लूका 3
3
बप्तिस्मा याहाच यूहन्नै लाम खास्च
(मत्ती ३:१-१२; मर्कूस १:१-८; यूहन्ना १:१९-२८)
1रोमावो महाराजा तिबेरीअसे राज्य जाट्च पन्ध्र ल्हेसाङ, पन्तियस पिलातस यहुदियावो मुख्य शासक लेया। होस बेला एन्टिपासे#3:1 एन्टिपासे हेरोद एन्टिपास येशू फुन्च बेलौ यहूदियावो राजा हेरोदो मीजा लेया। गालीलाङ राज्य जाटोला हटै होच्यौ भया फिलिपे इतुरियाङ हटै त्राखोनितिसाङ राज्य जाटोला। लुसानीयासे अबीलेनेयाङ राज्य जाटोला। 2हन्नास हटै कैयाफा पट्ट पूजाहारीकुङ अगुवा लेच बखटाङ, परमेश्वर जकरियौ मीजा यूहन्नाटुङ उजाड ठावाङ ङाक्काङ। 3हटै यूहन्ना यर्दन नदीयो जम्मै ठाउँलाक इट टेम प्रचार जाट्म ह्वा, “पाप जाट्के डास्म परमेश्वरलाक ल्हेस्म बप्तिस्मा लानीस हटै परमेश्वरे नाक्कोके पापो क्षमा याहालेको।” 4होस पट्ट कुराको यशैया अगमवक्तै परमेश्वरो बचनाङ रीक्च लख ज छान्के राहा। होलाङ इट रीक्मलेया:
“उजाड ठावाङ काट भर्मीये कराहाङ्च आवाजाङ ङाहाक्ले,
‘मेल्लाकोके प्रभुवाङ विश्वास जाट्के तयार जाट्नीस,
होस्कुङ लागी लाम तयार जाट्नीस हटै होस्कुङ लाम सोझो जाट्नीस।
5नाक्कोइ पट्ट फाँटको पुर्डीके परीस्ले,
हटै डाँडाकोके खास्नीसीङ न्हामाक्के परीस्ले,
हटै गोङ्च लामके सोझो पार्डीके परीस्ले
मासेहेच लामके सेहेच जाट्के परीस्ले।
6हटै पट्ट भर्मीकोइ परमेश्वर लाकीङ राहाच मुक्ति डाङ्ले।’” #यशै ४०:३-५
7हटै ढलीङ ज भर्मीको यूहन्नाटुङ बप्तिस्मा लाके टेम राहा। हटै यूहन्नै होसोकोके टेया, “ए धोखा याहाच भर्मीको! परमेश्वरीङ राहाच क्रोधीङ जोह्के टेम नाक्कोके कुचे टेया? #मत्ती १२:३४; २३:३३ 8परमेश्वरीङ राहाच क्रोधीङ जोह्के नाक्कोइ पाप जाट्के डास्म परमेश्वरलाक ल्हेस्च जीबन जीवाके परीस्ले। हटै मेल्लाकोके परमेश्वरो क्रोधीङ जोगडीके, ‘कानको अब्राहामो मीजाको आले नाटेनीस।’ हीके टेहाङ सेनीस, परमेश्वरे ल्हुङकोके ज अब्राहामो मीजाको खास्के ह्योकलेको। #यूह ८:३३ 9इन्नाङ ज परमेश्वरो क्रोधौ आर्वा मीमौ म्यारटुमाङ परीस्म भ्यामले। परमेश्वरे होसै सेहेम मीस्या मास्याच सीङो मीमा लख लेच भर्मीकोके सजाय याहाके टेनीसीङ म्यारटुमीङ ज चेम फुस्म जोसाक्लेको।” #मत्ती ७:१९
10हटै होलाङ लेच भर्मीयो हुलकोइ यूहन्नाके गीना, “होट आले टेहाङ कानकोइ ही जाट्के परीस्ले?”
11यूहन्नै होसोकोके जवाफ याहानीसीङ टेया, “लाहाकठा न्हीस डौरा लेचकोइ डौरा मालेचकोके काट याहानीस। हटै ज्याच ठोकको लेचकोइ ज्याच मालेचकोके पुङ्म याहानीस।”
12सेर्मा सोट्चको बप्तिस्मा लाके टेम राहा र यूहन्नाके गीना, “गुरु ज्यू, कानकोइ मन्ह्याङ ही जाट्के परीस्ले?”#लूक ७:२९
13यूहन्नै होसोकोके टेया, “सरकारे नाक्कोके सोट्के परीस्ले टेच टार सोट्नीस। होस टेनाङ ढलीङ सेर्मा नासोट्नीस।”
14सिपाहीकोइ ड गीना, “कानकोइ ही जाट्के परीस्ले?”
यूहन्नै होसोकोके टेया, “फोकोके दोष नालैडीनीस हटै करकाप जाट्म फोकुङ पैसा नालानीस। बरु मेल्लौ तलबाङ ज सन्तुष्ट छान्नीस।”
15भर्मीको पापीङ बचडीच ख्रीष्टकुङ आशाङ मुमलेया र होसोकोइ मीगीनाङ यूहन्ना ज मुक्ति याहाच ख्रीष्ट आले की टेम बीचार जाट्मज लेया। 16यूहन्नै होसोकोके टेया, “ङै नाक्कोके डीये बप्तिस्मा याहालाङ बाकी र ङाटेनाङ शक्तिशाली काट राम्हलेको। ङा होस्कुङ चप्पलो फीट्टा फोसाक्के लायकावो घनीङ मालेनाङ। होस्कोइ नाक्कोके परमेश्वरो पवित्र आत्मै बप्तिस्मा याहानीसीङ सफा जाट्लेको हटै म्हेये पवित्र जाट्लेको। 17होस्कोइ टाप्च न्हङ्गली, गहुँ र भुसके भाक्के टेम लामलेको। हटै गहुँ र भुसके टाप्नीसीङ, गहुँकोके भकारीयाङ हटै भुसकोके सेन्ढै मासीच म्हेयाङ जोसाक्म याहालेको।” 18इट जाट्म न यूहन्नै भर्मीकोके पाप जाट्के डास्म हटै परमेश्वर लाक ल्हेस्के अर्तीको याहा हटै होसोकोके सेहेच समाचार सेटाका। 19गालीलाङो मुख्य शासक हेरोदे मेल्लौ भयौ माझाके विवाह जाटा हटै अरू ढलीङ पाप काम जाटा। होट छान्नीसीङ यूहन्नै हेरोदके नारा। 20हेरोदे मेनो सिपाहीकोके यूहन्नाके जेलाङ कान्के बीरीन्नीसीङ मेनो पाप कामाङ अझै आस्काट पाप ठप्डीया। #मत्ती १४:३-४; मर्कू ६:१७-१८
यूहन्नै येशूके बप्तिस्मा याहाच
(मत्ती ३:१३-१७; मर्कूस १:९-११; यूहन्ना १:३२-३४)
21यूहन्नै पट्टकोके बप्तिस्मा याहाच बेलाङ येशूके घनीङ बप्तिस्मा याहा। हटै येशूये प्रार्थना जाट्नाङ स्वर्ग फोचीसा। 22हटै पवित्र आत्मा ढुकुरो रुपाङ येशूटकनी राहाकाङ। हटै स्वर्गइङ काट इट टेच आवाज राहा, “नाङ ङौ रोह जाट्च मीजा आले। ङा नाङ कठा बेहेरी मर्हाङमनङ।” #उत २२:२; भजन २:७; यशै ४२:१; मत्ती ३:१७; मर्कू १:११; लूक ९:३५
येशूवो पुर्खाको
(मत्ती १:१-१७)
23हटै येशूये तीस ल्हेसलाक परमेश्वरो बारेयाङ प्रचार जाट्के ठाल्काङ। भर्मीकोइ येशूके योसेफो मीजा लोकोला, योसेफ चहीन्या एलीयो मीजा लेया। 24एली चहीन्या मत्तातो मीजा, मत्तात लेवीयो मीजा, हटै लेवी मल्कीयो मीजा। मल्की यान्नौ मीजा, यान्ना योसेफो मीजा लेया। 25योसेफ मत्ताथियासो मीजा, मत्ताथियास आमोसो मीजा, आमोस नहुमो मीजा, नहुम इसलीयो मीजा, इसली नग्गैयो मीजा, 26नग्गै माथौ मीजा, माथ मत्ताथियासो मीजा, मत्ताथियास सेमैनो मीजा, सेमैन योसेखो मीजा, योसेख योदौ मीजा, 27योदा योआननो मीजा हटै योआनन रेसौ मीजा, रेसा यरुबाबेलो मीजा, यरुबाबेल शालतिएलो मीजा हटै शालतिएल नेरीयो मीजा, 28नेरी मल्कीयो मीजा, मल्की अद्दीयो मीजा, अद्दी कोसामो मीजा, कोसाम एलमादमो मीजा, एलमादम एरो मीजा, 29एर यहोशूवो मीजा, यहोशू एलीएजरो मीजा हटै एलीएजर योरीमो मीजा, योरीम मत्तातो मीजा, मत्तात लेवीयो मीजा, 30लेवी सीमीयोनो मीजा, सीमीयोन यहूदौ मीजा हटै यहूदा योसेफो मीजा, योसेफ योनानो मीजा, योनान एल्याकीमो मीजा लेया। 31एल्याकीम मलेआवो मीजा हटै मलेआ मिन्नौ मीजा लेया। मीन्ना मत्ताथावो मीजा, मत्ताथा नातानो मीजा, नातान दाऊदो मीजा, 32दाऊद यिशैवो मीजा, यिशै ओबेदो मीजा, ओबेद बोअजो मीजा, बोअज सल्मोनो मीजा, सल्मोन नहशोनो मीजा, 33नहशोन अम्मीनादाबो मीजा, अम्मीनादाब आरामो मीजा लेया। आराम हेस्रोनो मीजा, हेस्रोन फारेसो मीजा, फारेस यहूदौ मीजा, 34यहूदा याकूबो मीजा, याकूब इसहाको मीजा, इसहाक अब्राहामो मीजा, अब्राहाम तेरहौ मीजा, तेरह नाहोरो मीजा, 35नाहोर सरुगो मीजा, सरुग रउवो मीजा, रउ पेलेगो मीजा हटै पेलेग एबेरो मीजा, एबेर शेलहौ मीजा, 36शेलह केनानो मीजा, केनान अर्पक्षदो मीजा हटै अर्पक्षद शेमो मीजा, शेम नोऔ मीजा हटै नोआ लेमेखो मीजा, 37लेमेख मतूशेलहौ मीजा, मतूशेलह हनोको मीजा, हनोक येरेदो मीजा हटै येरेद महलालेलो मीजा, महलालेल केनानो मीजा, 38केनान एनोशो मीजा, एनोश शेतो मीजा हटै शेत आदमो मीजा हटै आदम परमेश्वरो मीजा लेया।
လက္ရွိေရြးခ်ယ္ထားမွု
लूका 3: WMGR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 (Active), Mother Tongue Translators Society and Wycliffe Bible Translators, Inc. All rights reserved.