oMatiyu 11
11
Oyohana ino Obatisma tawo ogboso eleho ebe ko Oyesu
1Ishini Oyesu kada awogboso igwepa oza koya kpo olamuni aba ya lo kweyi ni, oshebe ni bita kweyi ga awo ogya okpagye ko Ogalili, ebe ni ofa ase oza oki tono kela ko Owuso dawa.
2Ishini Oyohana ino yo Obatisma yo oruduru ni opwo oza ni Oyesu Kristi yaya ni, ota awogboso oleho. 3Ko do oka mo, <<Awo pini wo Okristi ni awobane kamo oyawa la kwe, ahan yi iyitagye gbeyi kashe hoha?>>
4Oyesu kyogwu mo, <<Ala kwikye ga kado Oyohana oza ni ala pwo ebeni kpo oza ni ala mun yaya ni: 5Awofiyi ba mebe, awokyikpo ba yawu; awo gbo ose ki iyiwa pyo ogege ki kpiye wa, awo odoho ba pwaha; awase ni gekwu ni nyiso; kweyi awoleha ba pwo oshu neshi ko Owuso. 6Otunehe ko Owuso yo kpa awase ni otuse wa ikweyin hagye lo ni.>>
7Ni awogboso Oyohana ba shebe ni bita ni, Oyesu kwotu ko kela de ewa ka asuse ikweyi ko Oyohana mo: <<Ishini ala gebe ko Oyohana ododa ni oji ni ala ga ko ma? Ala ga ko ma agwu ni owu ya tuwa ni la? 8Owoni olemani lo, oji ni ala gese koga ma? Ongo ni sho oshiye neneshi ni la? Aayi, awase ni ba sho oshiye neshi ni bo ole kawo ose la. 9Kwe, oji ni ala gese koga ma? Ala ga ko mino obane la? Olemani, ase ni ala gese ko moni shino obane. 10Oyohana pini wa ase ni okpa ko Owuso ya kela ikweyi nu ya kamo:
<Ma, nyya to oyelehon eleho ya kwobonu dawo,
shini nawa kyowe gbishi wo.>
11Oyesu kamo, nyya ka dala okwokwoshi, Oyohana ino yo batisma wo nyakwu shananoho ni wo omoma kanya ese mani; ase ni ke wo ojije lo obula ko Owuso ni sho Oyohana la. 12Bwi ishi ni Oyohana ino yo batisma ya tono ni wishi mani, ase ba takirikwu ko go obula ko Owuso kpo oshu wa kweyi awine ko otu bibi ba yimu ko yo owe ko obula ki giso yi gwu. 13Ime Oyohana ino Obatisma nawa kwo otu ko tono, awo obane ko ono ko Omusa, bane kela ikweyi ko obula ko Owuso; 14Owoni ala kyogwu ko yotuso oza ni aka ni, ala ba gye mo Oyohana pini wi Iliya ni yawa ni la. 15Ase ni gba akpaha ko pwe ela na pwo.
16<<Oji ni nke ya kamo ase kese ki ikyeni bya nu? Alema bya ayi le ke ni bagye otutehe ko ogya ba tiga ebe ni ase ba gbayi ni, kweyi ba ya awo oya wa gwu,
17akamo, <Aha tajigwo ko onyape dala!
Ala gyoba lo;
Aha wigye ki ikwu dala,
ala ke kyebga lo.>
18Ishini Oyohana wani, okwokwunu, oke gwinyi kinabi lo. Akamo, Ogbo omaku bibi. 19Oyi ka Asuse ke wa, oya roza ya gwinyi, akamo oya roza kpinyi nwashika, oya yawu kpa awozegba kpa <<Awo yo ozalabi shishini.>> Ishini ase yo oza ni wo ogyogye ebe ko Owuso oza ni aba ya ya shiya ase mo Owuso wokwokwoshi ipu ko oza ni oka ni.>>
Oyesu kela kpo oko loshu dawase ni tela ko shagbotu ni
20Awase ko ogya ni Oyesu yo oza ki igbashi nwashika ni tawa ko shagbotu, okela dawa kpo oko loshu kweyi kamo, 21<<Igbe na tala ase ko Okorazin kpo Obesayida! Owoni oza ki igbashi ni nyya ebe kala ni, obiwo Otaya kpo Osidon la, abi shagbotu gbeji wa kweyi bya sho oshiye ko otu byobya kpi iyawu ikpiyewa. 22Nyya ka dala mo, eno ko kepwo ko Owuso ya miyinyinyi kawase ko Otaya kpo Osidon sho oni oya ya dala ni! 23Ala ase ko ogya ko Okapanahu, ala kama byo Owuso ya za ala wa ase neshi gi iso? Oya kpa ala ya sho ola. Abi kamo oza ki igbashi ni nyya ogya kala ni bi gbodagye ogya ko Osodom, ogya ni biya yaba kwikyikyeni. 24Ami ke inya kada ala mo eno ko kepwo ko Owuso oya miyinyinyi kase ko Osodom ya shala.>>
Ala webe hin shala minyo
(oLuka 10.21-22)
25Ishi oni Oyesu kamo, <<Ada, Adole awo ni yiso kpo okpagye ni, ko okwokwoshi nshotunehe do koni oyo oza mani yi teba da awine ko ziyi kpa awine ko zi ikweyi giso kweyi oyi shiya ase ni le bya ayi le ke ni. 26Ada, oya mani koni ebe wo, oma mo owo oza neshi ni.
27<<Ada hin yo oza kpiri yi dami, ashishe gyo Oyi lo, sa Ada nu. Ashishe gya Ada lo so Oyinu, kpa wa ase ni Oyi yimu shini Ada nu na gyuwa ni.
28<<Ala webe hin, ala ni yoko nwa kweyi byiyo lenu ni, ami ya dala ominyo. 29Ala gipu ko oko hin, ala ki fu ebe hin, koni nwine ko otu mene nki ya zikweyi iso lo, nyya dala ominyo. 30Ikweyi koni oko ni nyya dala ni lono ko ya lo, kweyi iyo ni nyya dala ni ya lenu lo.>>
လက္ရွိေရြးခ်ယ္ထားမွု
oMatiyu 11: ALA
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
THE WORD FOR THE WORLD INTERNATIONAL, THE WORD FOR THE WORLD NIGERIA