Yohana 10
10
Mzemo mkulho
1Yesu ekavaba, “Nitamubaia kweri, muhe neri muwe esitakhoia he luhige kubuu he minda ya maalu mira ekukutu ana na kubuu, ka ni mgwalo na mzaale. 2Mira ebuu kwa kutahoia he luhige, ka ni mzemo wa maalu. 3Mkilaaru etamlhaia mzemo luhige, maalu nau enekoia kiome cha mzemo, nau etaase kira ialu kwa ilhe kuu, ekuakaeti kuso gahana. 4Mzemo ekuraagu gahana maalu kuu makhabuna, etaakaeia, naka maalu etamliaha, kwaite ereila kiome kuu. 5Ka maalu teemuru kumliaha muhe mgalho, mira enemgugulu kwaite teeilie viome vya vagalho.” 6Yesu eevabaie ka mtotire, mira teveilie ite eekuyoia kiakhoni.
Yesu mzemo mkulho
7Kwato ekavabaia kahali, “Nimubaia kweri ani niu luhige lwa maalu. 8Hu vakhabu venikaeie ni vagwalo na vazaale, naka maalu teevalakhonhe. 9Ani ni luhige, ebuu kutakhoia ani enekombowe, enekhwa enebuu na kuli, kahali eneakho vighu enevidumu. 10Mgwalo elita kalo agwa na agaa na kuoni. Ani nilitie kalo mukhwa na uzime kahali mukhwa nau mkumure. 11Ani ni mzemo mkulho, mzemo mkulho emuru kulakhati uzime kuu kalo maalu kuu asigaawe. 12Mnyamalo, esi mzemo, neri maalu si makuu, ekuakho madie amaeza elitie, etaaro maalu etagugulu, niho madie amaeza etaadara ka maalu na kuaparati. 13U tehiri swaho kuu kwa mburi yaka maalu kwaite u ni muhe ewesia mihaku elhanuwa bi. 14Ani ni mzemo mkulho wa vahe gho. Nirevaila vahe gho, navo vereniila kikulho, 15Sahu kigi Aba eniilie ani nicho ni muilie Aba, ani nigu uzime gho kalo nivakombo vahe gho. 16Kahali nilo maalu mahali esiaha heya minda. Naka nidumua niagere, enekoia kiome gho, naho henekhwa na ifyo iwe na mzemo muwe. 17Aba enidumue kwaite niugu uzime gho kalo niudori kahali. 18Tehelo muhe eniale uzime gho, ani niugu kigi ninedumu salaghe. Nilo umuruisho wa kuugu na kuudori kahali. Ya niu kigi Aba enibae niboi.” 19Kutakhoia ka viome Vayahudi vekatakhoana viome. 20Vakumure veekuraba, “Elo ipepo, vahali vekaba ni mkilalu! Kwakhoni mumlakhonha”? 21Vahali veekuba, “Ya si viome viyowa ni muhe elo ipepo. Ho, ipepo limuru kulha maila ya muhe esiakho?”
Vayahudi vetamlhi Yesu
22Are he idi la Yerusalemu heelo elha ya kuhulha kuike minda ya Kiumbi ikhwa kikulho heu, nee madamo ya kihuho. 23Yesu nau ekakhwa edaha za he lukumbi lwa minda ya kuaresia wakwe Solomoni. 24Vayahudi vekamhuia vekamlhasu, “Unetuke he mitotire sari ami? Kai ari niu Masia, tubaie neri kumatu.” 25Yesu ekavaba, “Namubaia mira temudarisha. Nyamalo nijiboi kwa ugiru wa Aba gho jiraaija ite ani niji. 26Mira kune temudarisha kwaite temu maalu gho. 27Maalu gho erakoia kiome gho, ani nireaila, nau eraniliaha. 28Ani nimuo uzime wa maaze makhabuna, navo tevekaga neri, tehelo muhe enemuru kuniale kuli he miharegha gho. 29Aba gho enioe ka maalu na niu mgiru kutakho vakhabuna, neri tehelo emuru kuyaale kuli miharegha ya Aba gho. 30Ani ne Aba ni kigi kiwe.” 31Vayahudi vekadodoli masaheru kahali kalo vamma, 32mira Yesu ekavaba kahali, “Namuaija nyamalo kumure kuli he Aba. Ninyamalo mina heka imuboi munima masaheru?” 33Vayahudi vekamba, “Tetukuma masaheru kwaite waaboi nyamalo kulho, mira kwa mburi ya kum'olhu Kiumbi! Kwaite u muhe biu mira kuboi ari u Kiumbi.” 34Yesu ekavaba, “He miku kaghu hegondiwe ite Kiumbi ebae, kune muviumbi?” 35Kai hu vesewe kiome cheelitie hevo cheevasee viumbi. Tureila ite magondo ya Kiumbi eyo kweri madamo khabuna. 36Ho mumuru kimomo kuba ite hu elhoijwe ni Aba na kusughawa he idi etam'olhu Kiumbi kwaite eba ite Ani ni Muinyi wa Kiumbi? 37Kai siboi nyamalo ja Aba gho musinidarishe. 38Mira ikukhwa, nirajiboi, hata kai temunidarisha, jidarisheni bi ka nyamalo, kalo muile ite Aba eaha za hagho na ani niaha za hakuu. 39Vekagali kahali kumdara Yesu, mira ekali he miharegha kini. 40Niho Yesu ekaso kahali, bwa wa kanu wa mharaza usewa Yoridani, hodi Yohana ekubatija ata azeto, ekazokho are. 41Vahe vakumure vekaso he Yesu navo veekuba, “Yohana teboie kimako neri kiwe mira viome khabuna vyoeyoe ni vya ya muhe nija kweri.” 42Vahe vakumure veaha to vekamdarishe Yesu.
လက္ရွိေရြးခ်ယ္ထားမွု
Yohana 10: NTMBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Mbugu @The Word for The World International and Mbugu Language translation, 2025. All rights reserved.