Zwz Nduq 35
35
Yaqgowh Dauh Maz Taeng Boztowhliq
1Dij Sen daj Yaqgowh hax: "Gux zawh dij Sen, zwz mawz gowx goz mawz Yixsaux naeh gux haeuz hawj mawz taen yaq. Mbaenqnaeh mawz mwz Boztowhliq yuq dih naeh ndowj. Mawz yauq yuq dih naeh daengj aen kuq tin ux mbud gux." 2Yaqgowh yaix dij goanz rownz dix daj daengzle sowh dij goanz daj dix zaemh yuq naeh, dix hax: "Gaenqsu yauq aeu sowh gaenq puj yowngh ndai rongx hoak dij sen naeh viangh nauq, yauq hawj hoakri sawrik, lwh sowj mawq. 3Mbaenqnaeh gaenqraeuz ni inxnaeh mwz Boztowhliq, gux yuq Boztowhliq daengj aen kuq tin mbud dij Sen ux. Dij Sen naeh zwz gux miz aen nanq naeh, gux vanz dix, dix zoq saeh gux. Gux mwz rawz, dix goj daj gux zaemh yuq." 4Yaq boangx naeh zoq aeu daengzle sowh gaenq puj yowngh ndai rongx hoak dij sen naeh daj ven ndaw chu paenqdix hawj Yaqgowh. Yaqgowh aeu le gaenq naeh haem goak go maex dwx haenz Swqjenq naeh.
5Zwz Yaqgowh daj boangx lug zaiz dix ni naeh, dij Sen hawj dij goanz yuq le aen chaenh haenzhenz paenqdix naeh mbu, mboq ganz daem lug zaiz Yaqgowh. 6Yaqgowh daj sowh dij goanz rownz dix naeh mwz taeng Zaznanh, dih Luqswz naeh, dih naeh dix ndaej rongx hoak Boztowhliq. 7Koax daekgoanq, mbaed dix gowx goz dix naeh, dij Sen daeuj daj dix hax kauq. Gannaeh dix zoq yuq dih naeh daengj aen kuq tin mbud dij Sen ux. Dix rongx dih naeh hoak Yizlowh-boztowhliq, Yizlowh-boztowhliq zoq zawh hax: "Dij Sen Boztowhliq." 8Paenqdix maz taeng dih naeh yaq, Dixbozlaz, yah kun zuj Liqbowhzaz naeh tai. Paenqdix zoq aeu dix moak goak go maex dwx yuq baihdawj Boztowhliq naeh, zoq nyaek minxzwh go maex naeh hoak Yaqlunh-bazgux. Yaqlunh-bazgux zoq zawh hax: "Go maex dwx haej."
9Koax Yaqgowh daeq Bazdanq-yaqlanh dauh maz naeh, dij Sen daeuq daeuj hawj dix taen mbaedmawq, gumx dix. 10Dij Sen daj dix hoakzaqnaeh hax: "Mbaednduq mawz rongx hoak Yaqgowh, gaj mwznaj mboq rongx hoak Yaqgowh, rongx hoak Yixsowhleh." Hoakzaqnaeh dij Sen zoq gaix minxzwh dix hoak Yixsowhleh. 11Dij Sen goj daj dix hoakzaqnaeh hax: "Gux zawh dij Sen gaeng goj rux hoak naeh, mawz zowngx naeuz lai ux, raengh huhhuh, mwznaj luglan mawz baenz aen goh ux daj lai aen goh, boangx luglan mawz naeh miz lai goanz hoak hongz. 12Gux aeu dih gux yinq aeu hawj Yaqboahlazhanq daj Yitsaeg naeh hawj mawz daj luglan mawz." 13Hax nauq gaemz naeh, dij Sen zoq daeq dih dix daj Yaqgowh hax kauq naeh ni mwz. 14Yaqgowh yuq dih dij Sen daeuj daj dix hax kauq naeh, dix yuq dih naeh aeu kvaix tin ux maz hoak boi, aeu laeuj rowd now kvaix boi mbud dij Sen daj aeu yuz rowd now kvaix boi. 15Yaqgowh zoq rongx dih dij Sen daeuj daj dix hax kauq naeh hoak Boztowhliq.
Lazjeh Zowngx Lug Yaq Zoq Tai
16 Yaqgowh daj dij goanz rownz dix ni Boztowhliq, paenqdix maz taeng dih ux, liq Yixfahtaz naengz miz hongj ux, Lazjeh zoah zwzced, lug dix zowngx daeuj raix. 17Gau dix chaej daengz zaekgaj gaemx mboq ndaej naeh, goanz yuq haenz dix saeh dix naeh hax: "Laek mbu, mawz daeuq zowngx goanz lug zaiz ux yah." 18Gau Lazjeh zaekgaj kaedzaw naeh, dix saeh lug dix nyaek minxzwh hoak Benq-owhnih. Benq-owhnih zoq zawh hax: "Goanz lug zaiz hawj gux yuq raix naeh." Gaj Yaqgowh dez maeng naeh saeh dix nyaek hoak Benqyaqminh, Benqyaqminh zoq zawh hax: "Goanz lug zaiz yuq baih qensa naeh." 19Lazjeh tai yaq, aeu moak haenz ka loh mwz Yixfahtaz naeh, Yixfahtaz goj rongx hoak Bozliqhaenh. 20Yaqgowh yuq dih naeh hoak kvaix boi ux, taengdiak gannaeh, kvaix boi naeh naengz yuq baihnaj moh Lazjeh.
Boangx Lug zaiz Yixsowhleh
21 Yixsowhleh daeuq daeq mwz naj, yuq baihdawj aen tah rongx hoak Yixdowh naeh daengj zangjpungh ndowj. 22Zwz Yixsowhleh naengz yuq dih naeh ndowj, lug zaiz to dix Loixbenq, goanz naeh daj mezlaeng dez dix Pihlaz zaemhnoanz. Yixsowhleh ruxnyinz mbaed saeh naeh.
Yaqgowh miz sipngih goanz lug zaiz. 23Le goanz Liqyaq zowngx naeh zawh: Loixbenq goanz lug zaiz to Yaqgowh naeh, Cizmyenx, Liqvaeq, Yaeuhdaq, Yixsahzaz, Cizbuqlunh. 24Lazjeh zowngx Yezsowh daj Benqyaqminh. 25Pihlaz goanz puj koij Lazjeh naeh, zowngx Danq daj Nahfuhtazliq. 26Cihpaq goanz puj koij Liqyaq naeh, zowngx Zazdowh daj Yaqsowh. Boangx lug zaiz naeh zawh yuq Bazdanq-yaqlanh zowngx. 27Yaqgowh maz taeng Manqliq, dih dez dix Yitsaeg yuq naeh. Manqliq yuq ndaw Jizleh-yaqbaz, dih naeh goj rongx hoak Cizboahlunh, zawh dih zwz Yaqboahlazhanq naengz zaeu ndowj naeh, gannaeh Yitsaeg naengz yuq inxnaeh ndowj.
Yitsaeg Baenz Puj jeq Mboq Miz
28 Yitsaeg ndaej baeg-ux-laeng-biadsip bi, 29dix baenz puj jeq mboq miz, mwz daj puj jeq rownz dix zaemh yuq. Song goanz lug zaiz dix Yixsaux daj Yaqgowh aeu dix mwz moak.
လက္ရွိေရြးခ်ယ္ထားမွု
Zwz Nduq 35: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.