लूका 4
4
येशूवो परीक्षा
(मत्ती ४:१-११; मर्कूस १:१२-१३)
1येशू बप्तिस्मा लाम भ्यानीसीङ पवित्र आत्मै भरपूर छान्म यर्दन नदी लाकीङ ल्हेस्काङ। पवित्र आत्मै होस्कोके उजाड ठावाङ आल्काङ। 2होलाङ शैताने येशूके चालीस याकसम्म परीक्षा जाटा हटै पापाङ पार्डीके पा। चालीस याकसम्म येशूये हीड माज्याचै होस्कोके बेहेरी ज मीटुक रन्छीया।
3होस बेला ज शैताने येशूके टेया, “साँच्चै नाको परमेश्वरो मीजा आले टेहाङ इस ल्हुङके बेस्काङ छान्के आज्ञा याहानी।”
4येशूये जवाफ याहाकाङ, “परमेश्वरो बचनाङ इट रीक्मले, ‘भर्मी बेस्काङे मत्रै माजीवाले।’”#व्यव ८:३
5होस न्हुनीङ शैताने येशूके घाङ्च ठावाङ आल्हा र काखीनीङ ज संसारो पट्ट राज्य टन्हाक्म टेया, 6“ङै नाकोके पट्ट अधिकार हटै इच्यौ गौरब नाकोके याहालाङ हीके टेहाङ इस पट्ट ज ङाके याहामले र ङै याहाके जाक्चकोके याहालाङ। 7नाकोइ ङाके घोप्टो परीस्म नाझोरास टेहाङ, इस पट्ट कुराको नाकुङ छान्ने।”
8येशूये होस्के जवाफ याहाकाङ, “परमेश्वरो बचनाङ रीक्मले: ‘नेङे नो परमेश्वरके मात्र झोरो हटै होस्कुङ मात्रै सेवा जाटो।’”#व्यव ६:१३
9शैताने येशूके यरुशलेमाङ नुन्हा हटै होस्कोके परमेश्वरो मन्दिरो मीचुटाङ टाहानीसीङ टेया, “नाको परमेश्वरो मीजा आले टेहाङ इटीङ म्हाकाङ फाल कानी। 10हीके टेहाङ परमेश्वरो बचनाङ इट रीक्मले, ‘नाकोके जोगडीके परमेश्वरे होस्कुङ स्वर्गदूतकोके हुकुम याहालेको, 11नाकुङ मीहील ल्हुङाङ नौटठोहाके टेम होसोकोइ नाकोके मीहुटाङ घोले।’” #भजन ९१:११-१२
12येशूये शैतानके टेकाङ, “परमेश्वरो बचनाङ रीक्मले, ‘नेङे परमप्रभु नोङो परमेश्वरके परीक्षा नाजाटो।’”#व्यव ६:१६
13शैताने येशूके पट्ट परीक्षा जाट्म भ्यानीसीङ कलापके डास्म आना।
गालील क्षेत्राङ येशूवो काम
(मत्ती ४:१२-१७; मर्कूस १:१४-१५)
14येशू पवित्र आत्मौ शक्ति डीहीन्नीसीङ गालीलाङ ल्हेस्म राहाकाङ। येशूवो बारेयाङ पट्ट क्षेत्राङ कुराको फैलडीस्म नुङा। 15येशूये यहूदीकुङ गुमुस्ठ इमाङ पाहाक्काङ र पट्टकोइ होस्कुङ प्रशंसा जाटा।
येशू नासरताङ आन्काङ
(मत्ती १३:५३-५८; मर्कूस ६:१-६)
16येशू मेको होर्च नासरत लाङ्घाङ टाराहाकाङ, हटै अरु बेला लख ज होस्को म्हुङ बाट्च याकाङ यहूदीकुङ गुमुस्ठ इमाङ आन्काङ हटै होस्को परमेश्वरो बचन पढीस्के टोरोस्काङ। 17येशूके यशैया अगमवक्तौ कीटाब पढीस्के याहामलेया। होस्कोइ कीटाब खोल्काङ, र इट टेम रीक्च खण्ड पढीस्काङ, 18“परमेश्वरो आत्मा ङा टकनी ले,
हीके टेहाङ गरीबकोके सेहेच समाचार सेटाक्के होस्कोइ ङाके अभिषेक जाट्मलेको।
बन्धनाङ लेचकोके छुट्कारौ घोषणा जाट्के,
हटै मीमीक माडाङ्चकोके मीमीक डाङ्च जाटाक्के
अत्याचाराङ परीस्चकोके डासाक्के,
19हटै परमेश्वरे मेकुङ भर्मीकोके पापीङ बचडीच बेला राहा टेम घोषणा जाट्के
होस्कोइ ङाके ज बीरीन्च आलेको।” #यशै ६१:१-२
20होस्कोइ पढीस्म भ्यानीसीङ कीटाबके बन्द जाट्म काट सेवा जाट्च भर्मीके ल्हेट्म याहानीसीङ मुकाङ। होलाङ लेच पट्ट भर्मीकोइ येशूके बेहेरी ज ङोस्म लेया। 21हटै येशूये होसोकोके टेकाङ, “छीनीङ ङै पढीस्च इसै परमेश्वरो बचनो खण्ड नाक्कोइ सेम जाट्नाङ ज ओल्म भ्या।”
22होस्कोइ टेच सेहेच कुराको सेम पट्टको छक्क परीसा हटै होस्कुङ प्रशंसा जाटा हटै होसोकोइ गीना, “इसै योसेफो मीजा माआले र?”
23येशूये होसोकोके टेकाङ, “नाक्कोइ ङाके पक्का इसै आहान टेढनीस, ‘ए वैद्य, मेल्लाके न गेपाक्नी!’ कफर्नहुमाङ नाकोइ जाट्च लख इलाङ नाकुङ लाङ्घाङ घनीङ जाट्नी।” 24येशूये टेकाङ, “इलाङ सेनीस, कुसै र अगमवक्ताके मेकुङ लाङ्घाङ मनीटा माछान्ले। #यूह ४:४४ 25सेनीस, एलिया अगमवक्तौ बेलाङ साढे सोम ल्हेससम्म नमस माराहा हटै इस्राएल भरीयाङ कराहाङ्च अनिकाल परीसा। होस बेला इस्राएलाङ ढलीङ विधवाको लेया। #१ राजा १७:१ 26बाकी र परमेश्वरे एलियाके सीदोन देशो सारपत टेच ठावो विधवाटुङ बीर्हीन्काङ, इस्राएलो अरु कुसैटुङ र माबीर्हीन्काङ। #१ राजा १७:१ 27हटै एलीशा अगमवक्तौ बेलाङ घनीङ इस्राएलाङ ढलीङ कोर्ह्या रोगीको लेया बाकी र परमेश्वरे सिरिया देशो नामान बाहेक कुसैके र मागेपाक्काङ।”#२ राजा ५:१-१४
28येशूये टेच कुराको सेनीसीङ होसै सभा मुच इमाङ लेच पट्ट भर्मीको बेहेरी ज डाम्छोसा। 29होसोको पट्टको सोवा र येशूके लाङ्घइङ बहीरी छीक्म याहानीसीङ घाङ्च डाँडाङ लेच लाङ्घौ मीचुटाङ नुन्हा हटै होटीङ म्हाकाङ लोहोम याहाके पा। 30बाकी र येशू भर्मीकुङ भीडीङ ख्योम आन्काङ।
दुष्ट आत्मा लग्डीस्च भर्मी गेप्च
(मर्कूस १:१२-२८)
31येशू गालीलो कफर्नहुम टेच सहराङ झाल्काङ। म्हुङ बाट्च याकाङ येशूये भर्मीकोके शिक्षा याहाकाङ 32होसोको येशूवो शिक्षा सेम छक्कै परीसा हीके टेहाङ होस्कोइ #मत्ती ७:२८-२९ अधिकार कठा पाहाटाकोल्काङ। 33सभा मुच इमाङ दुष्ट आत्मा लग्डीस्च काट भर्मी लेया। होचे च्याक्म टेया, 34“ए नासरतो येशू, नाकोइ कान कठा ही पाढनी? नाको कानकोके नाश जाट्के टेम राहाच आले? ङाके थाहा ले नाको परमेश्वरे बीर्हीन्च पवित्र भर्मी आलेको।”
35येशूये होस दुष्ट आत्माके नार्म आज्ञा याहाकाङ, “नाच्याको र इस्टुइङ ख्योम आन्न!” होस भर्मीके पट्टकुङ माझाङ पछार्डीम बाकी र हीड चोट मापार्डीम होस दुष्ट आत्मा ख्योहा।
36पट्ट भर्मी छक्क परीस्म मेको-मेको ङाक्के ठाला, “ओहो! इस भर्मीयो मीङाकाङ कुन्च अधिकार र शक्ति लेउसा। होस्कोइ नार्नाङ ज दुष्ट आत्माको ख्योम आन्ले!” 37हटै कफर्नहुम सहरो पट्ट ठावाङ येशूवो बारेयाङ चर्चा फैलडीसा।
येशूये ढलीङ भर्मीकोके गेपाक्लेको
(मत्ती ८:१४-१७; मर्कूस १:२९-३४)
38येशू सभा मुच इमीङ ख्योम सिमोनो इमाङ आन्काङ। सिमोनो गुमा होलाङ छान रानीसीङ बेहेरी ज छानीसीङ थला परीस्मल्या, हटै होसोकोइ येशूके सिमोनो गुमाके गेपाक्म याहानी टेम बीन्ती जाटा। 39हटै येशू सिमोनो गुमौ खेरेप टोह्ङम छानके नार्काङ, हटै छाने डासा हटै तुरुन्तै ज सोम होसोकुङ लागी ज्याच-गाच कुराको फीन्म याहा।
40हटै नङ्खान केल्के पानाङ भर्मीकोइ ढलीङ खालावो छाच भर्मीकोके येशूटुङ राका। येशूये होस पट्ट भर्मीयो ढेनाम मेकुङ मीहुट डाम पट्टकोके गेपाक्काङ। 41होलाङ लेच ढलीङ भर्मीकोटुङ लेच दुष्ट आत्माको इट टेम च्याक्म ख्योम आना, “नाको परमेश्वरो मीजा आलेको!”
बाकी र येशूये होस दुष्ट आत्माकोके बेहेरी नार्काङ हटै ङाक्के मायाहाकाङ, हीके टेहाङ दुष्ट आत्माकोइ होस्को ज पापीङ बचडीच ख्रीष्ट आलेको टेम चीन्डीयोला।
येशूये यहूदीकुङ गुमुस्ठ इमाङ प्रचार जाट्काङ
(मर्कूस १:३५-३९)
42हटै गोराक छान्चनीङ ज येशू कुसै र मालेच ठावाङ आन्काङ। भर्मीकोइ होस्कोके पाके ठाला, हटै होसोकोइ येशूके डीहीन्प्याक, “कानकोके डास्म माआन्नी” टेम रोक्डीया। 43बाकी र येशूये टेकाङ, “ङै परमेश्वरो राज्यौ सेहेच समाचार आस्काट ठाउँलाक घनीङ सेटाक्के परीस्ले। हीके टेहाङ ङा इच्यौ लागी ज बीरीन्चीस्च आले।”
44हटै येशू यहुदियावो पट्ट यहुदीकुङ गुमुस्ठ इमलाक प्रचार जाट्म ज ह्वाकाङ।
လက္ရွိေရြးခ်ယ္ထားမွု
लूका 4: WMGR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 (Active), Mother Tongue Translators Society and Wycliffe Bible Translators, Inc. All rights reserved.