya Chala, po bosi bo bakabikiwa ku bumi bwa bwile na bwile bakasubila.
49Isyu lya Malafyale likasata muchisu chosi. 50Loli aba Yuda bakabakakamisya abakolo abamanyikwe aba kwiputa u Chala, na basongo aba mukaya, bakanda pakubafwima u Pabuli nu Balanabasi nukubatisyamo mukaya kabo. 51#Mat10.14; Miko6.1; Luk9.5; 10.11.Loli abene bakabakung’undila ulufumbi ulwa mufinama fyabo, bakabuka mukaya ka Ikoniyamu. 52Po abitiki aba mukaya aka Andiyokiya bakahoboka ngani nu kwisula nu Mbepo Mwikemo.
လက္ရွိေရြးခ်ယ္ထားမွု
Imbombo 13: SSTP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ