Dôm Bruk Ngak 21
21
Phao-lô tak Ti-rơ
1Khol dahlak likau drei di khol nhu, tabiak tathik nao tapak tal Kôt. Harei hadei, khol dahlak nao Rô-đơ, thong mưng nan mưrai Pa-ta-ra. 2Pak nan, khol dahlak gōk tha thruh gilai nao tapa Phê-ni-xi yơ trun gilai bloh niga lanưh. 3Tuk ƀôh ƀôn palao Sip, khol dahlak nao tapa adih dat ƀôn palao ni, nao tapak tal Si-ri thong tamư lanưh Ti-rơ, kaywa gilai xang patrun kaya kabha tak nan. 4Hadei di tuk dwah bihu dôm anưk xêh, khol dahlak mưdok vơk thong khol nhu tajuh harei. Dôm anưk xêh bihu Pô Nưbi Ginrơh ganơh, adan Phao-lô jôi tagôk Yê-ru-sa-lem. 5Min tuk dôm harei lơh ywa krung hu tapa, khol dahlak kakal binhôr adhwan. Abih anưk xêh thubik thong hadiup anưk khol nhu ba palao khol dahlak tal lingiu dhan, bloh abih drei jang khôi di takai tathik bloh lang kar. 6Hadei di tuk kanư drei gaup, khol dahlak đik gilai dok dôm anưk xêh gilaic mai thang.
Phao-lô tak Pê-tô-lê-mai thong Sê-sa-rê
7Mưng Ti-rơ, khol dahlak kakal nao bih anôic jalan tathik tal Pê-tô-lê-mai, tanhi ravang dei ai thong mưdok vơk thong khol nhu tha harei. 8#Bruk 6:5; Bruk 8:5.Harei hadei, khol dahlak tagôk jalan nao tal Sê-sa-rê, tamư thang Phi-lip, mưnuix lang pahơh Khao Siam, tha dalam tajuh xêh ragxa, bloh mưdok vơk tak nan. 9Ong hu pāk anưk kamei kanưrup, hu karun đôm hôr. 10#Bruk 11:28.Dalam tuk khol dahlak mưdok vơk tak nan hu dôm harei, hu tha pakat hôr angan A-ga-but mưng Yu-đê trun. 11Ong mưrai ravang khol dahlak, mưk talei kaing Phao-lô girak takai tangin drei bloh đôm: “Sani nạn panôic Pô Nưbi Ginrơh bican: ‘Tak Yê-ru-sa-lem, mưnuix Yo Thaic mưca girak urang hu talei kaing ni yau nan thong jao tamư tangin mưnuix Bôl-Lingiu.’” 12Tuk pang dôm panôic nan, dôm mưnuix dial Pô pak nan thong khol dahlak jang likau di Phao-lô jôi tagôk Yê-ru-sa-lem. 13Min Phao-lô thuuk: “Dei ai hia cok ngak haget ka pađik tung tian dahlak? Kaywa dahlak thudia ô kan gok girak, bahkan ciup mưtai kaywa angan Pô nạn Pô Yê-su tak Yê-ru-sa-lem vơk.” 14Tuk ƀôh ôh mưda pahalar ong bihu vơk, khol dahlak padơh vơk thong đôm: “Likau jamal Pô bihu hajiơng!”
Phao-lô tak Yê-ru-sa-lem
15Hadei dôm harei pak nan, khol dahlak pathô pathai piêh tagôk Yê-ru-sa-lem. 16Hu dôm anưk xêh mưng Sê-sa-rê nao thubik, ba khol dahlak tamư thang Ma-na-sôn palei pak ƀôn palao Sip, nạn tha anưk xêh livik thun, thong khol dahlak mưdok pak nan. 17Tal Yê-ru-sa-lem, khol dahlak bihu dei ai rok daa bui be.
18Harei hadei, Phao-lô nao thong khol dahlak mưrai ravang Ya-kơ. Abih ginôr taha jang hu ƀok tak nan. 19Hadei di tuk tanhi ravang, Phao-lô lak vơk yāup avan xit abih kabha Pô Lingik krung hu ngak di krưh dôm mưnuix Bôl-Lingiu tapa rapajan drei. 20Tuk pang bloh, khol nhu tahamid Pô Lingik, bloh đôm thong Phao-lô: “Xaai lơy, xaai ƀôh pajơ, hu ribau tamưn mưnuix Yo Thaic krung hu dial, abih drei lijang tatang tiak ka hakum jakar. 21Khol nhu krung hu hamit ƀeg ka xaai laic xaai pato dôm urang Yo Thaic dok dang thong mưnuix Bôl-Lingiu xang klāk hakum jakar Mô-se, jôi khao tan ka anưk bik thong jôi tui khik dôm adat caƀat vơk. 22Yau nan, xang kahria yau lei? Kaywa khol nhu kardak thau ka khao xaai krung hu tal bloh. 23Ywa nan ka, likau di xaai xang ngak tui kabha khol dahlak kakei: Khol dahlak hu pāk urang krưh dok khik panôic atak kal. 24Xang ba tui pāk urang ni ngak rija jamưah thubik thong khol nhu, thong biyar jiên ka khol nhu kwah akok. Yau nan, mưca abih drei thau dôm khao ƀeg ka xaai nan ôh njaup, thong thau êng xaai lijang tui khik hakum jakar. 25#Bruk 15:29.Dok nôk mưnuix Bôl-Lingiu krung hu dial, khol dahlak krung hu vak harak ka khol nhu thau ka mư irat khol dahlak, nan nạn: ôh ƀang kaya limah hayap yang, darah, athur bhiêp mưtai bhao thong jôi payar.” 26Phao-lô ba pāk urang nao tui, bloh harei hadei, thubik thong khol nhu ngak rija jamưah; bloh ong tamư huji, brei ka khol nhu thau tuk halei gôn jamưah mưca pathik thong panôja bloh yāup urang dalam khol nhu xang ƀai.
Phao-lô gok mưk dalam huji
27Tuk tajuh harei thi bih, dôm urang Yo Thaic palei pak A-si-a ƀôh Phao-lô dalam huji yơ pacuh bôl bhap mưk ong. 28Khol nhu prêu tagôk: “Bhap paran I-sra-ên lơy, xang mưrai pajup khol dahlak hai! Êng ban ni lang pato graup libik, mưradhag di paran, hakum jakar thong libik ni gêk; hơl vơk, nhu dok ba mưnuix Bôl-Lingiu tamư Huji ngak haruk haram libik likam ni.” 29#Bruk 20:4.Gađi gadha nạn dahlau di nan khol nhu krung hu ƀôh Trô-phim, mưnuix Ê-phê-sô, mưdok thong Phao-lô dalam mưdin hajiơng xanưng laic Phao-lô krung hu ba ong tamư huji. 30Abih dhan jang karen karang, bôl bhap đôic mai mưk Phao-lô hwa tabiak truh di huji, thong binhêt karơk abih baƀang vơk. 31Dalam tuk khol nhu dok krưh dwah ganap pamưtai ong yơ kar pan akok puk jabôl Rô-ma bihu khao laic abih dhan Yê-ru-sa-lem krưh dok brôk kalin. 32Binhêt, ong ba bôl bala thong halau bilang katung tal libik tapôr ralô. Birau ƀôh kar pan akok thong rajabôl yơ khol nhu padơh tangin, ôh tong poh Phao-lô vơk. 33Kar pan akok mưrai jek, mưk Phao-lô thong thurah girak ong vơk mưng dwa talei threng, bloh tanhi ong nạn thei thong krung hu ngak dôm bruk haget. 34Dalam tapôr bôl, ra drêu tagôk yau ni, mưnuix prêu tagôk yau dêh; kar pan akok ôh mưda thau xwel njaup yau halei kaywa tapa racol nan ka thurah ba tamư hajai. 35Tuk Phao-lô yam tagôk pakat lanhe, bôl bala xang cakông ong kaywa tapôr ralô biak xanag harơh. 36Tapôr bôl đôic tui hadei drêu tagôk: “Xang pamưtai nhu mek!”
Phao-lô payah padah ka êng drei
37Tuk thi bihu ba tamư hajai, Phao-lô đôm thong kar pan akok: “Dahlak hu mưda đôm thong ong dôm panôic hu lei?” Ginôr pan akok tanhi: “Hư thau đôm xap Hi-lap lei? 38Yau nan hư ôh njaup nạn ban Ai-kâp dêh, dahlau dêh takik tuk vag krung hu brôk kalin, ba pāk ribau ra pabinax tamư bhum kamrang ô?” 39Phao-lô thuuk: “Dahlak nạn mưnuix Yo Thaic, palei pak Tat-sơ, nưgar Si-li-si, nạn bôl tha mưdin samkhan. Likau xang brei idin ka dahlak đôm thong bôl bhap ngan.” 40Bihu idin bloh, Phao-lô dang ngok pakat lanhe, yêr tangin tabiak habang ka bôl bhap. Tuk abih drei gađang, ong đôm mưng xap Hê-ƀrơ laic:
လက္ရွိေရြးခ်ယ္ထားမွု
Dôm Bruk Ngak 21: CJM2024
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 Bible Society Vietnam. All rights reserved.