کاریا رسول‌یا 11
11
لاپُرتِ پِطرُس وِ کلیسا
1رسول‌یا وَ بِرارُونی کِه دِ سَرتاسَرِ وِلاتِ یهودیَه بییِن، اِشنَفتِن کِه غیرِیهودیُو هَم کلُومِ خدا نِه قبول کِردِنَه. 2پس هِه کِه پِطرُس رَت وِ شهرِ اورشلیم، لادِراریا دَسَه ختنَه دِش ایراد گِرِتِن، گُتِن: 3«تو رَتی وِ حُونَه ختنَه‌نِویَه‌یا وَ واشُو هُمسِفرَه بیئی.»
4پِطرُس گِردِ جریان نِه دِ اول تا آخِر مفصل سیشُو تعریف کِرد، وُ گُت: 5«مِه دِ یافا داشتِم دعا می‌کِردِم کِه رَتِم وِ خَلسَه وَ دِ رُویا دیئِم چیئی هِه مَرِس سِفرَه گَپی کِه دِ چار‌چَمَکِش دُر بیئی، دِ آسمُو اُوما وِ هار وُ رَسِس وِ مِه. 6هِه کِه خو سِیل کِردِم، چاروایا وُ جُونِوَریا وحشی وُ خزندَه‌یا وُ بالِنَه‌یا وِ ریش دیئِم. 7اوسِه دَنگی اُوما وِ گوشِم کِه می‌گُت: ”پِطرُس، وِری، سَر بُوئُور وُ بُحُور.“
8«اما مِه گُتِم: ”حاشا دِ مِه، خداوند، سی یَکِه هرگز وِ چی حَرُوم یا نِجِسی لُوء نَزَمَه.“
9«اما سی گِلِ دوئِم دِ آسمُو دَنگی اُوما کِه ”او چیائی کِه خدا پاک دُونَه، تو نِجِس نُئُونِسو.“ 10وَ ایی امر سِه گِل تکرار بی؛ اوسِه گِردِ او چیا کَشِس وِ بالا آسمُو.
11«هِه دِ او موقَع، سِه پیا کِه دِ شهرِ قیصریَه کِل بیئینی وِ تِه مِه، رَسِسِن وِ حُونِه‌ای کِه مِه دِش بیئِم. 12روحِ خدا وِم گُت کِه واشُو رُو وَ هیچ فرق نَنی. ایی شَش بِرار هَم وا مِه اُومان، وَ اِیما رَتیم وِ حُونَه او پیا. 13او سیمُو تعریف کِرد کِه چطور دِ حُونَه خُوش فرشتِه‌ای دیئَه کِه وِش گُتَه: ”قَری نِه کِل کُو وِ یافا وَ شَمعونِ معروف وِ پِطرُسِ نِه بیار وِ ایچِه. 14او وِ تو پِیغُومی مِی‌ئَه کِه وِ واسطَه او پِیغُوم، تو نجات پیا می‌کی، هَم تو وَ هَم گِردِ هوزِحَضِراتِت.“
15«هِه یَکِه نِئام وِ قِصَه کِردِه، روح‌القدس وِ ریشُو قِرار گِرِت، دُرِس هِه چِنُو کِه گِلِ اول وِ ری اِیما قِرار گِرِتی. 16اوسِه او چیئی کِه خداوند گُتی نِه اُوِردِم وِ ویر کِه فَرمایِشت کِردی: ”یحیی وا اُو تعمید دَه اما شِما وا روح‌القدس تعمید مِئی‌ریت.“ 17ایمدال، اَر خدا هِه او عطا نِه وِشُو دَه کِه دِما ایمُواُوِردِه وِ عیسی مسیح خداوند وِ اِیما عطا کِردی، پس مِه کی بام کِه باحام جِلو کارِ خدا نِه بِئیرِم؟»
18وِنُو هِه کِه ایی قِصَه‌یا نِه اِشنَفتِن، بی‌کِش مَنِن وَ خدا نِه جِلال دَن وُ می‌گُتِن: «پس خدا وِ غیرِیهودیُو هَم ایی مِجالِه دِئَه تا توبَه بَکَن وُ حیاتِ ابدی نِه وِ دَس بیارَن!»
کلیسا اَنطاکیَه
19دِما کُشِسِه‌نِ اِستیفان وُ عَذُو وُ اذیتی کِه دِما وَه وِ ایمُوداریا اورشلیم رَت، وِنُونی کِه جیستینی وَ دِ یَک تَرفِه‌تین بیئینی، رَتِن تا هورَه فینیقیَه وَ قبرس وَ اَنطاکیَه. وِنُو کلُومِ خدا نِه وِ هیشکَه نِمی‌گُتِن وُ تَنیا وِ یهودیُو اِعلُوم می‌کِردِن وُ بَس. 20اما دِ مینِ وِنُو قَری دِ مردِمُونِ قبرس وَ قیرَوان بییِن کِه هِه کِه رَسِسِن وِ اَنطاکیَه، وا یهودیُونِ یونانی زِوُو هَم، صُبَت کِردِن وَ عیسی خداوندِ نِه وِشُو بشارت دَن. 21دَسِ خداوند هَم واشُو بی وَ دَسَه زیادی ایمُو اُوِردِن وُ ری کِردِن وِ خداوند.
22هِه یَکِه ایی خَوَر رَسِس وِ کلیسا اورشلیم، برنابا نِه رِ کِردِن وِ اَنطاکیَه. 23هِه یَکِه برنابا رَسِس ووچِه وُ فیضِ خدا نِه دی، خُشال بی وُ همَه نِه تشویق کِرد تا وا تمُومِ دِل‌وُجُو وا خداوند بَفادار بَمُونَن، 24سی خاطرِ یَکِه برنابا پیا خو وُ پُر دِ روح‌القدس وُ پُر دِ ایمُو بی. هِه وِ چِنی مردِمِ زیادی وِ خداوند ایمُو اُوِردِن.
25پس دِما وَه، برنابا رَت وِ تَرسوس تا شائولِ نِه پیا بَکَه. 26وَ هِه کِه پیاش کِرد، او نِه اُوِرد وِ اَنطاکیَه. وِنُو دِ اوچِه یِه سال تمُوم وا کلیسا جمع مِوین وَ مردِمِ زیادی نِه تعلیم مِی‌دَن. دِ اَنطاکیَه بی کِه وِ شاگردیا سی گِلِ اول «مسیحی» گُتِن.
27دِ او روزیا چَن نبی دِ اورشلیم اُومان وِ اَنطاکیَه. 28یَکی دِشُو کِه آگابوس نُوم داشت، وِریسا وَ وا الهامِ روح‌القدس نبوت کِرد کِه قَطی سختی سَرتاسَرِ دنیا نِه مِئی‌رَه. ایی قَطی دِ زِمُونِ قیصرِ روم کلودیوس اتفاق اُفتا. 29پس شاگردیا قِرار نِئان کِه هَر کُوم وِ قَدِ تَوانِشُو، کمکی کِل بَکَن سی بِرارُونی کِه دِ یهودیَه زِنِه‌ئی می‌کِردِن. 30وِنُو چِنی کِردِن وَ پیشکَشی‌ای وِ دَسِ برنابا وُ شائول کِل کِردِن سی مشایخ.
လက္ရွိေရြးခ်ယ္ထားမွု
کاریا رسول‌یا 11: NLB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company