نُومَه وِ کلیسای روم 5
5
صُول وا خدا دِ رَه ایمُو
1پس سی یَکِه دِ رَه ایمُو صالح وِ حِسُو اُوماییمَه، وِ واسطَه خداوندِمُو عیسی مسیح وا خدا هایم دِ صُول. 2اِیما توسطِ او، وَ دِ رَه ایمُو، وِ ایی فیضی کِه ایسِه هایم دِش، دَس پیا کِردیمَه، وَ دِ اُمیدِ جِلالِ خدا شایی میکیم. 3نَه تَنیا دِ یَه، بلکِم دِ عَذُویا هَم شایی میکیم، سی یَکه دُونیم کِه عَذُویا طاقت وِ بار میارَه، 4وَ طاقت، شخصیت وِ بار میارَه، وَ شخصیت اُمید وِ بار میارَه؛ 5وَ اُمید اِیما نِه بور نِمیکَه، سی یَکِه محبتِ خدا توسطِ روحالقدس کِه وِ اِیما عطا بییَه، رِختِسَه دِ دِلِمُو.
6سی یَکه زِمُونی کِه اِیما هَنی دِرمَنَه بیئیم، مسیح وِ موقَعش جُونِشِه نِئا سی بیدینیا. 7سی یَکه کَم پیش میا کِه یَکی جُونِ خُوشِه سی آیِمِ صالحی بَنِئَه، هَرچَن گاس یَکی جرأت بَکَه کِه جُونِ خُوشِه سی آیِمِ خوئی بِئَه. 8اما خدا محبتِ خُوشِه وِ اِیما چِنی نِشُو دَه کِه هِه کِه اِیما هَنی گُنَهکار بیئیم، مسیح سی اِیما مُرد. 9پس، دِ اوچِه کِه، اِیما ایسِه توسطِ خینِ او صالح وِ حِسُو اُوماییمَه، چَنی بیشتِر توسطِ او دِ غَضُوِ خدا نجات پیا میکیم. 10سی یَکه اَر اوسِه کِه وا خدا دُشمِه بیئیم، وِ توسطِ مرگِ کُرِش اِیما نِه وا خُوش صُول دَه، چَنی بیشتِر ایسِه کِه هایم دِ صُول، توسطِ حیاتِ او نجات پیا میکیم. 11نَه تَنیا یَه، بلکِم اِیما کِه وِ واسطَه خداوندِمُو عیسی مسیح، صُولِ وا خدا نِصیوِمُو بییَه، دِ خدا هَم شایی میکیم.
مرگ وِ واسطَه آیِم، حیات وِ واسطَه مسیح
12پس، هِه چِنُو کِه گُنَه توسطِ یِه آیِم اُوما وِ جاهان، وَ مرگ توسطِ گُنَه اُوما، وَ هِه وِ چِنی، مرگ دامُونِ گِردِ آیِمیا نِه گِرِت، سی یَکِه گِرد گُنَه کِردِن، 13سی یَکِه دِ راسی وِرَز یَه کِه حُکمِ شریعت دِئَه بوئَه، گُنَه دِ جاهان بی، اما جائی کِه شریعتی نوئَه، گُنَه وِ حِسُو نِمیا. 14وا ایی حال، دِ آیِم تا موسی، مرگ وِ ری همَه حاکم بی، حتی وِ ری وِنُونی کِه گُنَهشُو جورِ نافِرمُونی آیِم نِوی، آیِم، نمونَه او کسی بی کِه قِرار بی بیایَه.
15اما پیشکَش چی گُنَه نی. سی یَکه اَر توسطِ گُنَه یِه آیِم، خیلییا مُردِن، چَنی بیشتِر فیضِ خدا وَ پیشکَشی کِه توسطِ فیضِ او یِه آیِم، یعنی عیسی مسیح جور بی، کواکو نِصیوِ خیلییا بی. 16وَ ایی پیشکَش هِه چی نتیجَه گُنَه او یِه آیِم نی. سی یَکِه داوَری دِما یِه گُنَه، محکومیَت اُوِرد؛ اما پیشکَش دِ دِما گُنَهیا زیاد اُوما وَ صالحبییِه نِه وا خُوش اُوِرد. 17سی یَکه اَر، وِ سُنَه گُنَه یِه آیِم، توسطِ او آیِم، مرگ سِلطِنَت کِرد، چَنی بیشتِر وِنُو کِه فیضِ بیحَدِحِسُوِ خدا وَ پیشکَشِ صالحبییِه نِه مِئیرَن، توسطِ او آیِم، یعنی عیسی مسیح، دِ حیات سِلطِنَت میکَن.
18پس هِه چِنُو کِه یِه گُنَه باعثِ محکومیَتِ گِردِ آیِمیا بی، یِه عملِ صالح هَم باعثِ صالح وِ حِسُو اُومایِه وَ حیاتِ گِردِ آیِمیا موئَه.
19سی یَکِه هِه چِنُو کِه وِ واسطَه نافِرمُونی یِه آیِم، خیلییا گُنَهکار بییِن، وِ واسطَه اطاعتِ یِه آیِم خیلییا صالح موئَن.
20اِیمدال، شریعت اُوما تا گُنَه زیاد بوئَه؛ اما جائی کِه گُنَه زیاد بی، فیضِ بیحَدِحِسُو بیشتِر بی. 21تا، هِه چِنُو کِه گُنَه دِ مرگ سِلطِنَت کِرد، فیض هَم توسطِ صالحبییِهنی کِه وِ حیاتِ ابدی مِیرَسَه سِلطِنَت میکَه وِ واسطَه خداوندِمُو عیسی مسیح.
လက္ရွိေရြးခ်ယ္ထားမွု
نُومَه وِ کلیسای روم 5: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company