Dôm Bruk Ngak 20
20
Phao-lô tak Ma-xê-đô-ni-a thong Hi-lap
1Tuk gruk racol krung hu gađang jwa, Phao-lô daa dôm anưk xêh mưrai paxơh khol nhu, kanư drei bloh tagôk jalan nao Ma-xê-đô-ni-a. 2Ong nao tapa dôm nưgar nan, angui ralô panôic paxơh dôm mưnuix dial Pô, bloh mưrai Hi-lap 3thong mưdok tak nan klau bilan. Tuk thi trun gilai nao Si-ri, Phao-lô gok bôl Yo Thaic padang anngak utan, nan ka ong mư irat nao tapa bhum Ma-xê-đô-ni-a bloh gilaic mai. 4Nao thubik thong ong hu Sô-ƀa-tê, anưk Pi-ru, palei pak Ƀê-rê; A-ri-tag thong Sê-kun-đu palei pak Tê-sa-lô-ni-ka; Gai-ut palei pak Đet-ƀơ; Ti-ci-kơ thong Trô-phim palei pak A-si-a thong Ti-mô-thê. 5Dôm urang ni nao dahlau bloh cang khol dahlak tak Trô-ac. 6Dok khol dahlak, hadei di Rija Tapei Kun yơ trun gilai niga dhan Phi-lip; hadei di limư harei, khol dahlak gōk khol nhu tak Trô-ac, bloh mưdok tak nan tajuh harei.
Phao-lô tak dhan Trô-ac
7Harei ya tha akok karaup, khol dahlak nhom vơk piêh pek tapei. Phao-lô rao lang ka dôm anưk xêh, kaywa harei paguh xang tagôk jalan nan ka ong kưk lang takung ka tal krưh mưlam. 8Hu ralô thang mưnhưk dalam kati glong libik khol dahlak krưh nhom vơk. 9Tha urang dam angan Ơ-tic krưh dok ngok baƀang kathô đih ngut dalam tuk Phao-lô lang biak atah. Kaywa đih biak bingi, nhu mưng pakat lơw ya klau lek trun; tuk mưnuix urang vơh tagôk yơ ƀôh nhu krung hu mưtai. 10Min Phao-lô yam trun, paƀleng rup ngok nhu, kôr nhu bloh đôm: “Jôi tarung tarang, nhu jang dok diup!” 11Phao-lô gilaic tagôk pakat pek tapei bloh ƀang; ong đôm pôic biak chôi ka tal hadah mưng tagôk jalan. 12Mưnuix urang ba urang dam nan nao thang; nhu jang dok diup nan ka abih drei jang bihu pajiông ralô.
Phao-lô tak Mi-lê
13Khol dahlak nao dahlau, đik gilai nao A-xôt, nạn libik mưca khol dahlak rok Phao-lô, kaywa ong jarô nao jalan takai nan ka mưng danôp yau nan. 14Gōk gaup tak A-xôt, khol dahlak rok ong trun gilai bloh ba gaup nao tal Mi-ti-len. 15Bloh mưng libik nan, khol dahlak nao gilai thong harei hadei yơ mưrai gan ƀôn palao Ci-ô. Tapa harei hadei, khol dahlak veh tamư Sa-môt thong nao tha harei tra yơ tal Mi-lê. 16Kaywa Phao-lô krung hu mư irat ciêt nao thrang tapa Ê-phê-sô, mih ôh padơh vơk piêh klah di lihik tuk vag tak A-si-a. Ong nao bhưng bhưng piêh mưyah hu mưda yơ hu ƀok pak Yê-ru-sa-lem dalam harei Rija Limư Akok Karaup.
Phao-lô lang ka dôm ginôr taha pak Ê-phê-sô
17Kal nan, mưng Mi-lê, Phao-lô pachai mưnuix mưrai Ê-phê-sô daa dôm ginôr taha dalam Nhom Nưbi mưrai. 18Tuk khol nhu mưrai, ong đôm thong khol nhu: “Dei ai jang thau, mưng harei tamưrơp jwak takai tal A-si-a, dahlak krung hu dok dang thong dei ai miêt miêt yau halei. 19Dahlak ragxa Pô tha ganap aneh drei, thong ralô ia mưta, thong xang ciup ralô long iơk kaywa mưnuix Yo Thaic padang anngak utan di dahlak. 20Dahlak rao pahơh abih kabha hu hanim ka dei ai, ôh khik vơk kabha haget, thong pato pakai ka dei ai ganap pabiđang, thong mưng thang ni tapa thang dêh; 21dahlak patayơt ralô mưnuix Yo Thaic gam mưnuix Bôl-Lingiu#20:21 ralô mưnuix Yo Thaic... Bôl-Lingiu: Ngan nạn ralô urang Yo Thaic thong mưnuix đôm xap Hi-lap. ka gruk tumal jom thong Pô Lingik thong sagar pak Pô Yê-su, Pô khol drei. 22Dêh, urak ni dahlak bihu Pô Nưbi Ginrơh pabruh nao tal Yê-ru-sa-lem, ôh thau kabha haget mưca mưjiơng tabiak ka dahlak pak nan; 23min Pô Nưbi Ginrơh krung hu brei thau dahlau ka dahlak thau dahlau laic dalam yāup dhan, talei threng thong rijan dok cang dahlak. 24#II Ti 4:7.Min dahlak ôh hakê gruk diup drei nạn banrik, thaka ngak pathik binhôr kacah thong rapajan dahlak krung hu tôk mưk mưng Pô nạn Pô Yê-su, piêh pablo Khao Siam ka karun hanim Pô Lingik.
25Kal nan, dahlak thau laic dalam abih dei ai bloh dahlak krung hu rao lang ka Dit Biya Pô Lingik, mưca ôh thei ƀôh ƀok dahlak vơk. 26Ywa nan ka, harei ni dahlak tôk khik pak anak dei ai laic dahlak ôh hu glaic ka darah abih dei ai. 27Kaywa dahlak krung hu pablo abih kaxat Pô Lingik ka dei ai, ôh khik vơk kabha haget. 28Dei ai xang khik êng drei thong takung bih tapôr pabo bloh Pô Nưbi Ginrơh krung hu padang dei ai ngak mưnuix mong iơk, piêh glang ba Nhom Nưbi Pô Lingik#20:28 Nhom Nưbi Pô Lingik: Dalam tha thanôn blah vak tangin nạn Nhom Nưbi Pô. bloh Bhô krung hu blei mưng êng darah drei#20:28 krung hu blei mưng êng darah drei: Dalam tha thanôn blah vak tangin nạn krung hu blei mưng darah êng [Anưk] drei.. 29Dahlak thau laic hadei di tuk dahlak tabiak nao, mưca hu tapôr athau thing xanag harơh tamư dalam dei ai, ôh damưn tapôr pabo. 30Mưng di krưh dei ai lijang mưca paƀlong tagôk dôm urang lang dôm kabha xwel calah piêh katung hwa dôm anưk xêh tui khol nhu. 31Yau nan, xang pamưdơh, kanal vơk laic dalam klau thun, yāup mưlam thong harei, dahlak ôh padơh hok mưta piêh adan pato abih drei. 32Urak ni, dahlak jao kloh dei ai ka Pô Lingik thong ka anga karun hanim Bhô, nạn anga hu mưda darap thong ƀai dit diya ka dei ai thubik thong abih mưnuix bihu thrah nưbi. 33Dahlak ôh ragơh mưh pariak, ngan khan ao thei trah. 34Êng dei ai thau dwa palāk tangin ni krung hu brei jao dôm hanư jat dahlak thong dôm ayut mưthong ngak bruk thong dahlak. 35Dahlak krung hu lang pato ka dei ai dalam abih bruk laic khol drei xang ngak bruk tanram yau nan piêh pajup dôm urang rwak hakik, thong kanal vơk panôic êng Pô nạn Pô Yê-su krung hu bican: ‘Ƀai brei hu phôl hơl di tôk mưk.’”
36Đôm dôm panôic nan bloh, Phao-lô khôi bloh lang kar thong abih dei ai. 37Abih drei jang hia cok thong kôr takôi Phao-lô bloh cum. 38Khol nhu rau ri lô tuk pang ong đôm laic khol nhu ôh dok ƀôh ƀok ong vơk. Bloh khol nhu ba palao ong đik gilai.
လက္ရွိေရြးခ်ယ္ထားမွု
Dôm Bruk Ngak 20: CJM2024
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2024 Bible Society Vietnam. All rights reserved.