Mariko 10
10
Yesu etahinya mburi ya kudoriana na kuroana
Matayo 19:1-12; Luka 16:18
1Niho Yesu ekahali Kapernaumu na vahina ekataho chauju ya muharaza Yoridani ekaso he idi la Yudea. Are maifyo makumure ya vahe vekamliaha kahali, nau ekavahinya sakigi eekuraboi.
2Mafarisayo vakuwe vekamliaha Yesu vekamlhasu kalo kumgali, “He miku yakwe Kiumbi emuoe Musa iradumuija muagiru kumgondia magondo ya kumro mlage kuu?”
3Yesu ekavaba, “Ho Musa eajie kiakhoni heka mburi?”
4Vekaba, “Musa edumuije muagiru amgondie mlage kuu magondo ya kuroana.”
5Yesu ekavaba, “Musa emugondie ka miku kwaka swaho kaghu ure. 6Mira kuli cho ya idi lireboiwe, Kiumbi eboiye muagiru na mlage, 7kwato muagiru enemro aba kini ne lage kini, nau enekwari na mlage kuu, 8navo vanu venekhwa msa muwe. Kwato vo si vanu kahali mira mhemuwe. 9Kwato, cho chikwarijwe ni Kiumbi mhe asichikakanye.”
10Vareabuu minda kahali, vahina kuu vekamlhasu Yesu ka mburi. 11Yesu ekavaba, “Muagiru emuro mlage kuu na kudori mlage mhali, enekhwa edi na mlage esimkuu. 12Mlage emuro muagiru kuu na kudoriwa ni muagiru muhali enekhwa edi na muagiru esimkuu.”
Yesu etavaaresia vainyi vagitutu
Matayo 19:13-15; Luka 18:15-17
13Vahe veekuramgeria Yesu vainyi vagitutu avakeye miharegha na kuvaboia makulho, mira vahina kuu vekavalhiija. 14Yesu areavaaho veboi to, ekasanuiwa ekavaba vahina kuu, “Varoni vainyi vagitutu valita hagho msivatitije, kwaite Udilao wa Kiumbi niwa vahe vetoe saya vainyi vagitutu. 15Nimubaya kweri, mhe esiudoria Udilao wa Kiumbi sa muinyi mgitutu, neri tekabuu he Udilao wa Kiumbi.” 16Yesu ekavadorika ka vainyi he miharegha kuu muwe muwe, ekavasamata, ekavakeiya miharegha he mia kini na kuvaboia makulho.
Muhe elo mari edumu uzime wa maaze khabuna
Matayo 19:16-30; Luka 18:18-30
17Yesu areakhwa etaso, mhemuwe ekamguguluya, ekammaya mamuro, ekamlhasu, “Mhinya mkulho, niboi kiahoni nimuru kudoria uzime wa maaze khabuna?”
18Yesu ekamlhasu, “Kwakhoni unise mkulho? Tehelo mkulho, mkulho ni Kiumbi bi. 19Ureile miku ja Kiumbi, usigaa, usibodi na mlage esi kechi, usigwa, usiyo mlame, uvako aba kaku ne lage kaghu.”
20Ka mheekamba, “Mhinya ka miku khabuna neerejidara kuli uburatu gho.”
21Yesu ekamuwesia na ekamdumu mira ekamba, “Ubenie kigi kiwe. So uredidi kira kigi cho ulo nacho, mihaku uvao vahuye naari unekukeya makulho ana he Kiumbi. Niho ulita uniliahe.” 22Hu mheareakoiya to, ekahiri swaho naho ekaso ilai elo vuhuye, kwaite eelo mari kumure.
23Yesu ekawesia kira bwa, ekavaba vahina kuu, “Inekhwa ni viure he velo mari kubuu he udilao wa Kiumbi!”
24Vahina vekamashwa kwa viome kuu, mira Yesu ekavabaya kahali, “Vainyi gho, wesiani cho viure he vahe velo mari kubuu he Udilao wa Kiumbi! 25Kweri chimuruika kimagheri chisewe ngamia kutakho he ihora la singano, kuro elo mari kubuu he Udilao wa Kiumbi.”
26Vahina kuu vekamakisha na kulhasuana, “He ni muhama iji enemuru kuokolwa?”
27Yesu ekavaguya maila, ekavaba, “He vahe techimuruika, mira he Kiumbi chimuruika. Makhabuna emuruika he Kiumbi.”
28Petro ekamba Yesu, “Twaaro kira kigi na kukuliaha ari.”
29Yesu ekavaba, “Kweri nimubaya, kira mheeroe minda kuu hile vabakhu va kiagiru kuu na va kilage kuu hile lage kuu hile abaghe hile vainyi kuu mbuva kwa kiome gho na kwa Mburi Kulho, 30enedoria vigi vikumure he madamo ya waijiji. Enedoria minda naho vabahu va kiagiru na vakilage naho vamilo na mbuva hawe na kharo naho he madamo elitie enedoria uzime wa maaze khabuna. 31Mira vakumure vabosi venekhwa va mkhito na va mkhito venekhwa va bosi.”
Yesu etayo kagi ka kakai mburi ya kigame kuu
Matayo 20:17-19; Luka 18:31-34
32Yesu na vahina kuu veaha kwalhi kuso Yerusalemu. Yesu eevakaee vahina kuu, vahina kuu vekamaka nahu vahe vemliahie vekako bughu. Yesu ekavadori kahali khakhera hu ikado na vanu na kuvabaya hu yenemlianyija. 33Yesu ekavaba, “Lhahonhani, tutaso Yerusalemu, are Muinyi wa Muhe eneotijwa he vagiru va muaresi na vahinya va miku yakwe Kiumbi emuoe Musa vekamyoija nakumuoti he vahe vesi Vayahudi, navo venempaaya zamaro ya kuga, 34venemfwa, venembusuya mapae, venemma na ndate naho venemgaa, mira muaze wa kakai eneka kuli he kigame.”
Yakobo ne Yohana vetamgogo Yesu vaowe ugiru
Matayo 20:20-28
35Niho Yakobo ne Yohana vainyi wakwe Zebedayo, vekalita he Yesu, vekamba, “Mhinya tudumu utuboiye cho tunekulhawa.”
36Yesu ekavalhasu, “Mudumu nimuboie kigi mina?”
37Vekamba, “Tudumu utudumuije tuzokhodi hawe na ari, muwe muharegha kechi wa sughano na muwe muharegha wa hina ukuzokhodi he kikire cha Udilao kechi mgiru.”
38Yesu ekavaba, “Temuilie cho mugogo. Ho munemuru kutakhoia kharo jo ninetakhoiya? Na kugaiwe sacho ninegaiwa?”
39Vekamba, “Ee tumuru.” Yesu ekavaba, “Kharo jo ninetakhoiya nakuni munetakhoia wato na kugame cho ninegaiwa na kune munegaiwa wato? 40Mira ani silo ugiru wa kulhoija niji enezokhodi muharegha gho wa sughano na enezokodi muharegha wa hina. Kiumbi salaghuu niu eilie niji azokhodi muharegha wa sughano naho muharegha wa hina hehu evalhoije.”
41Hu vahina vahali ikado vareako to, vekalholhoshi kuvakoya malhaha Yakobo ne Yohana. 42Kwato, Yesu ekavase vakabuna hawe, ekavaba, “Mureila ite huvo vetotiwe kukhwa vagiru va idi vevaumaya vahe kwa u, naka vagiru kini veaha ana ya vahe kini. 43Mira chisikhwa to he kuni. Mira hu edumu kukhwa mgiru he kune edumuwa akhwa mnyamalo wa vahe vakhabuna. 44Muhe edumu kuvakaeti vahali, edumuwe akhwa mnyamalo wa vakhabuna. 45Kwaite Muinyi wa Muhe telitiye he idi kalo vahe vamnyamarikie, mira elitiye kunyamarikia vahe na kuugu uzime kuu kwa kuvakombo vakumure.”
Yesu etamuuti Batimayo elo maila esiaho
Matayo 20:29-34; Luka 18:35-43
46Niho vekahe Yeriko. Yesu na vahina kuu hawe na ifyo la vahe vareakhwa veli Yeriko kuso muang'a mhali, mhemuwe esiaho ilhe kuu Batimayo muinyi wakwe Timayo, eezokodie kakera he kwalhi ekulhawa vahe vamlhaari. 47Areakoiya ite ni Yesu kuli Nazareti niu eekutakho, ekalholhoshi ekayoisha ekuba, “Yesu muinyi wakwe Daudi, nikoiya mbalamija!”
48Vahe vakumure vekamjoghoya atae. Mira u ekasaisha kuyoisha ekuba, “Muinyi wakwe Daudi, nikoiya mbalamija.”
49Yesu ekauma ekaba, “Mbani alita.”
Kwato vahe vekamse hu esiakho vekamba, “Kuo swaho, uma, Yesu ekuse.”
50Ekabibi gomae kuu, ekamangauma ekaso he Yesu.
51Yesu ekamlhasu, “Udumu nikuboye akhoni?” Ka elo maila yesiakho ekamba.
“Mhinya, nidumu maila gho yamuru kuakho.”
52Yesu ekamba, “So, kudarisha kechi kwakuuti.” Wato oto ekaakho, ekamliaha Yesu he kwalhi.
လက္ရွိေရြးခ်ယ္ထားမွု
Mariko 10: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.