Aposolo 23
23
Polome mo Isaraelimi mandu rangala pae kalesoro alinu para angele walisaya ei
1Go dina Polome mo kalesoro alinu waru andae siala ara lalore, Na amenuo, Gode para ama ama pu aoma ambia pange pa go ayonda na kone ora pa epelea, lisaya. 2Mo Gode repara alinau puaisimiya alinuna kalu alinuna andaa alina biri Ananayasi. Gupuma Ananayasimi Polo repara aisimiya alinumi Polona angaa rengepe liinya, lisaya. 3Gupuma Polome nipu para lalore, Godeme nee diia, lisaya. Neere anda peralina kake pi kamo kirademe ei mandana ale ali, lisaya. Monde Rudule Angelena lee eimi angele yokanali pulame go andere pilipare neeme ni pakama eina liinyaya laendare ande Rudule Angele wi einuri rungulaende, lisaya.
4Ande nipu repara aisimiya alinumi lalore, Gode nipuna alinau puaisimiya alinuna kalu alinuna andaa ali para koae angele wala deyapae, lisimiya.
5Go lisimiyandare Polome nimuna angele yango liada ara lalore, Nina Isaraelimi mandu rangala pae amenuo, nipuri Gode repara alinau puaisimiya alinuna kalu alinuna andaa ali ae kone na-siawa, lisaya. Ande wape pupa wi ei go ei. Nena wenaali andere-aya kalu ali para koae angele na-lape, lea lisaya.
6Gupisayapare Polome monde kalesoro alinu andoma Sadiusi Parisi anda ruru laapo alinu epa piri peme kone suma nimu para angele puri paloma wi lala ara lalore, Na amenuo, niri Parisi ali ara Parisi anda repaa naki maida, lisaya. Go ni para angele yokanali pimi eiri ande wenaali komoma wala rekoma ma-endala pea epe angele waladonda pimi, lisaya.
7Polome go angele lisayandare mo Sadiusi Parisi anda repaa alinumi ape ape loma keralolo puma rando rando aisimiya. 8Monde Sadiusi anda repaa alinumi leme eiri gurupa. Komeme wenaaliri wala na-rekeleme loma eindiolonu pange remonu pange na-piri peme, loma loaemepare mo Parisi anda repaa alinumi angele repo pangoma kone suaeme. 9Gupuma ape ape andayaoma waru lala ara Parisi anda ruru menda paranu Mosesimi Rudule Angele waloaisimiya alinumi rekoma rendaa pi angele lalolo puma lalore, Naame go aliri au menda koae au pange na-andasialemae, lisimiya. Pa marea eindiolome o remome nipu para lale ei loma peapae, naa marea, lisimiya.
10Gupuma monde ape ape andayaoma lisimiyanda mo yanda kalu alimiri mo alinumi Polo ma-lu singi pilimiyanda paalame komisaya. Go eina nipuna endali ripinyi alinumi Polo ralu lapao minyaya mo endali ripinyi alinuna dapanda para karu penaya, angele rapaisaya.
11Gupuma gonde rimbala gole Realimi Polo repara epa ara lalore, Nena pu para puri waru paloma ape, lisaya. Go Diurusaleme ree anda para na angele walao-aripi rupa mo Romo ree anda para pange na angele wala walainya, lisaya.
Mo Isaraelimi mandu rangala pae alinumi Polo lu komaluame yanda rombisimiya ei
12Gupuma yapi kepelisayandare mo Isaraelimi mandu rangala pae alinumi yanda rombala ara nidi puma lalore, Enda ipa ambe na-ne ara Polo ambala liiaminyae, lisimiya. 13Go angele lisimiya alinu raayore ali ria laapopu alinumi enda nidi puma ara go angele lisimiya. 14Gupuma mo Gode repara alinau puaisimiya alinuna kalu alinu para pange mo kalu alinu para pange puma lalore, Naare ora nidi andaai puma enda ipa ambe na-ne ara Polo ambala liiaminyae, lamae, lisimiya. 15Go eina nimimi mo kalesoro alinu rapu ara mo Romo ree anda yanda kalu ali para angele gurupa rapalepapeae, lisimiya. Ande Polore nipuna angele yokanali ora rendepona paminyayanda naa para karu ipulupape, loma nipu makirada ara go angele rapalepape, lisimiya. Gupilimindare Polore ambe na-opapala epenaloma nipu pa diima, lisimiya.
16Gupuma Polo nipuna balina si awa nakimi mo alinumi yanda rombala ara lisimiya einu pangoma pua ara mo endali ripinyi alinuna dapanda rupara konda pamboma Polo para puma la alisaya. 17Gupuma Polome endali ripinyi andere-aisaya ali menda nipu para epenaya wi loma lalore, Go na awa nakimi mo yanda kalu ali para angele menda doameyanda dale nipu karu pope, lisaya. 18Go eina karu puma mo yanda kalu ali para lalore, Ande dipula pia ali Polome ni wi lama lalore, Go nakimi angele menda pua lalena neeme karu pope, landa, karu epawa, lisaya.
19Mo yanda kalu alimi monde nakina ki muma ongesi mo para le karu puma pawasi lora pula ara lalore, Angele mendare ale angele doame laepae, lisaya.
20Gupuma mo nakimi lalore, Mo Isaraelimi mandu rangala pae wenaalinuna kalu alinumi perekeyala ara yanda rombala ara lalore, Polona angele yokanali rendepona pulameya ruli nee para epa lama mo kalesoro alinu para Polo neeme karu epainyayanda epa konge dema, lame, lisaya. 21Go lamepare neemere nimuna angele na-pangapeae, lisaya. Ali ria laapona ki ange rupa alinu menda para aeme alinumiri nidi puma enda ipa ambe na-ne, Polo ambala porana diima loma ma-nolaoma su romba piri neeme de angele pangolameya andere piri pemeae, lisaya.
22Go eina mo yanda kalu alimi monde naki pu loma lalore, Neemere neeme la aloma pawa angele wenaali menda para na-pua lape, lisaya.
Mo endali ripinyi alinuna kalu alimi Polo mo gapamani andaa ali Pilikasi para rapaisaya ei
23Go loma endali ripinyi alinuna kalu alimi andere-ae ali laapo wi loma ipulupae, loma lalore, Ambia rimbala ambe na-epeainya nongo nakisinu u paidame dina endali ripinyi alinu ali ria ki laapopu alinu mo osi mena kouna piruaeme alinu ali ria repo pereyoma mendane ki laapo rupa pange mo dolo ripinyi alinu ali ria ki laapo alinu pange Sisaria ree anda nane penayanda rando menda pa nane ma-ainyalape, lisaya.
24Gupuma Polo pida pea osi menanu ma-ainyalomare, mo gapamani andaa ali Pilikasi para pawasi andere-ari pula ara karu pulupape, lisaya. 25-26Go eina mo yanda kalu alimi nipuna kone pe ei ramayo gurupa wape pula ara lalore, Niri Kolodiasi Lisiasimi gapamani andaa ali Pilikasi para ranae angele lalo loma wape pu moyado. 27Go aliri Isaraelimi mandu rangala pae alinumi rengepe minyuma siamba ara ora duame rapala-ainya endali ripinyi alinu rapu neme opapala puma rambameawa lalo, laya. Nipuri neme andasiawaparere nipuri Romo ree anda repaa ae ali ae mandana ali loma wape pawa. 28Nimumi go ali para ma-riada angele lame eina ree neme aisa pulame go ali kalesoro alinu para karu puawapare nimuna ma-riada angele ree nimuna Rudule Angelena pame eina, wape pawa laya. 29Nipumi koae aunu menda na-pea eina nipu luma komape ei pange nipu dipula ma-pirape einuna ree menda na-andasiawa loma wape pi lisaya. 30Gupuma Isaraelimi mandu rangala pae alinumi Polo duameyanda rombame ei mendame ni para landa, nee para go gole raparipu. Go eiri nipu para ma-riada angele dame eiri alinumi nena lee wilina ara nimuna ma-riademe angelenu dame eina ree pangainyaya lawa loma mo ramayo rupara angele gurupa lawa loma wape pisaya.
31Go eina mo endali ripinyi alinumi nipuna angele pangomare Polo karuma rimbala gole mo Andiparisi ree anda para karu paisimiya. 32Gupuma yapi kepelisayandare mo osi menana kouna piruaisimiya alinumi Polo mo Sisaria ree anda nane karu pula-ainya mo endali ripinyi alinu angena wala perekeya nimuna dapanda para wala paisimiya. 33-34Gupuma endali ripinyi alinumi Sisaria ree anda nane opapala pumare, mo gapamani andaa ali para mo ramayo wape pua alomare Polo pange mendaa para pua mo gapamani andaa alimi monde ramayo wape pi eiri yarepema Polo para lora puma lalore, Neere a andasu para epelepae, lisaya. Go eina Polome lalore, Niri Silisia andasu nane aoma epe aliae, lisaya. 35Go ei pangoma nipumi lalore, Nee para ma-riada angele lame alinu opapala epelemendare gore nena angele pangola, lisaya. Gupuma endali ripinyi alinu para lalore, Mo Kini Erodina anda andaai para Polo go dipula anda rupara ma-piraoma andere-alepape, lisaya.
လက္ရွိေရြးခ်ယ္ထားမွု
Aposolo 23: POLENT23
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.