Yohana 11
11
Khocha kwa Lazalo
1Aleapwale muntu yomwii lina lakwe Lazalo, nanoyo angile molwile. Omwenee angile khwikhalaa Betania khonaa alevakhwikhala Malia no Malita vilombolakwe. 2Malia oyo amwenee yunaa aleamwetela Mwene makhuta gakhotukelela mo megolo no khomopogosa nyele jakwe, seji mokolwawe Lazalo angile molwile. 3Gechoo viloombo vakwe alevatoma okhombe khwa Yesu khomoweela, “Mwene, molaasi wakhoo yunaa omotogwile a molwile.”
4Yesu panaa aleapata okhombe owoo, apalaa, “Olwile khotopo omowolage, ila olalageela venaa Matuunda a molaala. Ili Mwana wa Matuunda akholiwe khokelela owoo olwile.”
5Ninga venaa Yesu angile khovatogwa Malita no Malia palomwi no Lazalo, 6panaa aleategela kete Lazalo a molwile, aleikhala akhokhonye no khokelelya nsiko jewele. 7Apenee Yesu avawelaa vahemba vakwe, “Khotuuwe Yudea.”
8Vahemba vakwe vamowela, “Molaangi, ituungo ikupe topo lakelaga Vayahudi alevakhopooga khokhowolaga ne mabwe, kho kee khopooga khotuuwa khanke okhoo?”
9Yesu avawelaa, “Mbi lyonse letokhola matuungo ikomi ne gawele? Muntu mbe ageende lyonse khotopo ikumpe kho nguno gopwale welo wa paliwelelo. 10Ila yeyensi yunaa khogendaa otikho alaikumpa kho nguno welo otapoya mokhate yawe.”
11Yesu panaa aleamalya khopaala egoo, aleapala, “Molaasi wisu Lazalo seji agonagaa, ila onenee ndapeta khomolawelya.”
12Vahemba vakwe vamoweela, “Mwene, mbe agonagaa ndoolo, alapona.”
13Yesu angile khopalela ncha ya Lazalo, ila evenee alevakhosiima khogona ndoolo.
14Apenee, Yesu aleavawela patokhola khovaswekha, “Lazalo afwagaa. 15Ila onene nkhotogwaa kho nguno alentapoya panaa Lazalo alekhochaa, ili onywenywe mokhowole khogoomba. Gechoo khopetage khokhayaakwe.”
16Tomasi yunaa alekhwetwaa Ipasa avawelaa vahemba vayakwe, “Nasu khopetage khofwapalomwi no Yesu.”
Yesu amwenee ofufolo no opanga
17Yesu panaa alepikha okhoo ihala la Betania, aleamopikhaa Lazalo aleatulagwaa mwi khabuli kho nsiko jenee. 18Ihala la Betania angile lepwale pepi ne Yelusalemu, otale wa kilomita jetato. 19Vayahudi vinki angile vijaga Betania khovalamocha Malita no Malia kho nguno ya ncha ya mokolwawe Lazalo.
20Malita panaa aleategelaa Yesu iijile, apetaa khomowawola, ila Malia aleasigaa khokhaye. 21Malita amowelaa Yesu, “Mwene, mbe anga owee opwale epa, mokolwaane, anga khotopo afwee. 22Ila manyile ninga seji mbe oloombe chechensi khwa Matuunda, khakhopela.”
23Yesu amowelaa, “Mokolwakhoo khafufokha.”
24Malita amowelaa, “Manyile kete alafufokha ituungo la khofufolwaa vachi isiko la odugo.”
25Yesu amowelaa, “Onene amwenee ofufolo no opanga. Muntu yunaa khongoomba onenee ninga mbe alafwa alaawa no opanga, 26muntu yeyensi yunaa mopanga no khongoomba onene, khwa khapanga khotopo achee. Mbi, khogagoomba ega?”
27Malita amowelaa, “Avyenee Mwene, onene nagombaga kete ogwegwe amwenee Kilisto, Mwana wa Matuunda, yunaa Matuunda aleatolapela kete alamotoma.”
Yesu khomokotelaa Lazalo
28Malita Panaa aleamalya khopaala egoo, ingelaa mokhate no khomweta Malia pampelo, amowelaa aleemwi, “Molaangi apwale epa, khokweta.” 29Malia panaa aleategelaa gechoo, angile anyanyokha waango, amolondaa Yesu. 30Ituungo eloo, Yesu angile akhale khopikha pihala la Betania, ila angile apwale apaponye panaa alevitaanga no Malita. 31Vayahudi vanaa angile vapwale pakhaye epoo khomolamochaa Malia, panaa alevamowona Malia anyanyokha waango khopuma panji alevamoloonda, alevakhosiima ailee khokotela kho khabuli.
32Malia panaa aleapikhaa lwande yenaa aleapwale Yesu, aleatungamaa no khomoweela, “Mwene, mbe anga owee opwale epa, mokolwaane, angakhotopo afwee.”
33Yesu panaa aleamowonaa, Malia khokotaa palomwi ne Vayahudi vanaa aleviija palomwi nanoyo, aleasayaa no mooyo gwakwe gwasaata. 34Yesu avawolyaa, “Mbi mwamozyekhaga kwenii?”
Vamoweela, “Mwene, ijo okuune.”
35Yesu akotaa.
36Apenee Vayahudi vapaala, “Kunagi venaa aleamotogwile Lazalo.”
37Ila vantu vaange vapaala, “Muntu oyo amwene yunaa aleamodigola mtulu oyoo, kho kee aleakhakhowola khomonojaa Lazalo akhafwe?”
Yesu khomofufola Lazalo
38Yesu panaa angile akhale khosayaa no khwitegeela viba momooyo gwakwe, apetaa kho khabuli. Ikhabuli eloo angile ipinga lenaa angile legubikwe ne ibwe pamolyango. 39Yesu avaweela, “Lewochagi ibwee eloo.”
Malita yunaa angile ilombolakwe no Lazalo aleapalaa, “Mwene, seji khotukhaa, kho nguno atite nsiko jenee mpuma panaa aleazyekhwa.”
40Yesu amowelaa “Mbi, alenkhakowela kete mbe olagomba olawona olaala wa Matuunda?”
41Gechoo alevalewochaa ibwee elo. Apenee Yesu aleakunaa khochanya khwa Matuunda no khopaala, “Nkokosongela Daada yaane kho nguno ogwegwee khontegelelya. 42Manyile kete khontegelelaja nsiko jensi, ila nkhopaala geeke kho nguno ya vantu vanaa vimelelaga epa, ila nkopooga vandye khogoomba kete ogwegwe amwenee yunaa alewantomaga.”
43Yesu panaa aleamalya khopaala egoo, aleapalaa kho lolii lokolo, “Lazalo, wiije okhono panji.” 44Lazalo yunaa aleafwagaa aleapuma panji ya ikhabuli, okho mekhono ne megolo jakwe jitungilwe shanda. Osho wakwe alewapilingagwaa ketambala.
Yesu avawelaa, “Motungulagi no momoleke apete.”
Vayahudi vakhopooga khomowolaga Yesu
Mateo 26:1-5; Maluko 14:1,2; Luka 22:1,2
45Vayahudi vinki vanaa angile vapwale palomwi no Malia, panaa alevawona mpola je Yesu aleanogaja, alevamogoomba. 46Ila Vayahudi vaange alevapeta khwa Mafalisayo khovaweela ganaa aleaganogaja Yesu. 47Gechoo valaala va vapumya matambekho ne Mafalisayo aleviitanga iluungo la ivanza ikolo la Vayahudi, viwolya.
“Seji khonojee kee? Muntu khonoja lomekho nyinki. 48Mbe khomoleke endelele khonojaa lomekho eje, vantu vensi valamogoomba, apenee valaala va Loma valiija khononanga Nyoomba ya Matuunda ne nse yisu!”
49Ila yomwi wa valaala vawe yunaa angile khwetwaa Kayafa, yunaa angile mopumya matambekho molaala wa Matuunda kho mwakha ogoo, avawelaa, “Onywenywe mokhamanya kento chechensi! 50Mbi mokhamanya kete amba visoga mbe muntu yomwi afwee kho nguno ya vantu vinki, khokela nse yensi inonwee?” 51Kayafa aleakhapala gechoo kho masiimo gakwe mwenee. Ila kho nguno angile mopumya matambekho molaala kho mwakha ogoo, aleamanyile kete Yesu alafwaa kho nguno ya nse yakwe, 52ila nkha kho nguno ya nse eye topo, ila kho nguno ya khovakhongan'ya vana va Matuunda vanaa vasambalaga okho no okhoo, ili khovanoja vawe palomwi.
53Gechoo, mpuma nsiko eyoo Vayahudi alevendelela khopooga njela ya khomowolaga Yesu. 54Gechoo, Yesu angile akhagenda khanke pawelo pakhate ya Vayahudi. Aleapuma epoo no khopeta pepi ne pipalangwa, pihala lenaa lekwetwa Efulaimu ikhala okhoo palomwi ne vahemba vakwe. 55Wenga wa Vayahudi wa pasakha angile watelelaga, vantu vinki alevapeta Yelusalemu velopiwee ili vanojwe khogoombwa kho njaanga ja khomokumbekha Matuunda panaa Pasakha aleikhale khopikha. 56Evoo vantu vanaa angile vapeta Yelusalemu alevandya khomopooga Yesu. Nanevo panaa aleveema kho lwande yenaa ipwale mokhate ya Nyoomba ya Matuunda, vawaa vakhwiwolya, “Mbi onywenywe mokhowona mbi? Mbi Yesu khotopo iije kho wenga owo?” 57Valaala va Vapumya matambekho va Matuunda ne Mafalisayo, alevawalagelelya vantu, muntu yeyensi yunaa amanyile khonaa Yesu apwale avawele ili vakhowole khomogweela.
လက္ရွိေရြးခ်ယ္ထားမွု
Yohana 11: NTKIBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Kimbu @The Word for The World International and Kimbu Language translation, 2025. All rights reserved.