oMatiyu 20
20
Elase ikweyi ka awo yo oko eho ki Inabi
1<<Obula ki Iso lema bya adole oye ni bose ototukpokyi ko tiyi ka awo ga yo oko eho ki inabi nu ni. 2Oyoyu kpa awa byoni aba sore ki ikwiri eno oye ni, kweyi okpuwa ge eho ki inabi nu.
3<<Abo kogye ahane ko otukpokyi, oki mawa ashe bagye yeye ipishi. 4Oka da awa mo, <Ala ge eho ki inabi hin ga yo oko nyya sa ala ore neneshi.> 5Ebeni anyiso kweyi ga.
<<Obose ogyigwepa kpo ogye eta ki isheno, oya mamani kpa awase ni omuwa ni. 6Abo ko ogyeho ko onose, oki gipu ogya, oma awase shishini bagye yeye. Oduwoka mo, <Ojiya ni ala hagye kin ba yo oko ko ojije lo.>
7Akyogwu mo, <<Koni ashishe daha oko koya lo ni.> Oka dawa kamo, <Ala ge eho ki inabi hin ga yo oko.>
8<<Ishini eno shani, ada ke eho ka di ino gbeho ke eho nu mo, <Yawo yo oko gwu shini osuwore. Kwotu bwa ase ko ogwejeji gi ikyikyo.>
9<<Awase ni azuwa ogyeho ko onose ni wa, ada awa ikwiri ni ashu ko suwore bwo ototukpokyi go onose ni. 10Gbi ishini ofi ikweyi kawase ni azuwa ikyikyo ni. Aba ze ipu ko otuwa mo, aba suwore ki ikwiri sha awase ni wo oko onose ni. Kpiri wa ke ada oza ni ashu ko suwore eno ni. 11Ni azi ikwiri wa ni, akwotu ko shawa dine ke eho mo, 12<Awa ase ni wa yo oko ki ishi oye ni, odawi ikwiri gyogye kpa aha ni mo owe ki gweno bwo ototukpokyi ni.>
13<<Adeho oni ke ka da ashe oye ipu wa mo, <Oya, nyyo oje bibi la? Nmo kwa akyogwu koni nyya sore ki ikwiri ikweyi ke eno ni la lo? 14Zi ikwiri wo shini oga. Ami pini yimu ko dawi ikwiri gyogye kpa awo la. 15Ngboshu ko yo oza ni shumotu kpi ikwiri hin ni lo? Oya yanya koni nyyo oza neshi ni la?>
16<<Olemani la, awase ko gwejeji ba wa kikyikyo, kikyikyo ba wa ko gwejeji.>>
Oyesu ki kela ki ikwu nu
(oMak 10.32-34; oLuka 18.31-34)
17Ishini Oyesu kwo owe ko go Ojerusele ni, oya awogboso igwepa ogwu go okoka kweyi ka da awa mo, 18<<Aha ba go Ojerusele, kweyi aba yo Oyi ka Asuse ya ra do Oteyi ka awosapa kpa awofono kweyi aba kwe epwo ko yo ngmo. 19Ebeni aba yo ya nabo da awase ni wo Ase ko Oyahuda lo ni shini ana gbo owuru, ana ya aboshi, ana yo poshi sepa. Eno ko me eta oya nyiso bwa amiri.>>
Ene ko Oyakubu kpo Oyohana wa bo Oyesu oza
(oMak 10.35-45)
20Ene ko Oyakubu kpo Oyohana, ayi ko Ozebedi webe ko Oyesu kpa ayi nu wa kwagye obutu ko Oyesu wa bo oza.
21Oyesu do oka mo, <<Oji ni oya yimu?>>
Oka danu mo, <<Kyogwu shini ipu ka ayin oye na ya abore, oye na ya aboshe wo, ipu ko obula wo.>>
22Oyesu ka da awa mo, <<Ala gyoza ni ala ba doka ni lo. Ala ba gege ko gwi inyi kpa abwa ko owe ni nyya yela ko gwa mani?>>
Akamo, <<Aba gege.>>
23Oyesu ka dawa mo, <<Ala ba gege ko gwinyi ipu ka abwa ko owe hin mani. Yagye abore kwe aboshe hin ke ami gboshu ko dase lo. Ada hin ni yi Iso ni kya anu tu da awase ni oshuwa ni la.>>
24Ishini ashishini ka awogboso Oyesu igwo pwela mani ni, akyanya. 25Oyesu ke yuwo ogwu tukpa kweyi kamo, <<Ala gye mo awo ose kawase ni wo Ase ko Oyahuda lo ni gboshu ko yuwa ono, anyakwase wa ba shiya wa mo agbo oshu ko buwi ikpo. 26Oya lemani kpa ala lo, ikweyi koni kpiri kase ni ya yimu ko wo nyakwu ipu kala, oya wo otiri danu shini na meshe da ase shishini, 27kweyi kpiri kase ni ya yimu ko wo oteyi ipu kala na wo oshe kala. 28Oyi ka Asuse wa shini ana meshe danu la lo, owa shini na wa meshe, naki wa dawo olayi nu ikweyi kase nwashika.>>
Opwiyi epa Oyesu yuwa me ebe
(oMak 10.46-52; oLuka 18.35-43)
29Ni Oyesu kpa awogboso ba sho Ojeriko bita ni, ase nwashika gbosuwa itikpi. 30Opwiyi epa bagye ashikwu ko owe. Ishini apwo mo Oyesu yawa ni, ango oko iso kamo, <<Adole, Oyi ko Odawuda! Miyinyinyi ka aha!>>
31Ebeni ewa ka asuse ni gboso Oyesu ni gbuwa apwo mo ana sha. Akwotu ko ngo oko iso mo, <<Adole, Oyi ko Odawuda! Miyinyinyi ka aha!>>
32Oyesu hagye kweyi yuwo ogwu kamo, <<Oji ni ala ba yimu na ya dala?>>
33Aka danu mo, <<Adole, aba yimu ko me ebe.>>
34Iyinyinyi kwo Oyesu kweyi ogawabo iyi. Ebebeni amebe! Kweyi agboso.
လက္ရွိေရြးခ်ယ္ထားမွု
oMatiyu 20: ALA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
THE WORD FOR THE WORLD INTERNATIONAL, THE WORD FOR THE WORLD NIGERIA