Mariko 11
11
Yesu etadoriiwa kikulho are Yerusalemu
Matayo 21:1-11; Luka 19:28-40; Yohana 12:12-19
1Yesu na vahina kuu vareahe sina na muang'a Yerusalemu, vekahe miang'a ya Betifage na Betania yeaha he lubwa lwa Mizeituni. Yesu ekavasugha vahina kuu vanu vamkaeye. 2Ekavaaji, “Soni he kijiji chiaha khara he kune. Mukuhe ata, muneheiya muinyi wa mhunda esinaba kuboi nyamalo, eoroiwe, mgeni naho mumgera hagho. 3Hekusa mheenemulhasu ite kwaahoni muboi to, mubani, Dilao emdumu naho enemkiriti madamo esimakumure.”
4Niho vekaso, vekamuheiya muinyi wa mhunda eoroiwe khakhera he balabala, sina na luhige lwa minda. Vareakhwa vemge, 5vahe vakuwe veeumae sina na to vekavalhasu, “Kwaakhoni mumge ka muinyi wa mhunda?”
6Vahina vekavabaiya sakigi Yesu evaajie, na ka vahe vekavadumuija. 7Vekamgeria Yesu ka muinyi wa mhunda na vekanagha gomae ana heka muinyi wa mhunda, Yesu ekazokhodi ana heka muinyi wa mhunda. 8Vahe vakumure vekanagha gomae kini he balabala, na vahali vekate matambi vekanagha he kwalhi. 9Vahe vekaee nahu veliaha mzungure vekayoisha, “Kiumbi atagolwe! Kiumbi emgimbika hu elitie kwa ilhe la Dilao” 10“Kiumbi uboiwe makulho udilao ulitie wakwe dilao kanu Daudi, ee aba kanu, Kiumbi atogolwe eaha anasha!”
11Yesu ekabuu he muang'a wa Yerusalemu ekaso he minda ya Kiumbi. Ekawesia kira kigi chiaha ata. Mira kwaite nee hachamagheri, ekaso Betania hawe na vahina kuu ikado na vanu.
Yesu etaubusu mkhatu wa mtini
Matayo 21:18-19
12Lhenu kuu, vareakhwa veli Betania, Yesu eelo kela. 13Ekaaho mkhatu wa mtini kwa uda ulo mahupi makumure, ekarauwesia ite eneakho matunda heka mkhatu. Mira areahe, ehee makhupi bi, kwaite madamo ya tini teyeenahe. 14Yesu ekauba ka mkhatu, “Kuli wai na maaze makhabuna tukazesa.”
Vahina kuu vekamko cho eekuyo ka viome.
Yesu etaso he minda ya Kiumbi
Matayo 21:12-17; Luka 19:45-48; Yohana 2:13-22
15Vareahe Yerusalemu, Yesu ekahe he minda ya Kiumbi na kulholhoshi kuvaguguluti vahe vakhabuna veekuwe na kudidi vigi he lugo lwa minda ya Kiumbi. Ekajilhuku meza jahu vahe veekupu mihaku na vikire vya vahe veekudidi njiwa. 16Temdumuije mheadori kigi kuli lugo lwa minda ya Kiumbi. 17Niho ekavahinya vahe, ekuba, “Ho magondo ya Kiumbi hegondiwe ite, minda gho inesewe minda ya kuaresia kwa vahe va madi makhabuna. Mira kune mwaaiboi kukhwa mhanga ya vagwalo!”
18Vagiru va muaresi na vahinya va miku yakwe Kiumbi emuoe Musa vekako to, vekalholhoshi kudaa kwalhi ya kumgaa Yesu. Mira veekumko bughu, kwaite ifyo la vahe vakabuna veekumaka ka mahinyo kuu makulho.
19Hareahokwa, Yesu na vahina kuu vekali heka muang'a.
Mahinyo ya mburi ya mhatu wa mtini uhalae
Matayo 21:20-22
20Lhenu kuu chalhenu, vareakhwa vetakho kwalhi, vekauakho hu mkhatu weehalae kuli he matambi sari he majindo. 21Petro ekahulha hu viome Yesu eyoe kwa mburi yahu mtini, niho ekamba “Mhinya, wesia, hu mkhatu wa mtini wo weeubusue waahala!”
22Yesu ekavaba, “Mdarisheni Kiumbi. 23Nimubaya ukweri mheeneluba ya lubwa kung'ofole urekubibi he bahari na asikhwa na bughu he swaho kuu, mira adarishe bi ite hu echiyo chinelijanya. 24Kwato nimubaya darishani, mukuaresi na kulhawa kigi, darishani ite mwaachidoria, na muneowe vikhabuna vyo mulhawa. 25Mukumlhawa Kiumbi, Kai helo mheekuboiye kikusa mkaaye na Aba kaghu eaha ana enemukaaya makusa kaghu. 26Mira kune mukusevakaiya vahali makusa kini neri Aba kaghu eaha are ana tekamukaaye na kune makusa yo muboiye.”
Yesu etalhasuwe mburi ya udilao kuu
Matayo 21:23-27; Luka 20:1-8
27Yesu na vahina kuu vekahe kahali Yerusalemu. Yesu areakhwa edaha he lugo lwa minda ya Kiumbi, vaaresi vagiru, vahinya va miku yakwe Kiumbi emuoe Musa, na vaagiru vazime vekamliaha, 28vekamlhasu, “Uboi ya viome kwa ugiru mina? Ho niji ekuoe ugiru wa kuboi ya mburi?”
29Yesu ekavaba, “Ninemulhasu mburi we, mkunibaya, na ani ninemubaya niboi ya mburi kuli he ugiru wakweji. 30Haki nibayani, he ugiru wa Yohana wa kubatija weeliye he Kiumbi hile weeliye he vahe?”
31Vekalholhoshi kulhasuana, “Tukuba ulie he Kiumbi, enetulhasu, kwaakhoni temweemdarishe Yohana? 32Mira tukuba, uliye he vahe, vekavabugheno vahe, kwaite kira mheeeiliye ite Yohana nee mroto wa Kiumbi. 33Niho vekamba Yesu, nne tetuilie.”
Yesu nau ekavaba, “Na ani sikamubaye ite niji enioye ugiru wa kuboi ya mburi.”
လက္ရွိေရြးခ်ယ္ထားမွု
Mariko 11: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.