کاریا رسول‌یا 12
12
کُشِسِه‌نِ یعقوب وَ هُلِفدُونی بی‌یِه‌نِ پِطرُس
1دِ ایی روزیا، هیرودیسِ پاتشا نِئا وِ عَذُودِئِه‌نِ قَری دِ ایمُوداریا کلیسا. 2وِ هُدِ او یعقوب بِرارِ یوحنا نِه وا شِمشیر کُشتِن. 3وَ هِه کِه دی ایی کار، یهودیا نِه خُشال کِرد، گُومِ گَپتِری وِرداشت وُ پِطرُسِ نِه هَم وَن دِ گیر. یَه دِ روزیا عیدِ فَطیر اتفاق اُفتا. 4هیرودیس دِما گرفتار کِردِه‌نِ پِطرُس، او نِه وَن وِ هُلِفدُو وَ چهار دَسَه چهار نفری نِه نِئا سی نِگَهبُونیش. وَ قَصت داشت دِما عیدِ پِسَخ، پطرسِ نِه دِ وَرِ چَشِ مردِم محاکمَه بَکَه.
5پس پِطرُسِ نِه حبس کِردِن، اما کلیسا وِ درگاه خدا یِه سِرَه سیش دعا می‌کِرد.
6یِه شُو وِرَز روزی کِه هیرودیس قَصت کِردی پِطرُس نِه وِ محاکمَه بَکَشَه، پطرس وا دو زنجیر زالِنَه بیئی وَ حُفتیئی دِ مینجا دو سَرواز، و نِگَهبُونیا هَم جِلو درِ هُلِفدُو کِشِک مِی‌دَن. 7یِگِلی یِه فرشتَه خداوند اُوما خُوشِه دیاری کِرد وُ بِریقَه نیری اُفتا دِ مینِ هُلِفدُو. فرشتَه زَه وِ پَلی پِطرُس وُ بیارِش کِرد وُ گُت: «زی وِری!» آزِعی زنجیریا دِ دَس‌یاش اُفتان وِ هار.
8فرشتَه وِش گُت: «قِی‌تِه بَوَن وُ اُرِسی‌یاتِه بَک دِ پا.» پِطرُس چِنی کِرد. اوسِه فرشتَه وِش گُت: «سِتِرَه‌تِه خو پِلِپیچ کُو وِ خُوت وُ بیا دِ دُمِ مِه.» 9پس پِطرُس دِ هُلِفدُو کِرد وِ دَر وُ اُفتا وِ رَه دِ دُمِ فرشتَه رَت. اما باوَر نِمی‌کِرد کِه او چیئی کِه فرشتَه می‌کَه، واقعی اَ، بلکِم گِمُو می‌کِرد خُو مِئی‌نَه. 10وِنُو دِ نِگَهبُونیا اول وَ دوئِم رَد بییِن وَ رَسِسِن وِ دِراغِلِ آهِنی‌ای کِه واز مِئی ری وِ شهر. دِراغِل خود وِ خود دِ وَرِ ریشُو گُشِس. اوسِه رَتِن وِ دَر وُ هِه یَکِه رَسِسِن وِ آخِرِ جَدَه، یِگِلی فرشتَه غِیو بی.
11اوسِه پِطرُس اُوما وِ خُوش وُ گُت: «ایسِه دَ دُونِم کِه خداوند فرشتَه‌شِه کِل کِردَه وَ مِه نِه دِ قَپِ هیرودیس وَ او بِلائی کِه قُومِ یهود توقع داشتِن تا بیا وِ سَرِم، راها کِردَه.»
12هِه کِه یَه نِه فَمِس، رَت وِ حُونَه مریم داآ یوحنا معروف وِ مَرقُس. دِ اوچِه بُری دِ دُورِ یَک بییِن وَ دعا می‌کِردِن. 13هِه کِه پِطرُس درِ حُونَه نِه کُفت، زِئنَه پاکاری وِ نُومِ رُودا اُوما تا درِ نِه بَگُشَه. 14اما هِه یَکِه دَنگِ پِطرُسِه اِشناخت، دِ زورِ خُشالی، دَرِ نِه وانَکِردَه، وا دُو رَت وامی وُ گُت: «پِطرُس ها پُشتِ در!»
15وِنُو وِش گُتِن: «مَر لیوَه بیئیَه؟» اما هِه کِه دیئِن سِمِر اِیسایَه، گُتِن: «لابد فرشتَه‌شَه.»
16دِ ایی مابِین، پِطرُس هِه چِنُو رِمِ دَرِ نِه گِرِتی. دَسِ آخِر، هِه کِه دَرِ نِه واز کِردِن، وا دیئِه‌نِ او ماقِشُو بُرد. 17پِطرُس وا اشارَه دَس، وِشُو فَمَن بی‌کِش بان وَ تعریف کِرد کِه چطور خداوند او نِه دِ هُلِفدُو راها کِردَه. اوسِه گُت: «یعقوب وُ باقی بِرارُو نِه دِ ایی جریان واخَوَر بَکیت.» اوسِه رَت وِ جائی هَنی.
18وِ صُوش، دِ مینِ سَروازیا بَلوا سختی اُفتا، سی یَکِه نُئُونِسِن چی اُومایَه وِ سَر پِطرُس. 19هیرودیس هُد کِرد همَه جا مِنی پِطرُس بَکَن؛ وَ هِه کِه او نِه پیا نَکِردِن دِ نِگَهبُونیا بازخواس کِرد وَ حُکمِ قتلِشُو نِه دَه. دِما وَه هیرودیس دِ یهودیَه رَت والا قیصریَه وَ مدتی مَن دِ اوچِه.
مُردِه‌نِ هیرودیس
20ایمدال هیرودیس وِ مردِمِ صور وُ صیدون غیظ گِرِتی. زوتا یِه‌دِل رَتِن وِ تِه‌ش وَ اِجازَه شرفیابی حاسِن. وِنُو بلاستوس پیشکارِ مخصوصِ شاه نِه راضی کِردِن، می‌حاسِن صُول بَکَن، سی یَکِه خوراک وُ روزیشُو دِ دیارِ هیرودیس جور مِئی.
21دِ او روزِ مخصوص، هیرودیس سِتِرَه شائی دِ وَر کِرد، نِشِس وِ ری تختِش دِ جاکَه خُوش وُ سی جماعت نُطقی کِرد. 22مردِم قارَنِن: «یَه دَنگِ یِه آیِم نی بلکِم دَنگِ یِه خدا اَ!» 23دَرجا یِه فرشتَه خداوند او نِه زَه، چِنُو کِه کِرم‌یا بدنِشِه حَردِن وُ مُرد، سی یَکِه خدا نِه جِلال نَدِئی.
24اما کلُومِ خدا بیشتِر وُ بیشتِر پَخش مِئی وَ مِی‌رَت وِ همَه جا.
25وَ هِه کِه بَرنابا وَ شائول پیشکَش‌یا مسیحی‌یا نِه دَن وِ کلیسا، دِ اورشلیم وِرگَشتِن وَ یوحنا معروف وِ مَرقُسِ نِه هَم واردِشُو اُوِردِن.
လက္ရွိေရြးခ်ယ္ထားမွု
کاریا رسول‌یا 12: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company