Matayo 8
8
Yesu akumnanicha munu yeagehe na lukalavilo
Maliko 1.40-45; Luka 5.12-16
1Yesu peikile pakidunda, mipinga gyolofu gya vanu gakamufatile. 2Suwe, akachile munu yumwi mwene lukalavilo na akamufugamile na akalongile, “Mtwa, ngita ukela, vawesa kuning'alicha!” 3Yesu akagonjolola liwoko, akambyalisa na kulonga, “Ndikela! Ung'alichwe.” Baho yula munu akananile lukalavilo vake. 4Pambele, Yesu akamulongiye, “Ubihile kumlongela munu yeyonda, ila helele uyiwonese kwa mtekechi na kuhecha usembe ngita pealagiliche Musa, uveche uswida kuva unanile.”
Kudikila kwa mkomi va vapuga va ku Loma
Luka 7.1-10
5Yesu peakali ikwingila mwani va Kapelianaumu, mpuga yumwi akamuheleliye akamsukile, 6akalongile, “Mtwa, mnyegendwa vangu avasile kukaye, mtamwa va lugaso na ivawa hilo.”
7Yesu akamuhigile, “Ndikwacha kumnanicha.” 8Kilongochi va vapuga uyo akamulongiye, “Mtwa, nene sending'ang'wa veve kwingila mukaye lyangu. Ila longe luchowo hela na mnyegendwa vangu dainana. 9Kwakuva ata nene ndi munu ndigehe panyi lya umwimike va vangi, ndinavyo vapuga vangi vevagehe panyi lya umwimike vangu. Ndikumlongela yumwi, ‘Helele na ihelela na yungi.’ ‘Wache!’ Na ikwacha na ndikimlongela mnyigendwa vangu, ‘Gite kinu iki’ mwene igita.”
10Yesu peapulike njowo icho, akadudwive, akavalongiye vanu vevakali vakumufuata, “Ndakyene, sendimwonile munu yeyonda mu Isilaeli yeagehe na ludikilo ngita iyi. 11Suwe, ndikuvalongela kuva vanu volofu vikwacha kuhuma pelihumila lichuwa na pelidibala lichuwa, navo vakwikala pamwi na Ibulahimu na Isaka na Yakobo muung'achale va kuluhano kwa Nguluvi. 12Ila Vaisilaeli volofu vevang'ang'ilwe kuvecha muung'achale avo davatagwa kwivala mukisi, ukoya davivemba na kusigina mino.” 13Kangi Yesu akamlongiye yula kilongochi va vapuga va Loma, “Helele kukaye na yiveche ngita peudikiye.” Mnyigendwa vake akananile baho baho.
Yesu akuvananicha vanu volofu
Maliko 1.29-34; Luka 4.38-41
14Yesu peakafikile pakaye lya Peteli, akamuwena mganafu va Peteli avasile paulili na ivawa hilo. 15Baho Yesu akambyalisa yula maye liwoko na akananile, akaimile na akavanga kuvatelekela.
16Peyifikile palumiye, vakamsindikiye Yesu vanu volofu vevakali vitamika na lihoka, nave kwa kulonga luchowo hela, akavadagile mahoka. Akavananiche kangi vanu vonda vevali vatamwa. 17Akagitile ndena neke gala gealongile mvichi Isaya gatimile.
“Yumwene anyamuwe uvawa vetu,
akategule matamwa gyetu.”
Veving'ang'wa kuvecha vachulila va Yesu
Luka 9.57-62
18Yesu pealiwene lipinga lya vanu limchungutile, akavalongile vachulila vake vahagame kumwambo lya lihiva. 19Muwulanichi yumwi va lulagilicho akamweleliye, akamlongile, “Muwulanichi nene ndikwacha kokonda peuhelela.” 20Yesu akamhigile, “Vakeve vagehe na manga na fidege vana fyaso, ila Mwana va Munu ihela pono pakutulula.”
21Kangi munu yungi mugati lya vachulila vake akamlongile, “Mtwa, nileke tandi ndihelele ndikamsile daada vangu.” 22Ila Yesu akamhigile, “Wache! Uvaleke vanu vafuwe vavasile vafuwe vawo.”
Yesu akulongela lukala uleke kupuga
Maliko 4.35-41; Luka 8.22-25
23Baho, Yesu akakang'ie muwato na vachulila vake vakahelela pamwi na mwene. 24Pevakali vihehelela, bahobaho likapugile lukala mulihiva na madaba gakavangile kudibacha wato. Ila Yesu akali mutulo. 25Vachulila vake vakamuheleliye, vakamulamusa vakilonga, “Utulowole Mtwa twifuwa!”
26Yesu akavalongela, “Nyenye vanu vemubihila kudikila, wuli mwikogopa?” Suwe akaimile akaukabusa lukala na lihiva likali kwihela lukala kangi. 27Vachulila vake vakadudwiva, vakalonga, “Uyu munu ani? Mbaka lukala na inyanza vikumpulikicha!”
Yesu akuvananicha vanu vavili vene mahoka
Maliko 5.1-20; Luka 8.26-39
28Yesu akafikile muinyi lya Vagadala, kumwambo lya lihiva, ukoya akatang'anile na vanu vavili vevakali na mahoka vevahumile kumgunda va Nguluvi. Vanu avo vakali vakuwahogofecha hilo vanu, kukali kwihela munu yeakagelile kuchumba ng'asi ilyo. 29Navo vakavanga kubwata, “Wisaka liki kwa nefwe, veve mwana va Nguluvi? Wuli, wachile kutuguda chipindi chikali kwacha?”
30Pepi na pono baha pakali na vagubi volofu vakuliya. 31Suwe, mahoka vakamusukile Yesu, “Ngita wikela kutuhecha, suwe, utulongele tukavaingile vangubi vala.”
32Yesu akavalongile, “Muhelele” Bahobaho, vakavahega vanu avo vakavaingila vala vangubi. Lipinga lyonda lya vangubi likaikile paligema likomi, likadibala mulihiva, vangubi vonda vakafuwe mumalenga.
33Ila vadima vangubi vakanyilile, vakahelela kumwani. Ukoya vakalongile vanu njowo chonda chevawonile kwa vala vanu vevakali na mahoka. 34Suwe, vanu vonda va mwani wula vakahega vaka muheleliye Yesu, pevamwene vakamlongiye ahage muinyi lyawo.
လက္ရွိေရြးခ်ယ္ထားမွု
Matayo 8: NTBnBL2025
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Benamanga @The Word for The World International and Benamanga Language translation, 2025. All rights reserved.