oMatiyu 21
21
Oyesu go Ojerusele
(oMak 11.1-11; oLuka 19.28-40; Oyohana 12.12-19)
1Ishini Oyesu kpa awogboso fo ogya ko Obetafiji ni yo pee kpo Ojerusele ni, ebe ke Efu ko Ozetu ni, Oyesu ta awogboso epa oleho, 2kweyi ka da awa mo, <<Ala go ogya ni yo ohobu kala ni. Ogoga kala, ala bamo odagyi kpo oyi ko odagyi gbogbo. Ala yuwa yi shini ala byuwa wa dami. 3Owoni ashe da ala oka, ala ka danu kamo, <Adole pini ya yimu la.> Aba kwikye anu anana mani.>> 4Omani gbodagye shini oza ni inobane kani na gya mo, 5<<Ala kada ayi ko Osiyona mo, <Ala mo ose kala yawa oma! Owine ko otu mene. Oyawa ikweyi ko odagyi, ikweyi ko oyi ko odagyi pini oya wa la.>> 6Awogboso epa ni ga yo oza ni Oyesu ka dawa ni. 7Aga byo odagyi oni kpo oyi ko odagyi wa, ayo oshiye wa ta ikweyi ko odagyi do Oyesu. 8Ase lewa to oshiye wa ikweyi ko owe, ase ashishini kye efu shi kweyi ko owe do Oyesu. 9Ewa ni bo ohobu nu kpa awase ni bi itikpi nu ni sheha kweyi ba mo, <<Shaniye, Shaniye, Oyi ko Odawuda! Otunehe yo kpase ni yawa ipu kiye ka Adole ni! Sho Owuso iye!>> 10Ishini Oyesu go Ojerusele ni, kpiri ko ogya ja, aba doka mo, <<Omani ki wa anoho?>> 11Ewa ka asuse ni ba gboso ni kamo, <<Omani wo Oyesu la, inobane bwo Onazareti ko Ogalili.>>
Oyesu go ole ko Owuso
(oMak 11.15-19; oLuka 19.45-48; Oyohana 2.13-22)
12Oyesu gipu ko Ole ko Owuso, ga ta ase ba yi ipishi kweyi onuwenya. Oga so oka ka awo pyi ikwiri kpa aka awo tora ko otitiribi abo shonu. 13Oka dawa mo, <<Otota ipu ko okpa mo, <Aba yo ole hin ogwu mo ole ko tinarigwu.> Ala ke yo pya wo ole ka awowi. 14Awo pwiyi kpa awo pyefu-agye we ebe ko Oyesu ipu ko Ole ko Owuso, odawo gege ki kpiye wa. 15Ni awoteyi ka awosapa kpa awofono moza ki gbashi ni Oyesu yani, ka ayi leke ni bipu kole ko Owuso ni sheha kweyi bamo, <<Ahan sho Oyi ko Odawuda iye,>> awoteyi ke kyanya kpo oza ni gbodagye ni. 16Ado Oyesu oka mo, <<Opwo oza ni awa mani ba ka ni?>> Oyesu kyogwu mo, <<Ala mo oza mani ebibye ipu ko kpa lo? <Bwo okwunu ka ayi leke kpa ayi meme pini iye shosha wo ya bose la.>>> 17Bwe ebeni oshu wa bita kweyi bose go Obetani kweyi ga kya.
Oyesu te Efu ko Odegyo Igbe
(oMak 11.12-14,20-24)
18Ni ebe nya ni Oyesu kwikye ya go Ojerusele kweyi emye ya ngmo. 19Ome efu ko ofig okoka ko owe kweyi oga ko ga wo ogwogwa nu, oke ga te efu kin la. Ebeni oka de efu mo, <<Oya gwa ke lo!>> Ebebeni efu oni ngmongmo. 20Ni awogboso mo aza ni gbodagye kpe efu ko ofig ni igbashi yuwa kwu. Ado oka mo, <<Olela ni efu ko ofig gekwu mani?>> 21Oyesu kyogwu mo, <<Nyya kadala okwokwoshi, owoni ala kyogwu kweyi gbo gbawashu lo, ala ba gege yayo oza ni sha ke efu ko ofig mani. Ala ba gege ba kade efu mo, <Shu shini ogbo gipu ki ishu,> Kweyi oya olemani byoni ala ka ni. 22Owoni ala gbo otuse, oza ni ala ba ebe ko Owuso kpiri ala ba pye.
Oka Doda Ikweyi ko Oshu ko Oyesu
(oMak 11.27-33; oLuka 20.1-8)
23Ishini Oyesu kwikye go ole ko Owuso ni, oyipu ko oza ya fu kweyi awoteyi ka awosapa kpa awanyakwase we ebe nu wa do oka mo, <<Kpo oshu wonya ni oya yo oko mani? Anoho dawo oshu mani?>> 24Oyesu kyogwu mo, <<Ami ki ya da ala oka oye owoni ala ka dami nyya kadala kpo oshu wonya ni nyyaya awo oza mani. 25Ebenya ni oshu ko Oyohana ni yayo obatisma ni bwanu, bwi iso la kwe ebe ka asuse la?>>
Ebeni akwotu ko tawashu kpi iyiwa mo, <<Owoni aha kamo obwebe ko Owuso la, oya kada aha mo, <Ojiya ni ala tela ko kyogwu kpanu lo?> 26Owoni aha ke kamo obwebe ka asuse la, aba yoshi ase ba taha akyo koni akyogwu mo Oyohana wi inobane ni.>> 27Mani oni akamo, <<Aha gye lo.>>
Kweyi Oyesu ka dawa mo, <<Nyya kada ala kpo oshu wonya ni nyyaya awo oza mani lo.>>
Elase Ikweyi ko Ongo ni gba Ayi Epa ni
28Oyesu kamo, <<Ala ma moji ikweyi ko oza mani? Ongo oye gba ayi epa nongo kweyi oga ka do oyi kikyikyo mo, <Oyi, ga yo oko eho ki inabi hin ikyeni.>
29<<Oyi oni kyogwu kamo, <Nyya ga lo,> Itikpi oke owa pya ga.
30Ada <<Ogebe ko oyi kome epa ga ka danu mamani. Oyi kyogwu, itikpi oke ga lo.
31<<Anoho ipu ka ayi ase epa ni yo oza ni ada ya yimu ni?>>
Akamo, <<Oyi kikyikyo.>>
Oyesu ka dawa mo, <<Nyya ka dala okwokwoshi, awozegba kpa agbaza ba kwobonu da ala ba go Obula ko Owuso. 32Koni Oyohana wa shiya ala owe neshi ko bwu, ala ke kyogwu kpanu lo, awozegba kpa agbaza kyogwu kpanu. Kweyi kpiri ko oza ni ala ma mani, ala tela ko kyogwu kweyi shagbotu sho ozalabi kala.
Elase Ikweyi ka Awo osheho ka Abola
(oMak 12.1-12; oLuka 20.9-19)
33<<Ala ya akpaha ze shini ala pwe elase mani. Ongo oye gbeho ki inabi, kweyi oto ngma gyehe to, obwo ogo ni aba pyi inyi ki inabi ipu nu ni, oki mo oda ki iso ko gbeho. Kweyi oye eho yi da awo yo oko ka abola abo, kweyi oganu gogya oye. 34Ni ishi gye ko kyi izire ni, ota ayole nu oleho ko ga zo ogwogwa ke efu mani ebe ka awo yo oko ka abola.
35<<Awo yo oko ka abola ni ke kwo oyole oye kweyi gwo, ayo oye ngmo, aki to oye akyo. 36Oki ta ayole nwa sha awa ni oleho ko ga zo ogwogwa ke efu danu, awo yo oko ka abola ayuwa byoni aya kpase kikyikyo ni. 37Itikpi oto oyi nu oleho kweyi okamo, <Ko le mojoji, aba mo oyi hin ya gyiyi.>
38<<Ishini awo yo oko ka abola ke mo oyi nu yawa ni, akamo, <Oyi nu yawa ma, ala wa shini an yo ngmo shini an rogwu ke eho!> 39Ayo kwu kweyi pyo ge ese ke eho ga yo ngmo.>>
40Oyesu doka mo, <<Ishini ada ke eho mani kwikye, oji ni ala ma byo oya ya kpa awo yo oko ka abola mani?>>
41Akyogwu mo, <<Oya wa ya awase ni gbo otu labi mani ya ngmo kweyi ya ye eho ya da awa she hoha ni ba dani izire ke eho ni.>>
42Oyesu ka dawa mo, <<Ala ma ebyibye ipu ko Okpa ko Owuso lo?
<<<Akyo ni awo mo oda tela ni, anu pini ya shoshi she la. Omani wo oyoya ka Adole la, oki shoshi koma!>
43<<Nyya ka dala, aba yo obula ko Owuso ya bize sha ala abo kweyi ya yi da awase ni ba bi izire oni wa danu ni. 44Kpiri kase ni gbo ikweyi ko okpo mani oya kyigbo wuruwuru, kweyi ase ni ogboso oya yo ya gba wo omu.>>
45Ishini awoteyi ka awosapa kpa awoteyi ka Awofarisi pwe elase mani ni, agye mo Oyesu ya kela ikweyi wa la. 46Atikpo ko owe ko yo kwu, ake yoshi ikweyi koni ewa ka asuse zo wi inobane ni.
လက္ရွိေရြးခ်ယ္ထားမွု
oMatiyu 21: ALA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
THE WORD FOR THE WORLD INTERNATIONAL, THE WORD FOR THE WORLD NIGERIA