Matiós 4
4
Idɔ́liga gá Yésuse
(Mál 1.12-13; Lúk 4.1-13)
1Gileénde igíéndenye gɔg Yésuse gá guɛ́d neéneg agá uhambɛ gá gueleé abɛlɛ́bɛl wɔnɔsɔ́gsɔ́g yɔ́ hɔ́. 2Uwagíga hɔ́ mɔɔ́sɛ edín áhandɛ na medúg edín áhandɛ ta gunyá buand. Nsan iyanúmɛ́d yɔ́. 3Abɛlɛ́bɛl uwakilɛn yɔ́ gɔg, úmuanyɛ gég áneé: «Mmába anyɛ Muɔ́n wa Uhaluá dóŋínyé bugaga áneé adányɛ ɔyɔ yaáyɛ bilɛ́d.» 4Yésuse uwondinye yɔ́ áneé: «Mɔndɔ udiɔnɔ́sɔ́dɔn pɛ́ŋ uguá gunyá gɔgaá, na nugálɔ gidigid unúhámaninaá uguá niíd niá Uhaluá.» 5Abɛlɛ́bɛl uwɛɛ́d neéneg agá gidányɛdányɛ giá tísɔna, uwebúlúgie yɔ́ uguá ndogodoódie ya idúl. 6Úmuanyɛ gég áneé: «Mmába anyɛ Muɔ́n wa Uhaluá bíníhɛ́n anaguá eguísi gá giagiá, búnyɛ ubúɔ́ŋɔ́n áneé: “Wanáhuá bilúna bugaga gáhɔ gá busió áneé bísamban uguɔ́b guá imbɔ́g gá gueleé ɔdibígɔ́d uguá nidányɛ.”» 7Yésuse uwondinye yɔ́ áneé: «Búnyɛ ubúɔ́ŋɔ́n súsɔ́n áneé adiág Ɔgúná Uhaluá wahɔ uguá idɔ́liga.» 8Abɛlɛ́bɛl uwanduguɛ́d neéneg agá giandá giá ɔŋuɛnyɛ, uwedíye yɔ́ eguíli ya guísi gidigid na nigúmi niá yɔ́. 9Uwɔyidɛn yɔ́ áneé: «Ɔ́mɔ́mbɔmbiginɛn nudúg ond embúlúgenye ŋŋuhuá eguíli ayagányɛ gidigid.» 10Yésuse uwɔyidɛn yɔ́ gɔg áneé: «Ŋŋídɛ́n ugúnó, Sátan! Gá giagiá búnyɛ ubúɔ́ŋɔ́n áneé pɛ́ŋ Ɔgúná Uhaluá omoómi ógódionu áneé ebúlúgenye, úmuanyɛ omoómi ógódionu áneé adúmába.» 11Abɛlɛ́bɛl uwanihɛn gɔg Yésuse, bilúna ibíákilɛn yɔ́ ibíéŋin yɔ́ buand buá nyá.
Buóli buá Yésuse uguá gibéyi giá guísi giá Galilé
(Mál 1.14-15; Lúk 4.14-15)
12Yésuse umɔɔ́mɔ́b áneé bémégimbin Sáŋa gá nɔh yɔ́ uguá giansɛ giá mbíne, uwɛɛ́d uguá gibéyi giá guísi giá Galilé. 13Uwoólígie Nasalɛ́d gá guɛ́d Kafalnawúm uguá buáyɛ buá máŋ, uguá gibéyi giá guísi giá Sabulɔ́ŋ na Neftalí. 14Búmabá gá hónye guɔyɛd guá ebunebúné Esayí ugúmabá áneé:
15«Gibéyi giá guísi giá Sabulɔ́ŋ, gibéyi giá guísi giá Neftalí,
gibala igídaninaá uguá máŋ, gidɔŋ igínya uguélém guá Yuldɛ́ŋ na maán má Galilé!
16Buán ubúábá uguá mbíne, búán gise, abábá uguá mbíne ya nigué, gise gíébíénígínyé bɔ́.»
17Gugɔ́lɛ́n uguá ginɛŋ igíganyɛ, Yésuse uwagɔns gusesenye Ginɔ́g giá Nsɔ́m, wɔya áneé: «Ánaá núbídun, Niguili niá gumɔn níganyɛ mɔdɔg.»
Ɔdɔ́ŋína huá medenyi má busió
(Mál 1.16-20; Lúk 5.1-11)
18Yésuse umaágándá uguá buáyɛ buá máŋ, uwaán beliméen báandɛ, Símune uyɔɔ́ bɔ́dɔ́ŋɔnaá áneé Piéle na gisɔ́nd giég Andlé, bɔ́nɔhɔn buoli uguá máŋ, bámabá bológi. 19Yésuse uwɔyidɛn bɔ́ áneé: «Mbínídínénu, ŋŋenuéye bológibandɔ.» 20Hɔ́nɔhɔ́, abánihɛn buoli buɔ́b agányɛ gá binidin yɔ́. 21Umaámándakɛl, uwaán baán bá Sebedé báandɛ, na Sák na Sáŋa na síe wɔb uguɔ́b guá ŋŋumba, bógódonye buoli buɔ́b. Uwɔdɔ́ŋɛ́ɛn bɔ́. 22Hɔ́nɔhɔ́, abánihɛn na ŋŋumba na síe wɔb ebébinidin yɔ́.
Na Yésuse na giíŋ
(Mál 1.39; Lúk 4.44; 6.17-18)
23Egélém, Yésuse uwɛɛ́d gá guanda uguá gibéyi giá guísi giá Galilé gidigid, uhuínyihuinye uguɔ́b guá bigúl, usesenye Ginɔ́g giá Nsɔ́m giá Niguili niá gumɔn. Woóndúgonye bióŋi na búnyɛ mɔgɔn gidigid. 24Nigúmi niég iníéneg uguá gibéyi giá guísi giá Silí gidigid, bólonin yɔ́ na bandɔ abámabá uguá giɔ́bíga giá mɔgɔn, abámabá uguá gigimbine giá abɛlɛ́bɛl, bandɔ abánúmanɔ́ iŋánd na biŋándúnyá, woóndúgonye bɔ́. 25Giod giá bandɔ guonoólónín uguá gibéyi giá guísi giá Galilé na Dekapól#4.25 Gibéyi giá guísi igígódionu bɔtísɔna báad., Yelusalɛ́m, na gibéyi giá guísi giá Yudé na nagɔ́n unó wa Yuldɛ́ŋ, gíɛ́d gíbinen yɔ́.
လက္ရွိေရြးခ်ယ္ထားမွု
Matiós 4: EKM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ