Matiu 4
4
Itsra Yeso
1Imba, Iyu Izhi a ngizhi Yeso hi ri tsutsu ji no meme nji no tsra-u 2Kugon riwa a vu la iima vi senza richu senza, iyon kana ti-u. 3Imba nji ri tsra nji-a kaye ran ye fe Yeso ran tre riwu ri <<Inde wu he vren Izhi wu ka kɨma tita nyi ti ri.>>
4Yeso ka tre riwu ri, << A he rimi nga ri, a ran he ri, <iri nkankshe nye nji ri nawo ran, ama ri wɨlo tre riwa a zhu ri nyu Izhi ye.>>>
5Imba memenji-a ka ban wu hi rimi nchon tsitsri gbu ran ka-u dzi ri bubu riwa a dzen rimi tra bre Izhi, 6ran tre wu ri,<<Inde wuhe vren Izhi, dza ku ri meme, ki to a he rimi mbe Izhi,
<Izhi ri la miri wandu wan ri <
no wa rau wuran kɨbu dza ri tita ran.>>>
7Yeso ka nyɨme ran tre ri wu ri<< Wa ngan ri mbe Izhi ngawen ri, <Ran tsra Bachi Izhi wen ran.>>
8Nganga, memenji-a ka bru ban Yeso hi ri mgblu ri zen ran tsro-u mgbumgblume ri bubu wan ran tre riwu. 9memenji Ka tre ri,<< Gbugbu kyawa wanyi me kawa no-u, inde wu kɨbu mgbazhu wuri gbresan won.>>
10Yeso ka tre riwu ri, <<Tsirinkon memenji! Imbe Izhi tre ri, <Kibu Mgbazhu ri Izhi wen wawu ri kankshiwan nye ti ndu ri wu!>>>
11Imba memenji-a ka kawu don, nga mirindu Izhi wa ka ye wari ti ndu ri riwu.
Yeso a Gbuchi Ndu wan ri Galili
(Mark 1.14,15; Luke 4.14,15)
12Riwa Yeso a wo ri Yohana he rimi tra tren nji ka bru ye ri gbu Galili. 13Riwa a ka Nazara don, ran ka son ri Kapanahun, riwa a he kusan nchon ne ri meme Zabulum mba Naftali. 14Riwa ari tsra ri tre kya riwa wa tre hu nyu Ishaya nji ri la tre Izhi,
15<<Meme Zabulum nga meme Naftali,
ri nkon riwa a hi ne riwa a he ri gran ne Yodan, Galili riwa wa ran kpa Izhi ran!
16Wa nji wawa wa rimi bu
wa ka to nchon kpantsu.
Ritu wawa waki ri meme-a ri iyu kuu
ikpan tsu ka kpan riwa.>>
17Ritu mba nye Yeso ka gra ri bla tre Izhi: <<Ka meme ti chuwo, ritu kpanchison ri shu ye hwire!>>
Yeso a Yo wa Vu Lambe ti Nza
(Mark 1.16-20; Luke 5.1-11)
18Riwa Yeso a ran zren kusan ne ri Galili, a to nji wari nji hari riwa wa miri vayi, Sima riwa wa ran yowu ri Bitrus nga vayi wan Andarawus, wa ta kali mba ranyo rimi ne, don wa he wa vu lambe. 19Yeso ka tre wa ri,<<Ye hu wen, me tsro yi bibi riwa bi vu nji.>> 20Imba waka ka kali mba chuwo wari hu.
21Yeso a ran hi, a to nji hari miri vayi ngamba Yakubu ivren Zabadi nga vayi wan Yahaya. Wa he ri nvuima ri tinba Zabadi, wa ran milan kali ri vu lambe ran ti. Yeso ka yo wa, 22wa ka miren hu wari ka nvuima mba nga timba don.
Yeso a Tsro ran Den wa Lilo
(Luke 6.17-19)
23Yeso a gra gbu Galili ran tsro wa rimi tra Izhi mba, a ran dɨbu tre dindi ri tra bre riwa ka ran den ko lilo bibitan riwa wana lo nji. 24Itre wan ka kagbamu rimi gbu suriya, imba nji waka ngɨzhi wa lilo kan kan ye riwu, wawa wana to ya bran bran, wawa meme nji wa gra riwa, wawa wana ku kpinkpi nga wawa wa ri lilo ri klu kpa, ka den wa chuwo. 25Ikpanji waka hu hi ri meme Galili ri gbu wuru nga Urushalilma imba Yudiya hi ri gran nchon ne Urdu.
လက္ရွိေရြးခ်ယ္ထားမွု
Matiu 4: BUU
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The word for the World International and The word for the World Nigeria