کاریا رسول‌یا 3
3
شَفا گدا شَل
1یِه رو پِطرُس وُ یوحنا دِ ساعتِ سِه بعدظهر کِه موقَع دعا بی، مِی‌رَتِن والا معبدِ خداوند. 2دِ او موقَع، قَری، پیائی نِه کِه مادرزاد شَل بی، می‌اُوِردِن. وِنُو هَر رو وَه نِه دِ وَرِ دَروازَه معبد کِه ’دروازَه قِشَنگ‘ نُوم داشت می‌نِئان تا دِ مردِمی کِه مِی‌اُومان وِ مینِ معبد، صِدَقَه بِئیرَه. 3هِه کِه او پیا، پِطرُس وُ یوحنا نِه دی کِه می‌حان بیان وِ مینِ معبد، دِشُو صِدَقَه حاس. 4پِطرُس گِز بُری وِش وُ یوحنا هَم هِه چِنُو، پِطرُس گُت: «سِیلِمُو کُو بِئینِم!» 5اوسِه او پیا سِیلِشُو کِرد وُ وِ تَما بی تا چیئی وِش بِئَن.
6اما پِطرُس وِش گُت: «مِه نَه طِلا دارِم نَه نقرَه، اما دِ چیئی کِه دارِم وِت مِی‌ئِم! وِ نُومِ عیسی مسیحِ ناصری وِری وِ رَه رُو!» 7اوسِه دَسِ راسِ پیا نِه گِرِت وَ او نِه بُلِن کِرد. هِه جاوِرجا ساقِ پایا وَ قُل‌یاش جُو گِرِت. 8دِ جا پِرِس وَ اِیسا وَ گُوم وِرداشت. اوسِه نِئا وِ غِنجِلَک‌کِردِه وَ خدا نِه شکر می‌کِرد وُ واشُو رَت وِ مینِ معبد. 9گِردِ مردِم او نِه دیئِن کِه وِ رَه مِی‌رَه وَ خدا نِه شکر می‌کَه، 10وَ اِشناختِنِش کِه هِه وَه‌آ کِه وِرَز یَه سی گِرِتِه‌نِ صِدَقَه وِ رُونَه "دَروازَه قِشنگِ" معبد مینشِس، پس، دِ او چیئی کِه وِ سَرِش رَتی، ماقِشُو بُرد وُ بِلاجیشُو اُوما.
تعلیمِ پِطرُس دِ اِیوُونِ سِلِیمُو
11هِه اوسِه کِه او پیا واردِ پِطرُس وُ یوحنا مِی‌رَت وَ دِشُو سَوا نِمِوی، گِردِ مردِم هِه چِنُو کِه ماقِشُو بُردی، دِ "اِیوُونِ سِلِیمُو" والا وِنُو نِئان وا دُو. 12هِه کِه پِطرُس یَه نِه دی، ری کِرد وِ جمعیت گُت: «پیایا اسرائیلی، سی چی دِ ایی کار بِلاجیتُو میا؟ سی چی چِنی گِز بُریئیتَه وِمُو، چِنُو کِه مَری وا زور وُ دینداری خُومُو، کاری کِردیمَه تا ایی پیا بَتُونَه رَه رُوئَه؟ 13خدای ابراهیم، خدای اسحق، خدای یعقوب، خدای بُوَه‌یا اِیما، پاکارِ خُوش عیسی نِه جِلال دَه، هِه وَه کِه شِما تسلیمِش کِردیت وَ دِ حضورِ پیلاتُس حاشاش کِردیت، هَر چَن نظرِ پیلاتُس یَه بی کِه آزادِش بَکَه. 14شِما بیئیت کِه دَسِ رَد وِ سینَه او قدوس وُ عادل زِئیت وَ حاسیت قاتلی دِ جالِش وِتُو بَخشیَه با. 15شِما سَرچَشمَه حیاتِ نِه کُشتیت، اما خدا او نِه دِ مینِ مُردَه‌یا زِنَه کِرد وَ اِیما شاهدِ یِنَه‌آیم. 16وَ وِ سُنَه ایمُو وِ نُومِ عیسی، نُومِ عیسی ایی پیا نِه کِه مِئینیت وَ می‌شناسیت، جُو بَخشیَه، وِ حَتمی، او ایمُونی کِه توسطِ عیسی خداوند اَ، ایی پیا نِه دِ وَرِ چَشِتُو ساق‌وُسالم کِردَه.
17«وَ ایمدال بِرارُو، دُونِم کارِ شِما دِ ری نایُونی بی، دُرِس هِه چِنُو کِه گَپُونِتُو هَم کِردِن. 18اما خدا هِه دِ ایی رَه، او چیئی نِه کِه وِ زِوُونِ گِردِ پِیغَمَریا گُتی وِ اَنجُوم رَسَن: یَه نِه کِه مسیحِ او عَذُو می‌کَشَه. 19پس توبَه بَکیت وَ وِرگَردیت والا خدا تا گُنَه‌یاتُو پاک با وَ روزیا فِراغت وُ شایی دِ حضورِ خداوند سیتُو بَرَسَه. 20تا خدا، مسیحِ موعودِ نِه کِه دِ زی سیتُو نِئایی، رِ بَکَه، یعنی هِه او عیسی 21کِه بایِس آسمُو پذیراش مِئی تا زِمُونی کِه همَه چی بِنا وِ او چیئی کِه خدا دِ قدیم وِ زِوُونِ گِردِ انبیا مقدسِ خُوش گُتَه، زِنَه بوئَه. 22موسی گُتَه: ”خداوند خدا، دِ مینِ بِرارُونِتُو، پِیغَمَری هِه چی مِه سیتُو رِ می‌کَه، وَ شِما هَر چیئی کِه وِتُو مُوئَه، خو گوش بِئیریت. 23هَر کَه وِ او پِیغَمَر گوش نِئیرَه، دِ مینِ قُوم نابود موئَه.“ 24«سموئیلِ نبی وَ گِردِ پِیغَمَریا دِ سموئیل وا دِما هَم، گِردِشُو یِه دَنگ دِ بارَه ایی روزیا گُتِنَه. 25شِما بَچُونِ پِیغَمَریا هیسیت وَ وارث‌یا او عَهدی کِه خدا وا بُوَه‌یاتُو بَست. وِ سُنَه او زِمُونی کِه وِ ابراهیم گُت: ”دِ نسلِ تو گِردِ قُوم‌یا ری زِمی برکت مِئی‌رَن.“ 26زِمُونی کِه خدا پاکارِ خُوش عیسی نِه انتخاب کِرد، اول او نِه وِ تِه شِما رِ کِرد تا شِما نِه برکت بِئَه، تا هَر کُوم دِ شِما نِه دِ رَه‌یا شَرِگَرِ خُوتُو وِرگَردِنَه.»
လက္ရွိေရြးခ်ယ္ထားမွု
کاریا رسول‌یا 3: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company