Matayo 7
7
Mawulanicho ga kukanila kuvahiga vangi
Luka 6.37,38,41,42
1Baho, Yesu akalongela, “Mubihile kumlongela munu yeyonda, veve munu muwofu. Ngita peugita ndeni, Nguluvi daakulongela, veve ndi munu muwofu,” 2kwakuva pekumlongela munu yungi kuva muwofu nde ndeni ndeni daulongelwa kuva veve ndi muwofu, kwa lulagilicho lulula lyemutumila kwa vangi nde lulula dalutumila kwa nyenye ndeni. 3Wuli, ukilola kiyeyela kyekigehe muliho lya mweyago, ila se wilola liyeyela lyeligehe muliho lyako? 4Uwesa wuli kumlongela lukolo vako, “Lukolo chinde ndikuheche kiyeyele muliho lyako. Chipindi veve ugehe na liyeyele muliho lyako? 5Veve nde mfyangu! Heche tandi kiyeyele kyekigehe mulio lyako, baho daulola unofu na kuhecha liyeyele lye ligehe muliho lya lukolo vako.
6“Mubihile kuvagavila mibuwa finu fyefivikilwe kwakuva lya Nguluvi vabihile kuseduka na kuvaluma na kuvalemacha nyenye, vala mubihile kuvagavila vangubi finu fyenu finofu vabihile kuchivatila.
Musuke na musake na mkong'ole mlyangilo
Luka 11.9-13
7“Msuke kwa Nguluvi, nyenye damugavilwa, musake nyenye damwipata, mkong'ole mlyangilo na nyenye damwidinduliwa. 8Kwakuva kila munu yeisuka igavilwa na yeisaka ipata na yeikong'ola mlyangilo idundiliwa. 9Wuli, kugehe na yeyonda pagati lyenu mwana vake agite kumsuka libumunda, dakumgavila liganga? 10Wuli, akimsuka somba dakumgavila liyoka? 11Ndeni ata ngita nyenye ndi vawofu, mwichela kuvagavila vana venu finu finofu, ndakyene Daada venu va kuluhano igita hilo, dakuvagavila finu finofu vala vevakumsuka.
12“Gyonda gyemwikela vanu vavagitile nyenye, muvagitile ndeni vavene. Kwakuva ago nde malagilicho ga Nguluvi geamgavile Musa na mawulanichi gya vavichi va Nguluvi.
Ng'asi nyehe na ng'asi ngomi
Luka 13.24
13“Mwingile kuchumbila mlyangilo mdebe. Kwakuva ng'asi yeilongocha mukufuwa ndi ngomi na mlyangilo va kwingilila mumo nde mkomi, vevihelela ng'asi ilyo nde volofu. 14Ila ng'asi yeilongocha muuwumi nde nyehe na mlyangilo va kwingilila ukoya nde nyehe na vanu vakefu davayiwona ng'asi yiyo.
Libiki na manunu gyake
Luka 6.43-44
15“Muyiyepe na vavichi va udesi. Vene vikwacha kwa nyenye kuno viwonekana ngita kondolo kwa kwivala, ila kwa mugati ndi mikeve vang'ali. 16Damukuvachela kwa manunu gyao ago nde magito gyao. Wuli, vanu viyawa misabibu palibiki ga mihomi awu nunu lya tini pamisamponda? 17Suwe, libiki linofu ubaba manunu ganofu, ila libiki liwofu libaba manunu seganofu. 18Libiki linofu selivecha kubaba manunu mawofu na libiki liwofu seliwesa kubaba manunu manofu. 19Kila libiki se libaba manunu ganofu hudumulwa na kutagwa muliyoto. 20Ndena, damukuvachela kwa magito gyao.
Sendikuvachela nyenye
Luka 13.25-27
21“Se kila munu yeakunilongela, Mtwa, Mtwa, Daikwingila muung'achale va kuluhano kwa Nguluvi, ila daingila ndi yula yeigita gyeikela Daada vangu yeagehe kuluhano. 22Mukigono yila volofu davakunilongela, ‘Mtwa, Mtwa! Kwa litawa lyako tukalandule njowo chako na kwa litawa lyako tukahecha mahoka na kugita umanyitu wolofu.’ 23Baho, ndikuvalongela, ‘Ndakyene sendikuvachela nyenye, muhege baha, nyenye vagita mawofu.’
Vachengi kaya vavili
Luka 6.47-49
24“Suwe, kila munu yeakugapulika njowo changu na kugagita, iwana na munu munya luhala, yeachengile kaye lyake paliganga. 25Ndonya ikatonya na migoka ikamemile na lukala lukomi lukapugile na kuitova kaye ilyo. Ila seikaguwe kwakuva ikachengwile paliganga.
26“Ila yeyonda yeipulika njowo changu, ila seakugagita, iwana na munu mpufi yeachengile kaye lyake pamuhanga. 27Ndonya ikatonya, migoka ikamemile na lukala lukomi ukapugile na kutova kaya ilyo, nalyo ikaguwa buuu.”
Umwimike va Yesu
28Yesu peamalile kulonga njowo icho, lipinga lya vanu likadudwive na mawulanichi gyake. 29Seakali ngita vawulanicha vawo va malagilicho, ila akawulaniche kwa umwimike.
လက္ရွိေရြးခ်ယ္ထားမွု
Matayo 7: NTBnBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Benamanga @The Word for The World International and Benamanga Language translation, 2025. All rights reserved.