Puj Saeq 6
6
Puj Yixsowhleh Zoah Puj Mixdenq Vazkuz
1Dij goanz Yixsowhleh daeuq hoak sowh saeh Yez'hoahhuah ywjhwnq naeh, Yez'hoahhuah zoq hawj paenqdix doak dawj mungz puj Mixdenq jiat bi. 2Puj Mixdenq haen nyeuz puj Yixsowhleh. Puj Yixsowhleh gowx puj Mixdenq. Paenqdix yuq ndaw bo, yuq ndaw ngomz, yuq ndaw niangz bo daengj dih ndowj yuq. 3Zwzrawz puj Yixsowhleh ndaem kaeujpyaek yaq, puj Mixdenq, puj Yaqmaxlih, daj sowh puj yuq baih tang'vaenz og naeh zoq maz saeuh puj Yixsowhleh. 4Puj Mixdenq laep daengz zangjpungh maz, goq saeuh saeuh puj Yixsowhleh, vaih kaeujpyaek puj Yixsowhleh, mwz taengdiak ndaw Zazsah, mboq leux saek'i gaenqjin hawj puj Yixsowhleh, goj mboq leux dij moaz, dij mbej, dij loix hawj puj Yixsowhleh. 5Paenqdix ndaq daengz doihdo laep daengz zangjpungh maz, lai daj dij daek dungzlumj. Dij goanz daj loahtoah lai daengz mboq zawh haxnyaeux, paenqdix maz dih puj Yixsowhleh ndowj naeh, vaih daengz mbanj naeh nauq. 6Cholaeng puj Mixdenq, puj Yixsowhleh dohbaeuh taeuq, paenqdix zoq vanz Yez'hoahhuah jeuq.
7Zwz puj Yixsowhleh vanz Yez'hoahhuah jeuq paenqdix ni dawj mungz puj Mixdenq naeh. 8Yez'hoahhuah zoq nemz puj zawxkauq bae dih puj Yixsowhleh naeh, daj paenqdix hax: "Yez'hoahhuah dij Sen puj Yixsowhleh hoakzaqnaeh hax: ‘Gux ndaej lingz su daeq Aizjih og daeuj, ni dih su hoakkoij daenh naeh. 9Jeuq su ni dawj mungz dij goanz Aizjih yaq, lingz su daeuj ndaw Zaznanh, dij goanz inxnaeh maz saeuh su, gux jeuq su ni dawj mungz paenqdix, daem paenqdix ni doqnaj su, aeu dih paenqdix hawj su.’ 10Zwz naeh gux daj su hoakzaqnaeh hax: ‘Gux zawh Yez'hoahhuah dij Sen gaenqsu. Gaenqsu yuq dih puj Yaqmoahliq ndowj, mboq jinx gaenqsu biangz dij sen boangxdix.’ Gaj gaenqsu mboq biak kauq gux."
Dij Sen Lowg Jizdenq
11Doaklaeng Bin Yez'hoahhuah daeuj taeng ndaw Owhfuhlaz, yuq goak go maex dwx ux naengh, go maex dwx naeh zawh go Yez'azsez. Yez'azsez zawh puj Yaqbixyixceq. Jizdenq goanz lug zaiz Yez'azsez naeh lupliamx yuq dih oa hoak laeuj naeh faet kaeujmeg, mboq hawj puj Mixdenq ruxndeq. 12Bin Yez'hoahhuah hawj Jizdenq taen, daj dix hax: "Goanz dungzgaenx zaengx, dungzgaenx riangz naeh aj, Yez'hoahhuah daj mawz zaemh yuq!" 13Jizdenq hax: "Zaeuj aj, jixzawh Yez'hoahhuah daj piu zaemh yuq, piu rux miz sowh saeh naeh maj? Puj jeq rownz piu haxdoq piu: ‘Zwz Yez'hoahhuah lingz piu daeq Aizjih og daeuj naeh, dix hoak sowh saeh saenh yaengh saenh naeh lai taeuq.’ Gaj sowh saeh saenh yaengh saenh paenqdix laemh naeh gannaeh baenzzaqrawz mboq miz mux? Gannaeh Yez'hoahhuah viangh gaenqpiu, hawj gaenqpiu doak dawj mungz puj Mixdenq." 14Yez'hoahhuah ueq bae doq Jizdenq, daj dix hax: "Mawz kauq sowh doakriangz mawz naeh bae jeuq puj Yixsowhleh ni dawj mungz puj Mixdenq, mawz yauq ruxndeq gaenqnaeh zawh gux nemz mawz bae mbyah." 15Jizdenq hax: "Zaeuj aj, gux hoakrawz jeuq puj Yixsowhleh baenz mux? Ngah Maxnahciz piu naeh zawh changz rownz gux roag nyeuz, rownz dez gux zawh gux ix nyeuz." 16Yez'hoahhuah daj dix hax: "Gux daj mawz zaemh yuq, mawz zoq saeuh bex puj Mixdenq, daj saeuh goanz doag dungzlumj." 17Jizdenq hax: "Gux mboq suanq zawh gaeng, gaj jixzawh mawz zaemz gux, vanz mawz hawj gux taen saek yowngh, hawj gux ruxndeq zawh mawz daj gux hax kauq zaeh. 18Vanz mawz laek ni inxnaeh, taj gux dauh maz, gux bae aeu gaenqjin maz baiz doqnaj mawz." Zaeuj hax: "Gux toj taj mawz dauh maz mboqyaq."
19 Jizdenq bae kaj do mbej bo ix ux, goj aeu song deuh mux kaeujmeg hoak sowh binx mboq miz fahfaenx naeh. Yaq aeu diangq dej nowx, aeu moj laep naemxpyaek, tw maz dih goak go maex dwx naeh baiz doqnaj dix. 20Bin dij Sen daj Jizdenq hax: "Aeu nowx daj sowh binx mboq miz fahfaenx naeh nyaengx now boaj tin dwx naeh, aeu naemxpyaek zoaj." Jizdenq zoq hoakzaqnaeh hoak. 21Bin Yez'hoahhuah ed laenj maexdaeux ndaw mungz naeh, maexdaeux daeh hoj zoah nowx daj sowh binx mboq miz fahfaenx naeh, zoq miz faez daeq boaj tin dwx naeh oq maz, maej nowx daj binx nauq. Bin Yez'hoahhuah zoq mwz rawz mwz, lez mboq taen. 22Jizdenq ruxndeq dix zawh Bin Yez'hoahhuah, zoq hax: "Ahyah, Zaeuj gux Yez'hoahhuah aj, gux zoah zaeh yah, gux yuq doqnaj doqta lez taen bin Yez'hoahhuah ngah." 23Yez'hoahhuah daj dix hax: "Mawz yumq yuq vangqdangh, laek mbu, mawz mboq rux tai gah." 24Yaq Jizdenq zoq yuq dih naeh daengj aen kuq tin mbud dij Sen ux hawj Yez'hoahhuah, nyaek minxzwh hoak Yez'hoahhuah Sazlungh. Yez'hoahhuah Sazlungh zawh hax: Yez'hoahhuah hawj dij goanz yuqvangq. Aen kuq tin mbud dij Sen naeh taeng diak gannaeh naengzgaj yuq ndaw changz Yaqbixyixceq dih Owhfuhlaz naeh.
25Haemh gaengnaeh, Yez'hoahhuah daj Jizdenq hax: "Mawz bae aeu taek moaz dez mawz maz, aeu daengz taek ndaej jiat bi naeh maz, yaq lid aen kuq tin dez mawz aeu mbud Bazlih naeh, taemj Yaqsowxlaz boaj yuq haenz aen kuq tin naeh.#6:25 "Yaqsowxlaz" zawh dij sen zaj, zawh dij sen nyingz, paenqdix ndaem boaj saeu ux, yuq haenz boaj saeu naeh mbud Yaqsowxlaz. 26Yuq now boaj tin dwx naeh daengj aen kuq tin mbud dij Sen ux hawj dij Sen mawz Yez'hoahhuah. Aen kuq tin naeh hawj dix swh lingzlingz, piang leahleah, yaq aeu taek moaz ndaej jiat bi naeh hoak sowh gaenq aeu pyaeu mbud naeh, aeu boaj saeu Yaqsowxlaz naeh hoak hunz pyaeu." 27Jizdenq zoq lowg puj koij dix maz sip goanz, hoakzaq Yez'hoahhuah yaix dix naeh. Gaj Jizdenq mbu rownz dez dix daj dij goanz ndaw chaenh, mboq ganz yuq zang'vaenz hoak, zang'hwnz maz zux hoak.
28Nawlaeng dij goanz ndaw chaenh dwnq maz, leztaen aen kuq tin aeu mbud Bazlih naeh haeuz zoah lid yaq, Yaqsowxlaz boaj saeu yuq haenz aen kuq tin naeh goj haeuz zoah taemj yaq, naengz leztaen do moaz taek ndaej jiat bi naeh mbud mwz now aen kuq tin daengj mawq naeh, 29zoq goanz lej cham goanz: "Zawh gawz hoak mbaed saeh naeh mux?" Paenqdix goq chaj goq chaj yaq, zoq ruxndeq zawh Jizdenq goanz lug zaiz Yez'azsez naeh hoak. 30Dij goanz ndaw chaenh daj Yez'azsez hax: "Lug zaiz mawz lid aen kuq tin aeu mbud Bazlih naeh, taemj Yaqsowxlaz boaj saeu yuq haenz aen kuq tin naeh, baenzzaqnaeh, aeu lug zaiz mawz daeuj, hawj gaenqpiu kaj dix." 31Yez'azsez yaeng paenq goanz hax dix naeh: "Gaenqsu saeh Bazlih hax maj? Rux gaenqsu daz jeuq Bazlih mux? Gawz saeh Bazlih saeuh, fax rungh maz gawz zoq zoah kaj tai. Jixzawh Bazlih zawh dij Sen, miz dij goanz lid aen kuq tin aeu mbud dix naeh, hawj hoakri dix haeggaj saeuh goanz lid naeh!" 32Jizdenq lid aen kuq tin aeu mbud Bazlih naeh, puj ndai zoq daz kaj dix, gaj doaklaeng daengzle hax hawj Bazlih haeggaj daj dix dungzsaeuh. Baenzzaqnaeh, vaenz gaengnaeh daenh rongx Jizdenq hoak Yezluq-bazlih, Yezluq-bazlih zawh hax: Hawj Bazlih haeggaj daj dix dungzsaeuh.
33Zwz naeh, puj Mixdenq, puj Yaqmaxlih, daj sowh puj yuq baih tang'vaenz og naeh, paenqdix maz zaemh yuq, kamj ka dah Yezdanq maz, yuq doangh piang Yezsezleh naeh daengj zangjpungh, zunxbiq maz saeuh puj Yixsowhleh. 34Minghkoan Yez'hoahhuah daeuj ndaw ndang Jizdenq, Jizdenq zoq baeuq kaeu dij mbej. Changz Yaqbixyixceq naeh zoq maz nowngz dix. 35Dix nemz dij goanz bae dih puj Maxnahciz naeh rongx, puj Maxnahciz zoq maz nowngz dix. Dix goj nemz dij goanz bae dih puj Yaqsowh, puj Cizbuqlunh, puj Nahfuhtazliq naeh rongx, paenqdix goj maz daj dix zaemh yuq.
36 Jizdenq daj dij Sen hax: "Jixzawh mawz hoakzaq gaenq mawz hax naeh, tungzgoaq mungz gux jeuq puj Yixsowhleh, 37gux aeu buk koan dij mbej ux bae dih gumh faet kaeujmeg naeh nyaengx, jixzawh daeg daeg mizgaj koan dij mbej miz naemxchaq, dihndai kawq rwnh, gux zoq ruxndeq mawz hoak zaq gaenq mawz hax naeh, tungzgoaq mungz gux jeuq puj Yixsowhleh." 38Nawlaeng Jizdenq dwnq maz, leztaen baenzzaqnaeh zaeh, dix neb sowh naemxchaq ndaw koan dij mbej naeh daeuj, ndaej yaengh vanq naemxchaq. 39Jizdenq daeuq daj dij Sen hax: "Vanz mawz laek rikdwk gux, gux daeuq hax mbaed ux tem, hawj gux daeuq aeu koan dij mbej ciq mbaed ux tem, gaj mbaed naeh ngwz mawz hawj koan dij mbej kawq, hawj dihndai miz naemxchaq." 40Hwnz gaengnaeh, dij Sen goj hoakzaqnaeh hoak, daeg daeg hawj gaj koan dij mbej kawq, gvaqmaz dihndai miz naemxchaq.
လက္ရွိေရြးခ်ယ္ထားမွု
Puj Saeq 6: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.