Matiós 3
3
Gusesenye guá Sáŋa Eyumínyibandɔ
(Mál 1.2-6; Lúk 3.1-6; Sáŋ 1.19-23)
1Uguá mɔɔ́sɛ amagányɛ, Sáŋa Eyumínyibandɔ umabá agá uhambɛ huá gibéyi giá guísi giá Yudé, usesenye Ginɔ́g giá Nsɔ́m. 2Umabá wɔyɔn bandɔ áneé: «Núgényénénu bilɔŋ gá giagiá Niguili niá gumɔn níganyɛ mɔdɔg.» 3Búnyɛ gég ebunebúné Esayí úmɔyá áneé: «Ugelu húáguánsan agá uhambɛ húɔya áneé: “Ánaá núhine ŋŋil siá Ɔgúná, nuganuna bibala.”» 4Sáŋa umabíláŋá na gisɔn giá biɔyá biá bunyam ubuɔ́ bɔ́dɔ́ŋɔnaá áneé samó na kandá wa gimpɔ uguá nidál, umabá ubíóye na ihógé na buɔ́kɛ buá mpɔ́m. 5Na bandɔ bá Yelusalɛ́m naá bá gibéyi giá guísi giá Yudé naá bá buáyɛ buá usaá huá Yuldɛ́ŋ obólónin yɔ́, 6bábíbala bilɔga biɔ́b, uyumenye bɔ́ uguá mimbi má Yuldɛ́ŋ.
Ɔdɔ́ŋína huá Sáŋa gá bídun
(Lúk 3.7-9)
7Sáŋa umaámáan áneé giod giá bafalisiɛ́ŋ na basaduseyɛ́ŋ gímoólon gá bíyumenye, uwɔyidɛn giɛ́ áneé: «Baán bá mpɛ́nyɛ, ányá uweénúdíyé gubínɔhɛn ilúnd ihíóloneé? 8Ánaá núhúme gɔg bibɔg ibídíyenyeé áneé nuébídún. 9“Nubídédínye gá guɔya áneé Áblahám únyaá síe wanɔ.” Yɔɔ́núɔyɔn buɔ́ áneé ta adányɛ ɔyɔɔ́ núbíyiganaá ɔyɔ, Uhaluá unyɛ wa guéye yɔ́ baán bá Áblahám. 10Ta nɔ́ gɔg yaáh híganyɛ mɔdɔg gá súmba iŋaŋ siá madɛ́. Budɛ́ gidigid ubúdiéhúme binɔ́g biá bibɔg bógódi áneé básɔ́mb buɔ́ bɔ́nɔh buɔ́ agá yoógi.»
Giyuminye giá mimbi na giá Gileénde
(Mál 1.7-8; Lúk 3.15-18; Sáŋ 1.24-28)
11Yaŋuá Sáŋa yeénúyumenye na mimbi gá gueleé nubídun, gɔgaá uwoóloneé uguámɛ guá gélém unyɛ na buŋaŋa gundɔ́mb yaŋuá, ndiánigimanan ta na sulun nuóli nuég nuá gibɔ́gɔ́d, úmuanyɛ wenénúyumenye na Budányɛ buá Gileénde na yoógi. 12Ugódi gifife agá ɔmbɔ́g gá fife belée, ubídígan binɔ́g biá nsám agá nunsasɔ, bihún udúme agá yoógi ihídiéhuén.
Giyuminye giá Yésuse
(Mál 1.9-11; Lúk 3.21-22; Sáŋ 1.29-34)
13Yésuse uwonoólín uguá gibéyi giá guísi giá Galilé, uwesieg agá usaá huá Yuldɛ́ŋ agá hɔɔ́m agaá Sáŋa eyumínyibandɔ úmabá uyumenyinye, gá gueleé uyuminye yɔ́ súsɔ́n. 14Sáŋa uwen, úmuanyɛ gég áneé: «Yaŋuá mbaŋanɔ́ áneé aŋuá enyuminye aŋuá ondoŋólín a?» 15Gɔgaá, Yésuse uwondinye yɔ́ áneé: «Alá buóli buáhɔ dabdab, anagányɛ búnigimanaá áneé buá gindényé búbíhónye.» Sáŋa uweyuminye yɔ́ gɔg. 16Umeénébíyuminye, uwahám uguá mimbi. Gumɔn ugúébíbun, uwaán Gileénde giá Uhaluá gususɛn yɔ́ bilɔŋ bímomi hana mbɛŋ ya nsɔŋ mbúlúa. 17Ugelu uhúónoólín ugumɔn húɔya áneé: «Uyɔ únyaá Muɔ́n wamɛ wa ɔdɛ́m, umuányɛ búmaŋal beseé áneé yeyid.»
လက္ရွိေရြးခ်ယ္ထားမွု
Matiós 3: EKM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ