Aposolo 22
22
1Polome wenaali para lalore, Ame apanuo, neme nimina angele yangonu apo liadole waru pangalepape, lisaya. 2Gupuma nimu para Polo nipumi Iburu angele loma lisaya ei pangomare angele menda menda na-le, pa aisimiya.
3Go dina nipumi nimu para lalore, Niri Isaraelimi mandu rangala pae ali ae. Monde Silisia andasu nane aya anda Dasasi ree anda para na amame go para ni maidapare Diurusaleme ree anda para ipuma go para aoma andayoma pe ae, lisaya. Go ree anda para Gamaliele nipumi naana apa kasuanuna Rudule Angelenu waru mongeriaripa einu pumare kone suma ambia nimimi Gode para pange kone rulaeme rupa neme pange kone rulayo, lisaya. 4Gupuma gonde porana kone rulaeme wenaalinu ambala ririnare neme yanda waru liiala ara wenaali lu komaluame pa riminyuma dipula ma-pirala pawa, lisaya. 5Neme ambia go nimi para walalo eiri mo Gode repara alinau puaisimiya alinuna kalu alinuna andaa alimi pange kalu alinumi pange ambala pawa einuri andoma kone wimi, lisaya. Mo alinumi nimuna Damasikasi ree anda Isaraelimi mandu rangala pae amenu para ramayo wape puma ni para giamendare neme so anda nane Keriso wenaali mulameya puawa, lisaya. Mo wenaaliri ma-rongaoma Diurusaleme ree anda nane karu ipuma pu rendaa pi pupudengi wadoame pawa, lisaya.
Polome nipu pena Keriso ali aisaya eina angele lee ei
(Aposolo 9:1-19; 26:12-18)
6Porana pumare mo Damasikasi anda nane opapala polameya pula ano naare kalu rikirana-ainya so yaa naneyame paa andaai ipumare ni ma-kopaliaoma paa pu kopaliaripa, lisaya. 7Go eimi niri suna lopoma siano angele komame ni para gurupa lainyaripa. Solo o, Solo o, pangae. Akepeanda ni para rendaa gialepae, lainyaripa, lisaya. 8Neme lalore, Realio, neere apiyapae, laisiyaripupare nipumi lalore, Niri Nasarere ree anda ali Yesu ae. Neeme ni para yanda liialenda laloae, lianyaripa, lisaya. 9Gupuma ni rapu arimi alinumi ande paa pi eiri andamepare so yaa nane ara angele lainyaripa alina angele komare na-pangame, lisaya.
10Gupuma neme lalore, Realio, ake panopae, loma lora pawa. Go eina nipumi ni para lalore, Rekoma mo Damasikasi ree anda para pua pidindare ali mendame ipuma nena pula pele ei nee para nipumi epa la gilia, lainyaripa, lisaya. 11Monde paa waru paripanda niri lee kiyape-na-loma lee kandupia ano mo ni rapu arimi alinumi na ki muma liminya mo Damasikasi ree anda para ni karu puame, lisaya.
12Go dina Damasikasi ree anda para aripaya ali menda Ananayasiri ande Godena Rudule Angele waru pangoae ali aisaya, lisaya. Nipumi puaisaya ei andoma Isaraelimi mandu rangala pae alinu raayome lalore, Nipuri ora epe ali aya, loaisimiya, lisaya. 13Go aliri ni para ipuma repara epa ara ni para lalore, Na ame Solo, ambiare nena lee kiyoma anda, la lisaya. Gupuma go gole na lee kiyanda nipu andawa, lisaya. 14Gupuma Ananayasi nipumi lalore, Naana apa kasuanuna Godeme nipuna kone pea ei kone siainyayanda ma ma-aya, la, lisaya. Ande Gode nipuna rendepona yaakopi aunu puaya pupudengi noaya Ali andainyaya pange nipuna angaame angele koma lainyaripa ei pangainyayanda ma ma-aya, la lisaya. 15Go eina neeme andae ei pange pangae ei pange wenaali raayo para la alala pali, la, lisaya. 16Go einare ambiare akepeanda pa andoalepae, loma la lisaya. Rekoma pua baparaisi au puma nipuna bina yainya pula ara nena koae au paende einu randepelenalape, loma, la lisaya.
Godeme mo Isaraelimi na-mandu rangala pae wenaali menda para Polo rapaisaya ei
17Polome lalore, Neme mo Diurusaleme ree anda nane wala epa ara mo Gode repara alinau puaisimiya andaa anda rupara yainya pula ano upamele pi nano pi rupa Reali andawa, lisaya. 18Realimi ni para lalore, Go Diurusaleme ree anda wenaalimi nina angele la alala pili ei na-pangeleme, la lisaya. Go eina ambe wangepu rekoma go ree anda giaoma popeae, la lama lisaya. 19Gupuma neme nipu para lalore, Realio, mo Godena angele kuruaeme andanu raayo para nemere nana angele meame wenaali raayo pa ripinyala puma podeala pawa eiri mo alinumi andame, lawa lisaya.
20Rana menda ambalande nena angele la aloae ali Sidipeni lu komarimi dinare ni pange go para ara neme pange ora epeleale diapa loma nipu liiame alinuna akanu siambaripu, lawa, lisaya. 21Neme go angele lawapare Realimi ni para lalore, Puae, nemere papare mo Isaraelimi na-mandu rangala pae wenaali para nee rapalua, lama la, lisaya.
Mo Romo endali ripinyi alinuna kalu alimi Polo andere-aisaya ei
22Mo wenaalinumi Polona angele ambala pangisimiyapare monde lisaya ei pangomare angele rendaapi rupa wi lalolo puma lalore, Go ali ma-pulupa, loma wi lisimiya. Gupi ali go suna endoma pa na-apeleo, lisimiya. Ora luma komena lapeleo, lisimiya.
23Go eina puri pale angelenu rendaa puma lalolo pula-ainya nimuna maa akanu wangeaoma do danga so mandaa penaya ma-rekaisimiya. 24Mo Romo endali ripinyi alinuna kalu alimi Polore mo endali ripinyi alinuna dapanda para karu ma-ipulupa, lomare mo alinumi Polo para rendaa pi angele lalolo pisimiya eina ree aisa pulame Polo kope kundumi liinya, lisaya.
25Gupisayapare kopeme Polo rongaisimiyandare endali ripinyi alinuna kalu ali Polo rapu raminyekepao aisaya. Gupisayanda Polome mo endali ripinyi ali para lalore, Nimina Rudule Angeleme mo Romo alinu epelemendare go au pipape, loma la wi einu pimipae, lisaya. Nimimi angele yokanali pi eina ambe na-ma-ae ara ambala diapape lemenda pilimindare go eiri ora epeleapae, lisaya. #22:25 Romo wenaalina Rudule Angeleme lalore Romo wenaali nimuna gole nimu liialore manda na-pea lisimiya.
26Mo endali ripinyi alimi go angele pangomare monde Polo mo endali ripinyi alinuna kalu ali para pua lalore, Aki pulameya pimipae, lisaya. Go aliri Romo anda ali ae, lisaya.
27Go eina mo kalu alimi epa lalore, Neere Romo anda epa ale lame aliyapae, lisaya. Ni para la giae, lisaya. Gupuma Polo nipumi lalore, Ee, lisaya.
28Mo endali ripinyi alinuna kalu alimi lalore, Niri Romo repaa wenaalinu mandana aluamere na muni andapumi kambawande, lisayanda Polome lalore, Neere go pelepare niri na amame ni maidanda Romo repaa wenaali au lawa, lisaya.
29Go eina go gole ande Polona puaisaya eina ree aisa pulame pisimiya alinuri Polona angele pangoma yola pamboma yolama pua ara ki lopaoma aisimiya. Gupuma mo yanda kalu alimi pange Polo ande Romo ree anda repaa wenaali au lee ali ma-rongaoma pawanae kone suma paalame komisaya.
30Gupuma yapi kepelisayandare mo endali ripinyi alinuna kalu ali nipumi kone sulame mo Isaraelimi mandu rangala pae alinumi Polona pe einuna ora ree wi ei angaa mulame nipu rongaisimiya ei kepelisaya. Kepelisayandare mo Gode repara alinau puaisimiya alinuna kalu alinu pange mo kalesoro alinu raayo pange mombelenalomare Polore mo alinu angaa lapuna ma-ipuma epa ainya, lisaya.
လက္ရွိေရြးခ်ယ္ထားမွု
Aposolo 22: POLENT23
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.