Yohana 11
11
Kigame chakwe Lazaro
1Heelo muhe eekusewa Lazaro, nau nee mrukhao, ka muhe eekudi muang'a wa Betania vaing'inha kuu nee Maria ne Mata, . 2Ya Maria nihu mlage eemsuie Dilao malhoma esumu kikulho he masame naho ekamsiki na alhu kuu kwato inka kini Lazaro nee mrukhao. 3Kwato Maria ne Mata vekamsugha muo he Yesu, vekamba, “Dilao, msaho kechi umdumushe ni mrukhao.” 4Mira Yesu areko to ekaba, “Ya urukhao teukamgaa, mira uneaija ugiru wa Kiumbi kalo Muinyi wa Kiumbi aowe ugiru kutakhoia ka urukhao.” 5Neri ite Yesu eekuvadumu Mata, Maria ne Lazaro, 6Yesu erekoia ite Lazaro ni mrukhao, tehalie mira ekasusu miaze minu yakuzokho ho eaha. 7Niho ekavaba vahina “Tusoni kahali Yudea!” 8Vahina vekamba, “Mhinya,” “Madamo maghere bi etakhoe Vayahudi vedumue kukuma masahu vakugaa, mira ari udumu kuso kahali are?” 9Yesu ekaba “Ho, madamo a chakako si kela ikado nanu? Kwato, muhe ekudaha hachakako temuru kukuma kisatu kwaite eraaho kutakhoia luatame lwa idi. 10Mira muhe ekudaha naama enekuma kisatu, kwaite za kini tehelo luatame.” 11Yesu erefi kuyo to ekavaba “Msaho kanu Lazaro etei mira ani nneso kuramkaa.” 12Vahina kuu vekamba, “Dilao, kai etei eneu.” 13Vo veelie ite Yesu eekuyoya mburi ya kui luireno, kave ekuyoya mburi ya kigame chakwe Lazaro. 14Niho Yesu ekavabaia neri kuvamatu ite “Lazaro aaga, 15mira nilhamuiwa kwa mburi kaghu ite Lazaro areaga ani seaha are, kalo mumuru kudarishe. Mira iji tusoni he muang'a kuu.” 16Tomasi hu ekusewa Pacha ekavaba vahina vaaro, “Tusoni na nne turega hawe nau!”
Yesu niu uzime uvakaa vegae
17Yesu areahe are ekaheia Lazaro eaha za he mbira maaze mahai. 18Muang'a Betania weaha sina na muang'a wa Yerusalemu, weekuhe uda wa kiromita khai kuhe , 19Vayahudi vakumure veehee he muang'a wakwe Mata ne Maria kuravapu muharegha kwa kugaiwa ni inka kini Lazaro. 20Mata arekoia ite Yesu elitie ekaso kuramdoria, mira Maria u ekafufu ang'a. 21Mata ekamba Yesu, “Dilao, kai wereaha ii, inka gho teseegae” 22Mira nireila ite neri waijiji kira cho unemlhawa Kiumbi, enekuo. 23Yesu ekamba, “Inka kechi eneka kuli he kigame.” 24Mata ekamba, “Nireila ite eneka kuli he kigame madamo yakuukaiwa vahe muaze wa mkhito.” 25Yesu ekamba, “Ani niu ka uzime na kukaa kuli he kigame. Enidarisha ani neri kai enega, enefufu, 26nahu efufu ekunidarisha tekaga neri. Ho, uradarisha ya viome?” 27Mata ekamba, “Dilao, ani niradarisha! Ite ari niu Masia, Muinyi wa Kiumbi, hu Kiumbi eekee muo ite enemsugha.”
Yesu etamzoia Lazaro
28Mata areafi kuyo to, ekaso kumse wau kuu Maria kakera ekamba “Mhinya ereaha ii ekuse.” 29Maria areakoia to ekamangaso sari hodi Yesu ereaha. 30Yesu teenaba kubuu he kijiji cha Betania, mira eereaha wato oto hodi Mata emheie. 31Hu Vayahudi velitie kumtaari Maria, veremuakho ekumangali gahana, vekamliaha. Vebae eekuso he mbira kurazo. 32Maria arehe hodi Yesu eaha ekama mamuro, ekamba, “Dilao, kai wereaha ii, kaka gho tesegae!” 33Yesu areamuakho Maria ekuzo, nahu Vayahudi velitie hawe ne Maria vekuzo, ekadariwa ni vuhuye ekahiri he swaho. 34Yesu ekavalhasu, “Mumkeie le?” Vekamba, “Dilao, lita uakho ho tumkee.” 35Yesu ekazo. 36Vayahudi vekaba, “Wesiani kigi cho eemdumushe Lazaro!” 37Mira vakuwe vekaba, “Ho, ya siu emlhae maila muhe esiakho, kwaakhoni temurue kumtiti Lazaro asiga?”
Yesu etamkaa Lazaro kuli he kigame
38Yesu ekahiri kahali swaho, ekahe he mbira. Ka mbira ne mhanga, yelhatiwe na isahu to hakubuia. 39Yesu ekaba, “Kaani ka isaheru!” Mata ing'inhii kini waka egae, ekamba, “Dilao, alholhoshi kusumu, yaataho miaze mihai kuli akewe he mbira!” 40Yesu ekamba, “Ho, seekubae ite ukudarisha uneaho ugiru wa Kiumbi?” 41Vekalikaa hu isahu. Yesu ekawesia ana he malhareno ekaba, “Nikugimbika Aba kwaite uranikoia. 42Niilie ite uranilakhonha madamo makhabuna mira niyoe to kwa mburi yaya vahe veumae ii kalo vadarishe ite ari niu unisughae.” 43Arefi kuyo to, ekayoisha ekaba, “Lazaro lita ilai gahana!” 44Lazaro eegae ekali gahana, ilai eorowe sanda he masaamu, miharegha,na vubasa kuu ighubikwe. Yesu ekavaba, “Mgeni, mumro aso.”
Vayahudi vedumu kumgaa Yesu
Matayo 26:1-5; Mariko 14:1-2; Luka 22:1-2
45Vayahudi vakumure veeaha hawe ne Maria vareakho mburi jo Yesu ejiboie, vekamdarisha. 46Mira vakuwe vekaso he Mafarisayo vekavabaia hu mburi Yesu eiboie. 47Kwato Madilio va muaresi na Mafarisayo vekasahe he ibaraza igiru la Vayahudi vekalhasuana, “Tusa kimomo? Ya muhe eboi lhaa kumure. 48Kai tukumuro bi aboi to vahe vakabuna venemdarisha, naka udilao wa Varoma unelita kuraioni minda ya Kiumbi na idi kanu.” 49Mira muaro kini muwe ekusewa Kayafa, nee mgiru wa muaresi heka mko, ekavaba, “Kune temuilie kigi neri! 50Temuakho ite ni kikulho muhe muwe aga kwa mburi ya vahe, kuro idi izime liga?” 51U te yoe to kwa kudumu salaghe, mira kwaite bi nee mgiru wa kuaresi heka mko, egue uroto ite Yesu enega kwa mburi ya idi kini . 52Mira sikwamburi yaka idi bi, mira nihawe na vainyi va Kiumbi veparatiwe kira hodi, kalo evagere hodi hawe nakuvaboi vakhwa kigi kiwe. 53Kwato kuli ka muaze vagiru va Vayahudi veekuradaa kwalhi yakumgaa Yesu. 54Kwato Yesu ekaro kudaha hodi Vayahudi vesahea, mira ekahali ata, ekaso hodi sina na he ilangwa liaha he muang'a usewa Efuraimu, Ekazokhodi are hawe na vahina kuu. 55Madamo elha ya Vayahudi isewa Pasaka ireahe sina, vahe vakumure vekaso Yerusalemu kalo vakuke kikulho he miku ya kumuaresi Kiumbi, ka elha isinaba kuhe. 56Ka vahe veesoe Yerusalemu vekakhwa vemdaa Yesu. Varesahe hawe za he lugo lwa minda ya Kiumbi, vekalhasuana,“Muakho kimomo? Chimuruikana tekalite neri he elha.” 57Vagiru va muaresi na Mafarisayo veevaajie vahe ite muhe eilie hodi Yesu eaha, edumuwa evabaie kalo vamuru kumdara.
လက္ရွိေရြးခ်ယ္ထားမွု
Yohana 11: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.