Imbombo 12
12
Ukufwimiwa kukongelela
1Akabalilo kala kala u malafyale u Helodi akanda pakubafwima bamo aba mu chipanga. 2Akamughogha u Yakobo uwamwabo wa Yohani nu panga. 3Bo atesya ukuti cha bahobosya ngani aba Yuda, akabukilila pakumukola u Pitala. (Isi sikaboneka pakabalilo ka lusekelo lwa chibama ichisita chilungo.) 4#Ukf12.1-27.Bo amukola, akamwighalila mujela, mo akamubika munyobe sya tubukutila folo utwa abalindili ukuti bamulindililaghe. U Helodi akalonda ukumufumya nukubuka nawe ku bandu bo ulusekelo lwa Pasaka lwamala. 5Po u Pitala akasungiwa mujela, loli ichipanga chikamwiputilagha ngani kwa Chala.
U Pitala akusatuliwa mujela
6Bo u Helodi akuya pakumufumya, ubusiku bo u Pitala akaghona utulo pakati pa balindilili babili bala, akapinyiwa ni mbingu sibili, sona pamulyango pakaba abalindili bo bakalindililagha ijela. 7Umwakukenusya bubu uwandumi wa Malafyale akamubonekela, ubwelu bukabala mujela mula. Akamukoma u Pitala mumbafu, akamunyamusya nukuyugha ukuti, “Nyamuka lubilo!” Po imbingu sikawa ukufuma munyobe syake. 8Po uwandumi akati, ‘Ipinya ulamba mu musana wako nu kufwala isapato syako. U Pitala akabomba bububu. Po uwandumi akayugha akati, “Fwala umuselekesya wako ungonge. 9Po u Pitala akafuma kusi nukumukonga. Umwene atakasyaghannya ukuti sya bwanaloli syo syabombiwa nu wandumi, loli akinong’ona ukuti achitesya ichisetuka. 10Bo bapululila pabalindili babwandilo na babubili, bakafika pamulyango wa chela uwakwingilila mukaya kala. Umwakukenusya bubu uwandumi yula akamuleka u Pitala.
11Po u Pitala akasyaghannya ukuti, “Ipano namanya ubwanaloli ukuti u Malafyale akatuma uwandumi wake ukuti amboke munyobe sya Helodi na mufyosi fyo aba Yuda bakinong’onagha.”
12Bo asyaghannya sisisi, akabuka ku nyumba ya Maliya, ung’ina wa Yohani yo ilita ilingi bakati Maliko, ko abandu abingi bakabungana poka sona bakiputagha. 13Bo akukong’osya pa mulyango wa lupaso, uwambombo umulindu yo akaba we Loda akisa pakumwamula. 14Bo alyaghannya isyu lya Pitala, chifukwa cha lusekelo atakighula ichighi, loli akakindila mukati nukubabusya abanine ukuti u Pitala imilile pamulyango. 15Bakamwamula bakati, “Upenite uwe!” Loli akalimbikila pakuyugha ukuti sya momumo. Po bakamula bakati, “Wandumi wake!”
16Loli u Pitala akendelela pakukong’osya, po bo bamwighulila ichighi, bakamutesya nu kuswigha ngani. 17Loli akabatebesya ichongo ninyobe, akabalingannya mo u Malafyale amufumikisya mujela. Po akayugha akati, “Mu mubusye u Yakobo na banyitu sisisi. Po akafuma nu kubuka ku buyo ubungi.
18Bo kwacha, kukaba ichongo ichikulu pakati pa balindilili, nukulalusannya ukuti, ‘Imba choni cho chabombiwa nu Pitala.?” 19Bo u Helodi akumulonda, loli atakamwagha. Po abalindilili bakalalusiwa nukulamuliwa ukuti baghoghiwe.
Po u Helodi akafumamo mu Yudeya nukubuka mu Kesaliya pakwikala kula kula.
Ukufwa kwa Helodi
20U Helodi akakalala ngani na bandu ba mu Tili nu Sidoni. Po bakisa kukwake nu moyo ghoka, bakamunnyengelela u Bulasita u songo wa nyumba ya bunyafyale ukuti abafwe. Po bakasuma umutende chifukwa ichakulya chabo chikafumagha muchisu cha malafyale yula yula.
21Pisiku lyo likasaliwa u Helodi akafwala amalaya ghake agha bunyafyale, akikala pa chitengo cha bunyafyale nu kubalingannya abandu. 22Po abandu bakakolela ngani ukuti, “Ili lyo lisyu lya chala, te mundu hagha.” 23Papapo na papapo uwandumi wa Malafyale akamukoma u Helodi, chifukwa atakamughindika u Chala, po isomi sikamulya nu kufwa.
24Loli isyu lya Chala likendelelagha pakusata nu kukula.
25Po u Balanabasi nu Sabuli bo bamala imbombo yabo, bakanyokela ukufuma ku Yelusalemu, bakamusenya u Yohani yo ilita limo akaba we Maliko.
လက္ရွိေရြးခ်ယ္ထားမွု
Imbombo 12: SSTP
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ