oMatiyu 12
12
Okadoda Ikweyi Ke eno Ko minyo
(oMak 2.23-28; oLuka 6.1-5)
1Ishi oye, Oyesu ya yawu ipu ke eho eno ko minyo ko Ase ko Oyahuda, kweyi awogboso, emye ya ngmuwa, kweyi aba kwabo ko drizire kweyi ha. 2Ashishini ko Awofarisi muwa baya mani ni, akado Oyesu mo, <<Ma! Awogboso ba gboso ono ka Ase ko Oyahuda mo oshoshi eno ko minyo ka lo.>> 3Ebeni, Oyesu ka da awa mo, <<Ala kwobonu gye ipu ko okpa ko Owuso oza ni Odawuda kpa awo oya kokonu ya, ishi ni emye ya ngmu wa ni. 4Ogipu ole ko Owuso kpa awo oya ko oko nu kweyi hi ikyoga ni ono wuwobi ko ha ni, mo owa ko Osapa kin la. 5Ala ki gye ipu ko ono ko Omusa mo akyogwu da awo osapa na yo oko Ole ko Owuso eno ko minyo ashishe ke kada awa mo owoza labi lo. 6Nyya ka dala mo, ase ni sho Ole ko Owuso ye ebe ni. 7Okpa ko Owuso mo, <Oza ni nyya yimu sha ase na yani wo ana mi iyinyinyi ki iyi wa, sho peshi na aba ya dami ni,> Owoni alabi gye mani alabi ba bya awase ni gbe epwo ikweyi ko oza ni aya ni lo. 8Koni Oyi ka asuse wa Adole ke eno ko minyo ko Ase ko Oyahuda la.>>
Ongo ni abo nu wi ine ni
(oMak 3.1-6; oLuka 6.6-11)
9Oyesu she ebe ni bita kweyi ge ekpa. 10Ebeni, omo ongo oye ni abo nu winyi ni. Kweyi ashishini ko Awofarisi ba labo ko owe ko kwo Oyesu epwo kweyi adoka mo, <<Owo ono la, ko da ase ogege ki ikpiye eno ko minyo ko Ase ko Oyahuda?>> 11Oyesu kyogwu mo, <<Owoni ashe kala gbo otukpo oye kweyi gbo gogo eno ko minyo, oya nabo yayi ngma lo? 12Asuse shoshi sho otukpo lo! Ni olemani owo ono la koyo neshi eno ko minyo.>> 13Ebeni okado ongo oni mo, <<Na abo ta.>> kweyi ona abo ta, opyo gege ka abo nu byoni abo nu ko me epa weni. 14Awofarisi ke ge ese ga labo ko owe ni aba yo Oyesu ngmo.
Oshe ni Owuso shu ni.
15Ni Oyesu gyo oza ni Awofarisi ba gbo ikweyi nuni, oshebe ni bita. Kweyi ase lewa gboso. Ebeni odawa ase ni loshu lo kpiri ipu ke ewa oni ogege ki ikpiye wa. 16Opyuwa akpaha mo, ala ka kada ashishi ase ni weni lo. 17Omani gbodagye shini ela ni inobane Ishaya ka ikweyi nu ni nawokwokwoshi.
18<<Owuso kamo omani pini wo oshe hin ni shu ni la
anu pini wa ase ni nyyimu ni la, nshotunehe kpa anu;
Nyya yo Omaku hin ya gipu nu.
Oya kada ase kese kpiri mo nyya ngma awa
19Oya gbapwo kpase kwe oya ngmegba lo;
kwe owa kela oko loshu kpase ikweyi ko owe lo.
20Oshe hin ni nshu ni ya wi ine ki iyinyinyi da awase ni loshu lo kpa awase ni abi ikpo ni,
Owa gbi iyinyinyi kawase ni ba gege ko tiyi wa abo lo ni,
Oya go ohobu koyo neshi kpi iyinyinyi gbi ishini oneshi ya yo obibi yayi bya.>>
21Ase lewa ba yi iyitagye mo Owuso shu ni ko ngma awa.>>
Oyesu kpo Obelizebu
(oMak 3.20-30; oLuka 11.14-23)
22Eno oye awa ashe byo ongo oye ni gbo omaku bibi webe ko Oyesu. Ongo ni wo ofiyi okiya kela lo ebe ni Oyesu dano gege ki ikpiye bwebe ko ngmo omaku bibi, kweyi ongo mani ya kela oki ya me ebe! 23Kpiri ke ewa ni bagye ni igbashi yuwa kwu kweyi akela kpi iyiwa mo, <<Kwa anu mani bwi ipwoma ko ose Odawuda la?>> 24Ishini Awofarisi pwo ogege ki ikpiye no Oyesu do ongo mani ni akamo, <<Oya ngmo omaku bibi koni ibiri na aba yogwu mo Obelizebu ose ko omaku bibi danu oshu koya mani ni.>>
25Ni Oyesu gyo oza ni aba gbo ipu ko otu wa ni, mani oni okadawa mo, <<Obula ni ase nu ba gbapwo kpi iyiwa aba ya agye oni ya yishi. Mani oni ogya kwe ole ni yiyiwa ko ikpo ikpo kweyi ba gba apwo kpi iyiwa ogya ni kwe ole ni ba ko. 26Owoni Ibiri ya ni ibibi enya, oyi iyinu ko pi yoma. Oya le moji no obula nu ya hagye? 27Owoni ala kamo nyya ngmo omaku bibi kpo oshu ko Obelizebu. Anoho dawo gbosala oshu ko ngma awa? Ni olema oni, oza ni awo gboso ala ba yani ya shiyala mo oza ni ala ba ka ikweyi ni wo gyogye la lo. 28Owoni nyya no omaku bibi enya kpo omaku ko Owuso, omani ya sayi da ala mo obula ko Owuso wa dala.
29<<Kwa anoho ya gege ya gole kase ni loshu ni ga wiyi? So oke kwobonu yo gbo imbe oya go ole nu ga wi la. 30Kpiri kase ni ya kyogwu kpe elan lo, owo oya konun la, kweyi kpiri kase ni ya kpase ya gbayi kpa ami lo oya yuwa ya pasha oma. 31Ni olema oni, nyya kada ala, kpiri ko ozalabi ni ase yo Owuso kpe ela bibi ni oka ikweyi nu, oya yigbuwa, Owuso ke, ya gbase ni kela bibi ikweyi ko Omaku ko Owuso lo. 32Kpiri kase ni kela bibi ikweyi ko Oyi ka asuse, Owuso yo ozalabi nu gbo, kpiri kase ni kela bibi ikweyi ko Omaku ko Owuso, Owuso yozalabi nu gbo lo, kwe ishi mani kwe ishi ni yawa ni.
Efu bwo ogwogwa nu
(oLuka 6.43-45)
33<<Owoni okye efu ya, efu ya gwa neshi. Owoni okye efu ya lo efu ya gwa neshi lo. Aba gye efu bwe ebe ko gwogwa nu la. 34Ala egwa, ala baya moji akela neshi ni ala ke wase bibi mani? Ela nwashika ni yotu pini okwunu ya kala. 35Ase neshi ya kela neshi ikweyi koni oya yela ko oza neshi ipu kotu nu, mamani ase bibi ya kela bibi ipu ko oza bibi ni ogbo ipu ko otu nu. 36Nyya kadala mo kpiri kela bibi ni ase bakani, eno kepwo, aba ka arisawu nu. 37Bwebe kela wo pini aya ngmawo la, kweyi bwebe kela wo pini aya kwe epwo la.>>
Ase doka koza kigbashi
38Eno oye, ashishini ka Awofarisi kpa awofono, ka do Oyesu mo, <<Adole, yo oza ki igbashi daha shini ahan gye mo obwebe ko Owuso la.>> 39Ebeni Oyesu kadawa mo, <<Awo yoza bibi kpa awo gbo otuse lo ki ishi mani, pini ba doka koza igbashi la! Nyya yoza kigbashi oyoye dala lo, so oni gbodagye kpi inobane Oyunana ni. 40Byoni Oyunana yene eta kpo otu eta ipu ke ebinyi nyakwu oni, mani oni Oyi ka asuse ayeno eta kpo otu eta ipu ka amiri ese mani. 41Awase ko Onineba kpase kishi mani wa nyiso aka dala eno ko kepwo mo, ala yo ozalabi; koni ase ko Onineba shagbotu ishi ni Oyunana ya kela ko Owuso dawa ni, nabani ase ni sho Oyunana ni yoma! 42Ino ko kepwo Onya ni wo Inole ko okpagye ko Osheba ni ya hagye ko kwuwepwo, kweyi koni owa bwebe le nu wa pwela ko zafofu ko ziyi ko Osolomo, kweyi Ami tala otugbagba mo oje yaba ni sho Osolomon ni!
Okwikye ko omaku bibi
(oLuka 11.24-26)
43<<Owoni omaku bibi bose sho ongo, oya ga labo kebe ko minyo kweyi opye lo. 44Kweyi okamo, nyya kwikye gole ni nbwanu wani, ishini okwikye wani, omole gbojije lo, gwogwu kweyi akya anu tu. 45Kweyi oya gese ga bya awo omaku bibi ahapa ni shanu tata niwa, kweyi wa bagye ebe ni kpa anu. Mani oni, okweyi ko ongo ni wa labi sha kikyikyo. Owa lema ni kpa awase ki ishi mani.>>
Ene ko Oyesu Kpa ayinanu
(oMak 3.31-35; oLuka 8.19-21)
46Ni Oyesu tayayo ya kela kpewa kasuse ni, inanu kpa ayinanu hagye ese, ba yimu ko kela kpa anu. 47Ebeni ashe ka danu mo, <<Ene wo kpayiwo hagye ese, aba yimu ko kela kpa wo.>>
48Oyesu nyagbo ki doka mo, <<Anoho wene hin, kpa ayene hin?>> 49Omyabo awogboso kweyi kamo, <<Awa mani wene hin kpa ayene hin la. 50Kpiri kase ni yo oza ni sha Ada hin ni yi iso ni otu, anu pini we enen, kpa ayene hin la.>>
လက္ရွိေရြးခ်ယ္ထားမွု
oMatiyu 12: ALA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
THE WORD FOR THE WORLD INTERNATIONAL, THE WORD FOR THE WORLD NIGERIA