नेवताळान काम 19
19
ईफीसुस सहर मां पोलुस आयु
1तीने टेमे असो हयो की जत्यार अपुल्लोस कुरींथीस सहर मां हतलु, तीने टेमे पोलुस ने चां आखा परदेस मायन फीरतु-फीरतु ईफीसुस मां आयु, चां तीनुक थुड़ाक चेला भेळा हया। 2तीनु चेला काजे पोलुस पुछ्यु “जत्यार तुहुंं ईसु पर भुरसु करला ती चुखली-आत्मा हात करला काय चे चेला कह्या?” हामु ते चुखली-आत्मान बारामां सामळ्या लग नी।
3अतरे पोलुस तीनु काजे पुछ्यु ती तुहुंं कुणीन बपतीस्मा लेदला छे? चे जपाप आप्या युहन्नान बपतीस्मा लेदला छे।
4पोलुस कह्यु युहन्नु ज्य कय्न मन फीरावणेन बपतीस्मा आपलु की जु मारे पछळ आवणे वाळु छे हेरे पर मतलब ईसु पर भुरसु करजु।
5ज्य सामळीन चे मालीक ईसुन नाव सी बपतीस्मा लेदा। 6जत्यार पोलुस तींद्रे पर हात मेकीन तींद्रे वाटे भगवान सी दुवा कर्यु ती चुखली-आत्मा तींद्रे पर उतरीन तींद्रे मां भराय गुय ने चे भाती-भातीन बुली बुलने बाजी गुया ने भगवानेन अघे सी वात कह्वणे बाजी गुया। 7चे आखा मेळीन बारे जणा हतला।
8अळी पोलुस तीन महना लग यहुदी माणसेन भक्तीन घर मां जाय्न बीहे पाखुर भगवानेन राजेन बारामां यहुदी माणसे साते वाते मां माथा-पच्ची करतेलु ने समजाड़्या करतेलु। 9बाकुन तींद्रे मां सी थुड़ाक माणसे पीटा हतला, ने पोलुसेन वात सामळीन ईसु पर भुरसु नी कर्या ने दीसरा अगळ ईना ईसुन टुळान बारामां वाक नीकाळनी बाजी गुया, अतरे पोलुस तींद्रे सी अलग हय गुयु, ने आपसान चेला काजे लीन चां सी जात रयु, ने चु दाहड़ीत तुरनुसेन भणावण्या घर मां भगवानेन वाटेन बारामां वात कय्न तींद्रे साते माथा-पच्ची करतेलु। 10दुय साल लग चु असुत भगवानेन राजेन बारामां कवतु जाय्न समजाड़तु रयु, ने तेरी वात सामळीन आसीया मां रहण्या यहुदी माणसेक ने नी-यहुदी माणसेक मालीक ईसुन बारामां बुले सामळीन ईसु पर भुरसु कर्या।
सीकवान पुर्या
11भगवान पोलुसेन साहरे बेसका भारी काम देखाड़तु रयु। 12जत्यार माणसे पोलुसेन डीले लागाड़ीन रुमाल ने फेटको मांदला साते ली जातला ती चे मांदला वारु हय जातला ने भुतड़ान आत्मा तींद्रे मां सी नीकळी जातला। 13थुड़ाक यहुदी माणसे जागे-जागे बड़वाय करता फीरतेला, ज्य करने लाग्यु की तींद्रे मां भुतड़ान आत्मा रवे तींद्रे पर मालीक ईसु नाव ज्य कय्न फुक्या तीना ईसुन परचार पोलुस करे मे तुहुंंक हेरीत सगुन आपो। 14ने सक्कीवा नावेन एक यहुदी मुख्या पुजारान सात पुर्या हतला, चे बी असात बड़वाय करीन भुतड़ा नीकाळतेला।
15बाकुन भुतड़ान आत्मा तीनु काजे जपाप आप्यु, मे ईसु काजे जाणो ने पोलुस काजे बी जाणो बाकुन तुहुंं कुण छे? 16अळतेन तीना माणसे मां भुतड़ान आत्मा हतली, चु माणुस झड़ दीन तींद्रे पर आय गुयु ने तीनुक हाराड़ देदु, तेरेमां चे नांगेरलात घायल हय्न तीना घर सी नीकळीन ढासी गुया। 17ज्य हयो तेरी खबर ईफीसुस सहर मां रवण्या यहुदी माणसे मां ने नी-यहुदी माणसे मां जात रया ने चे आखा माणसे बीहीन बेसका घाबराय गुया ने हीने रीते मालीक ईसुन नावेन ईज्जत अळी जादा हवणे बाजी गुय। 18तींद्रे मां सी बेसका जणा भुरसु करला, ने गलत काम करला आखा माणसे अगळ मान लेदा ने चां आया। 19ने चे बड़वाय करन्या आपसा आपसान बड़वाय करनेन किताप तींद्रे चां लावीन भेळा कर देदा ने आखा अगळ तीनु कितापेन दाम चांदीन पचास हजार टका बराबर हतला। 20असो करीन मालीक ईसुन वात माणसे काजे जादा समज मां आवती गुय ने बेसका माणसे ईसु पर भुरसु करता गुया।
ईफीसुस मां दंगु
21जत्यार जी वात हय गुय, ती पोलुस आपसान जीवे मां असु वीच्यार कर्यु, की मे मकीदुनीया ने अखाया मायन यरुसलेम जायस चां जाय्न अळतेन रोम मां बी देखणे जायस। 22तेरेमां पोलुस आपसा साती तीमुथीयुस काजे, ने ईरास्तुस काजे सेवा करने करीन मकीदुनीया मकली देदु, ने आपसुत आसीया मां थुड़ीक टेम अळी रयु।
ईफीसुस मां पोलुस भीणी दवड़ीन आवे
23तीने टेमे मालीकेन वाटेन वजे सी माणसेन टुळु वीरुद करीन बेसका माणसे दवड़ीन आया। 24चां देमेतीरीयुस नावेन एक सनार्यु हतलु, ने तेर पुठ्ये मुरती बणावण्यु बी हतलु। चु तींद्रे सी, अरतीमीस नावेन एक देवीन मंदीरेन मुरत्या चांदीन बणाय मांगतेलु। ने असु करीन चु ने तेरा मुरती बणावण्या बेसका कमायतेला। 25चु ईनु काम-धंदु करन्या दीसराक बी भेळा करीन कह्यु, ए माणसे तुहुंं काजे ते मालुम छे, की ईना काम-धंदा मां आपणी बेसकी कमाय हवे। 26बाकुन तुहुंं देखु ने सामळु की चु पोलुस ईफीसुस ने आखा आसीया मां माणसे काजे ज्य कय्न समजाड़े ने मुरती लेणे वीचकाड़े की हाते सी बणावला मुरत्या देवता नी हय। 27पोलुस असुत माणसे काजे समजाड़्या करसे ती जी डर छे की आपणु मुरती बणावीन वेचणेन काम धंदु बंद हय जासे ने मट्ली देवी अरतीमीसेन मंदीरेन ईज्जत बी जात रवसे करीन डर छे ने तीनी देवीन पुजा-पाट आखे आसीया ने आखी कळ करे।
28जी वात सामळीन चे रीसवाय पड़्या ने आयड़ी-आयड़ीन कह्या, ईफीसुस्या सहर मां रवण्या अरतीमीस देवी बेसकी मटी छे। 29सहरेन दीसरा माणसे बी तींद्रे मां भेसकाय गुया ने मकीदुनीया वाळा गयुस ने अरीस्तारकुस काजे धर लेदा जे पोलुस पुठ्ये हींडतेला ने आखान आखा एक मन्या हय्न उफरीवाळा मकेळा घर मां दवड़ी पड़्या। 30जत्यार पोलुस तीनु माणसेन टुळान ईचमां जाणे हींड रवलु, बाकुन चेला तीना काजे चां जाणे नी देदा। 31आसीया जीलान थुड़ाक हकदार्या पोलुसेन दुस्तीदार हतला चे हकदार्या जी खबर दी मकल्या ने लीलघाय सी कहें की तु उफरीवाळा मकेळा घर मां आवीन दुख मां घुण पड़े। 32तीने टेमे गड़दी मां सी काहनास कांखुरुत आयड़ी रवला, ने काहना काहनाक कांखुरुत आयड़ी रवला, काहाकी बेसका माणसे काजे ज्य मालुम नी हतलो की काहा भेळा हवला छे। 33तीनी गड़दी मां सी सीकेन्दर्या नावेन एक माणुस हतलु तीना काजे यहुदी माणसे तींद्रे मां सी नेवाड़ला हतला चे तीनाक समजाड़ीन गड़दी अगळ उबा कर देदा सीकेन्दर्यु हात पालवीन ईसारु करीन आपसा काजे बचाड़ने हींड रवलु। 34बाकुन जत्यार तीनु काजे पतु चाल्यु की चु एक यहुदी माणुस छे ती चे आखान आखा एक जसा दुय घंटा लग आयड़ी-आयड़ीन कह्या ईफीसुस्यान सहरे मां रवण्या देवी अरतीमीस बेसकी मटी छे।
35तत्यार सहरेन मंत्री गड़दी काजे हुगु राखीन कह्यु, ए ईफीसुस्यान सहरे मां रवण्या माणसे ईफीसुस सहर मां रवण्या माणसे मट्ली देवी अरतीमीस देवीन मंदीरेन ने सरग भीणी सी पल्ली मुरतीन राखवाळ्या चे ईनी वाते काजे आखी कळीन माणसे जाणे। 36अतरे ईनी वाते काजे कुय नी काटी नी सके अतरे ज्य वारु छे की तुहुंं हुगा रहु ने वीच्यार नीकाळे पाखुर काय मां करु। 37काहाकी तुहुंं तीनु माणसे काजे लावला छे चे नीते मंदीर मां धड़ु पाड़्या ने नीते आपणी देवीन वाक नीकाळ्या। 38कदी देमेतीरीयुस काजे ने तेरे साते काम-धंदु करन्यान काहानी वाते मां वाक हय ती नीयाव वाटे कुरुट-कचेरी चालु छे ने चां नीयाव करन्या धेणी बी छे चां जाय्न एक दीसरान वाक नीकाळ्या करु। 39बाकुन तुहुंं काहींग पुछणे हींडे ती ईनी वातेन बारामां जाणने करीन सहरेन नेमेन बसक हय चां आवजु चां ईनी वातेन वीच्यार नीकाळु। 40काहाकी आज जी बी दंगाय हवली छे, ची हामरे माथे पड़से तेरेसी जां हेरे बारामां वीच्यार नीकाळनु वारु नी हय काहाकी ईने टेमे ईनी गड़दी मां वाळा माणसे काजे हामरे सी काय बी जपाप नी आपाये। 41ज्य कयदीन चु सहरेन पंचु काजे वळाय देदु।
လက္ရွိေရြးခ်ယ္ထားမွု
नेवताळान काम 19: BSP25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.