انجیلِ یوحنا 20
20
قُورِ حالی
1دِ اولین روزِ هفتَه، نِزیکِ صُو، هِه کِه هوا هَنی تاریک بی، مریم مَجدَلیَه اُوما وِ سَرِ قُور وَ دی کِه هُوگِلَه دِ وَرِ قُور وِرداشتِسی. 2اوسِه نِئا وا دُو وَ رَت وِ تِه شَمعون پِطرُس وَ او شاگردِ هَنی، کِه عیسی دوسِش داشت، وَ وِشُو گُت: «آقامُو نِه دِ قُور بُردِنَه وَ نُئُونیم نِئانِشَه کجا.» 3اوسِه پِطرُس واردِ او شاگردِ هَنی کِردِن وِ دَر، رَتِن والا مقبِرَه. 4وَ هَر دِک وا یَک می‌نِئان وا دو؛ اما او شاگردِ هَنی تندتِر رَت، زَه وا نِها پِطرُس، وَ اول رَسِس وِ مقبِرَه. 5اوسِه دولو بی، سِیل کِرد وَ دی کِه پارچَهیا کَفِه هان دوچِه، اما نَرَت وِ مینِ مقبِرَه. 6شَمعونِ پِطرُس هَم اُوما دِ دُمِش وَ رَت وِ مینِ مقبِرَه، دی کِه پارچَهیا کَفِه هان دوچِه، 7اما لَچِکی کِه بَستِسی دُورِ سَرِ عیسی، وِ تِه پارچَهیا کَفِه نی، بَلکم تا بی‌یَه وَ دِ جائی هَنی نِئایِسَه. 8اوسِه او شاگردِ هَنی هَم کِه اول رَسِسی وِ مقبِرَه، اُوما وامی وَ دی وَ باوَر کِرد. 9سی یَکه هَنی نیسَنَه مقدسِ نِه درک نَکِردینی کِه او بایِس دِ مُردَه‌یا زِنَه بوئَه. 10اوسِه او دو شاگرد وِرگَشتِن وِ حُونَه خُوشُو.
دیاری بی‌یِه‌نِ عیسی وِ مریم مَجدَلیَه
11اما مریم، دِ دَر، نِزیکِ مقبِرَه اِیسایی وَ می‌گِریوِس. او وا گِریوَه نِم بی تا مینِ مقبِرَه نِه سِیل بَکَه. 12اوسِه دو فرشتَه نِه دی کِه جُومَه‌یا اِسبی دِ وَرشُو بی، وَ نِشِسینی اوچِه کِه جِنازَه عیسی نِئایِسی، یَکی دِ جا سَر وَ یَکی هَنی دِ جا پایاش. 13وِنُو وِش گُتِن: «اِ زَ، سی چی می‌گِریوی؟» او جُئُو دَه: «آقامِه بُردِنَه وَ نُئُونِم کجا نِئانِشَه.» 14هِه کِه یَه نِه گُت، وِرگَشت وَ عیسی نِه دی کِه اِیسایَه دِ اوچِه، اما او نِه نَشناخت. 15عیسی وِش گُت: «اِ زَ، سی چی می‌گِریوی؟ مِنی کی می‌کی؟» مریم وِ گِمُونِ یَه کِه باغِوُونَه، گُت: «آقا، اَر تو او نِه وِرداشتییَه، وِ مِه بُو کجا نِئائیشَه تا رُوئِم وَ او نِه وِردارِم.» 16عیسی هِنا کِرد: «مریم!» مریم ری لِرَن والاش وَ وِ زِوُونِ آرامی گُت: «رَبونی!» اُستاد! 17عیسی وِش گُت: «دَس نَنی وِم، سی یَکِه هَنی وِ تِه بُوَه بالا نَرَتِمَه. بَلکم رُو وِ تِه بِرارُونِم وَ وِشُو بُو کِه مِی‌رِم بالا وِ تِه بُوَه خُوم وَ بُوَه شِما وَ خدای خُوم وَ خدای شِما.» 18مریم مَجدَلیَه رَت وَ وِ شاگردیا خَوَر دَه کِه «خداوندِ نِه دیمَه!» وَ هَر چیئی کِه او وِش گُتی، وِشُو گُت.
دیاری بی‌یِه‌نِ عیسی وِ شاگردیا
19اِیوارَه هِه او روز، کِه اولین روزِ هفتَه بی، اوسِه کِه شاگردیا دُورِ یَک بییِن وَ دَریا دِ زَلَه یهودیُو قُلف بی، عیسی اُوما وَ اِیسا دِ مینِشُو وَ گُت: «سِلام وِ شِما!» 20هِه کِه یَه نِه گُت، دَس‌یا وَ پَلی خُوشِه وِشُو نِشُو دَه. شاگردیا وا دیئِه‌نِ خداوند خیلی خُشال بییِن. 21عیسی دُوارَه وِشُو گُت: «سِلام وِ شِما! هِه چِنُو کِه بُوَه، مِه نِه کِل کِردَه، مِه هَم شِما نِه کِل می‌کِم.» 22هِه کِه یَه نِه گُت، پُف کِرد وِشُو وَ گُـت: «روح‌القدس نِه بِئیریت. 23اَر گُنَه‌یا کسی نِه بَوَخشیت، وِشُو بَخشییَه موئَه؛ وَ اَر گُنَه‌یا کسی نِه نَوَخشیَه بِئیلیت، نَوَخشیَه می‌مُونَه.»
عیسی وَ توما
24هِه کِه عیسی اُوما، توما، یَکی دِ او دُوازَه نفر، کِه هِناش می‌کِردِن لِفُونَه، واشُو نِوی. 25اوسِه باقی شاگردیا وِش گُتِن: «خداوندِ نِه دیئیمُونَه!» اما او وِشُو گُت: «تا خُوم نِشُونَه میخ‌یا نِه دِ دَس‌یاش نِئینِم وَ کِلِکِ خُومِه نَنیئِم دِ جا میخ‌یا، وَ دَسِ خُومِه نَنیئِم دِ سیلا پَلیش، باوَر نِمی‌کِم.» 26دِما هشت رو، شاگردیا عیسی، دُوارَه دِ حُونَه بییِن وَ توما هَم واشُو بی. هِه چِنُو کِه دَریا قلف بی، عیسی اُوما وَ اِیسا دِ مینِشُو وَ گُت: «سِلام وِ شِما!» 27اوسِه وِ توما گُت: «کِلِکِ خُوتِه ایچِه بَنی وَ دَس‌یامِه سِیل کُو، وَ دَسِ خُوتِه بیار وا وَر، وَ بَنی دِ سیلا پَلیم. بی‌ایمُو نو، بَلکم باوَر داشتو.» 28توما وِش گُت: «خداوندِ مِه وَ خدای مِه!» 29عیسی گُت: «یعنی سی یَکِه مِه نِه دیئی باوَر کِردی؟ خُشالِ وِنُونی کِه نِئییَه، ایمُو بیارَن.»
هِدَفِ ایی کِتُو
30عیسی نِشونَه‌یا وَ معجزَه‌یا زیادِ هَنی دِ بِرُووَرِ شاگردیا اَنجُوم دَه، کِه دِ ایی کِتُو نیسَنَه نِویَه. 31اما یِنُو نیسَنَه بی تا ایمُو بیاریت کِه عیسی هِه او مسیحِ موعود، کُرِ خدا اَ، وَ تا وا ایی ایمُو، دِ نُومِ او حیات داشتوئیت.
လက္ရွိေရြးခ်ယ္ထားမွု
انجیلِ یوحنا 20: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company