नेवताळान काम 20
20
पोलुस मकीदुनीया, ने अखाया जाय
1माणसे दवड़ीन आया ने अळतेन चे सींग पड़ने बाजी गुयो, ती पोलुस ईसुन चेला काजे बुलावीन समजाड़्यु, ने तीनु काजे आवजु कयदीन चां सी मकीदुनीया भीणी चाल पड़्यु। 2ने चु तीना परदेस मां सी हय्न ने माणसे काजे बेसकु सांती आप्यु चां सी युनान जीला मां जाती रयु। 3ने पोलुस चां तीनेक महना रयु काहाकी यहुदी माणसे तीना काजे मारने करीन जाळसांदी नाख रवला, ने अळतेन वीच्यार नीकाळ्यु की मे ढंड्या मां बसीन सीरीया जात रवीस, बाकुन अळतेन चु अळी वीच्यार कर्यु की मे मकीदुनीया पछु जात रवीस ने चाल पड़्यु। 4बीरीया सहर वाळु पुर्रुसेन पुर्यु सोपतुरुस ने थीसलुनीकीया मां रहणे वाळा अरीस्तारकुस ने सीकुन्दुस ने आसीया वाळा तुखीकुस ने तरुफीमुस ने दीरबे वाळु गयुस ने तीमुथीयुस तेरे पुठ्ये आसीया लग आया। 5चे माणसे पेहलुत तरोआस मां जाय्न हामरी वाट देख रवला। 6अखमीरी रुटान तीहवार हय गुयु, ने अळी हामु फीलीपी सहर सी मटला ढंड्याम बसीन तरोआस भीणी चाल पड़्या। ने पांच दाहड़ाम हामु तरोआस पुग्या। ने चां हामु सात दाहड़ा रया।
पोलुसेन तरोआस मां आकरी भेट
7हाप्तान पेहले दाहड़े हामु रुटु तुड़ने वाटे भेळा हया, ती पोलुस माणसे सी वात कर्यु, ने चु दीसरे दाहड़े जाणे वाळु हतलु, ने तींद्रे सी वात कर्यु, ने आधली रात लग वाते करतुत रयु। 8हामु तीना घरेन उपरी खुली मां भेळा हय रवला, चांहा बेसका दिवा धपाड़ीन मेल रवला। 9ने युतुखुस नावेन एक जुवान पुर्यु खीड़की पर बठ रवलु, ने बेसकी नीद आय रवली जत्यार पोलुस बेसकी वार लग वाते करतु रयु, ती चु नीदेन झपकी मां तीसरी मंजील पर सी हीटी पड़्यु, ने जत्यार हाकलीन लाया ती चु मरी गुयलु। 10बाकुन पोलुस नेचु उतरीन हेरेसी चस्टाय गुयु, ने गळे लागाड़ीन कह्यु “घाबरायु मां हयु जीवलुत छे।” 11बाकुन चु उपर गुयु, ने रुटा काजे तुड़ीन वाट्यु ने खादु। ने हयु तींद्रे साते बेसकी वार ने तींद्रे सी दाहड़ु उंगते लग वात करतु रयु, ने पोलुस तीनुक छुड़ीन जाती रयु। 12ने चे तीना जुवान पुर्या काजे चे जीवतेलु घर ली आया, ने बेसका सांती ने खुसी मां हय गुया।
तरोआस सी मीलेतुस मां पोलुस जाय
13हामु पेहलुत ढंड्या मां बसीन अस्सुस भीणी गुया, की चां सी हामु पोलुस काजे चड़ाय लेसुन, काहाकी हयु ज्य हेरेसी ठेरावलु हतलु की आपसु चालीन जाणे वाळु हतलु। 14जत्यार पोलुस अस्सुस मां हामु काजे भेळु हयु, ती हामु तीना काजे ढंड्या पर चहड़ाया ने हामु मीलेतुस भीणी चाल पड़्या। 15चां सी ढंड्या काजे छुड़ीन हामु दीसरे दाहड़े खीयुस गुया ने दीसरे दाहड़े सामुस मां जाय पड़्या अळतेन दीसरे दाहड़े मीलेतुस मां आया। 16काहाकी पोलुस जाहां लग हय सके पेन्तेकुस्तेन दाहड़े लग यरुसलेम मां मामार जाणेन कुसीत कर रवलु, तेरेमां हयु नक्खी कर्यु की हयु ईफीसुस मां हुबु नी रवे ने अघुत जाती रवसे, काहाकी तीनाक आसीया मां रहणु नी पड़े।
ईफीसुसेन डाह-डाहा माणसे काजे सीकाड़े
17हयु मीलेतुस सी ईफीसुस मां कय मकल्यु ने मंडळीन डाहा-बुड़ा माणसे काजे आपसा धड़े बुलायु। 18जत्यार चे हेरे धड़े आया ती तींद्रे सी कह्यु तुहुंं जाणु की पेहलेत दाहड़े सी जत्यार मे आसीया मां पुग्यु मे आखी टेमे तुंद्रे साते काहाली रीत सी रयु। 19मतलब वारु भाव सी ने आसळा पाड़ी-पाड़ीन ने ईनु पारख मां ज्य यहुदीयान माणसेन कुहरायन वजे सी मार पर आय पड़ी मे मालीकेन चाकरी करतुत रयु। 20ने जी-जी वाते तुंद्रे फायदान हतली तीनुक बताड़ने ने माणसे अगळ ने घर-घर सीकाड़ने सी कदी नी पछु हयु। 21यहुदी ने नी-यहुदी माणसे काजे मे बराबर भाव सी मन फेरवणेन भगवान भीणी फीरु करीन कय रयु ने, आपणा मालीक ईसु मसी मां भुरसु करु करीन तीनुक कवतु रयु। 22ने हय देखु मे चुखली-आत्मान अगवाय मां बांदायन मे यरुसलेम जाय रयु। मे नी जाणु की चां मार साते काय हवसे। 23अळतेन ज्य की चुखली-आत्मा आखा सहर मां गवाय दी-दीन मार सी कह्वे की बांदायणु ने दुख तारी वाट देख रय। 24बाकुन मारे वाटे आपणा जीवेन काय बी कीमत नी हय। मे ते बस दवड़नु ने तीनी सेवा काजे पुरो करने चाही र्यु तीनाक मालीक ईसु सी जड़लो छे चो गुयो छे भगवानेन गीण-दयान गवाय देणु।
25हय देखु मे जाणो की तुहुंं, आखा तींद्रे मां भगवानेन राजेन परचार करतु रयु, ने मेसे अळी कदी नी देखसु। 26तेरेमां आज मे तुंद्रे अगळ गवाय दीन कह्वो की मे तुंद्रे मां सी काहनान बी लुहीन गुनाळु नी हय। 27काहाकी मे भगवानेन आखी मरजी काजे तुंद्रे अगळ पुरी रीत सी बताड़ने मां कदी बी पछु नी पड़्यु। 28हेरेसी आपणी ने आखा टुळान देख-भाळ करु तेरेमां चुखली-आत्मा तुहुंं काजे मुख्या ठेरावलु छे की तुहुंं भगवानेन मंडळीन राखवाळी करु तीना काजे हयु आपणा लुही सी मुल ली लेदलु छे। 29मेसेक मालुम छे, की मारे जाणेन पछे तुंद्रे ईचमां धरन्या लेंड्या आवसे ने चे भुळा-भाळा टुळा काजे नी छुड़े। 30ने अतरो बी की तुंद्रे आपणे ईचमां सीत असा माणसे बी उबा हवसे, जे चेला काजे आपसे पछळ चालाड़ने वाटे वात काजे गलत सलत वात सीकाड़से। 31हेरेसी जागता रवु ने हेर करु की मे तीन साल लग रात ने दाहड़ु रड़ीन-रड़ीन एकेक काजे चेतावणी देणे नी छुड़्यु।
32ने हय मे तुहुंंक भगवान काजे ने हेरी बेसकी वारु दयान बुल काजे सुपी दम काहाकी तुहुंं बड़ता जावु ने आखा चुखा हवला माणसे मां गवाय देणेन हक आप देसे। 33मे काहनाक ने चांदीन, सनान नीते पुथल्यान हर कर्यु। 34तुहुंं आपसात जाणु की जेत हाते ने मारी ने मारा साते वाळान ज्य-ज्य चीज चाहजे चो पुरो कर्या। 35मे तुहुंं काजे आखो काय करीन देखाड़्यु की हीनी रीत सी मेहनत करता जाय्न लुला काजे समाळजु ने मालीक ईसुन बुल हेर राखणु जरुरी छे।
36असो कहणेन पछे हयु मांडा टेक्यु ने तींद्रे आखा साते दुवा कर्यु। 37तत्यार चे आखा रड़्या ने पोलुसेन गळे लागीन गुळा देणे लाग्या। 38चे खास करीन हीनी वातेन दुखी हतला चो हयु कहलु की तुहुंं मारो मुंहडो अळी नी देखसु तत्यार चे हीनाक ढंड्यान्चां पुगाड़्या।
လက္ရွိေရြးခ်ယ္ထားမွု
नेवताळान काम 20: BSP25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.