Ni Aizjih 1
1
Dij Goanz Yixsowhleh Zoah Dij Goanz Aizjih Vazkuz
1Boangx lug zaiz Yixsowhleh gaj goanz gaj haeggaj zowz rownz dix daj Yaqgowh zaemh bae Aizjih. Minxzwh paenqdix zawh: 2Loixbenq, Cizmyenx, Liqvaeq, Yaeuhdaq, 3Yixsahzaz, Cizbuqlunh, Benqyaqminh, 4Danq, Nahfuhtazliq, Zazdowh, Yaqsowh. 5Boangx luglan Yaqgowh yuq ndaw Aizjih naeh daengzle miz jiatsip goanz. Laemh zwz naeh Yezsowh haeuz bwnz yuq ndaw Aizjih.
6Daeklaeng, Yezsowh, le bihnongx zaiz dix daj sowh puj daj dix zaemh teq naeh daengzle tai nauq. 7Gaj zwz naeh dij goanz Yixsowhleh raengh huhhuh, luglan paenqdix gaj laeng gaj miz goanz raengh, gaj laeng gaj haen. Yuq Aizjih gaj dih gaj miz dij goanz Yixsowhleh ndowj.
8Daeklaeng Aizjih lwh laux hongz mawq, laux hongz mawq naeh mboq sanz ndaej taen Yezsowh. 9Dix daj dij goanz Aizjih dix hax: "Gaenqsu lez, gannaeh dij goanz Yixsowhleh lai gvaq, haen gvaq. 10Maz, gaenqraeuz yauq aeu aen gvai aen dongx maz gvanx paenqdix, yaj dij goanz paenqdix raengh maz, dungzsaeuh zwzrawz, paenqdix rux daj sowh puj daj raeuz hoak dangqbaih naeh maz saeuh raeuz, yaq ni dih raeuz inxnaeh." 11Dix hoanx hax yaq, dix zoq yaix boangx goanz Aizjih ux bae dawz dij goanz Yixsowhleh. Dix hawj boangx goanz naeh gaemh dij goanz Yixsowhleh hoak gaj gaenq naek gangq vazkuz paenqdix, gaemh paenqdix saeh hoakri dix daengj Bixdungz chaenh daj Lanhsaiq chaenh. Daengj song aen chaenh naeh zawh aeu nyaengx za'hoq. 12Dij goanz Aizjih hoanx naeh vazkuz dij goanz Yixsowhleh, gaj dij goanz Yixsowhleh gajfa gaj ndowj gaj miz lai, gaj ndowj gaj banh gvae. Dij goanz Aizjih zoq mbu dij goanz Yixsowhleh. 13Dij goanz Aizjih nemz dij goanz Yixsowhleh hoak gaj gaenq naek gangq, doiq paenqdix moakduz taeuq, 14hawj paenqdix hoak najgaengx naek yuqraix-yuqmaih, mboqgvanx zawh hawj paenqdix hoak namh gojndae, hoak chown gojndae, bae ndaw doangh ndaw naz hoak gaengx gojndae, gaj yowngh gaj doiq paenqdix moakduz taeuq.
15Laux hongz Aizjih daeuq rongx maz song goanz nyingz sowh puj saeh daenh deq lug naeh. Song goanz naeh zawh dij goanz Cizboahlaiz, miz goanz ux rongx hoak Sezfuhlaz, miz goanz ux rongx hoak Puxaz. Laux hongz saengq doiqdix hax: 16"Gaenqsu saeh puj nyingz Cizboahlaiz deq lug zwzrawz, jixzawh zawh lug zaiz mbeh'ej kaj tai, zawh lug nyingz mbeh'ej jizzaz zaeu." 17Gaj song goanz puj saeh daenh deq lug naeh ruxndeq mbu dij Sen, zoq mboq biak kauq laux hongz Aizjih. Paenqdix jizzaz lug zaiz zaeu. 18Ndowj maz, laux hongz Aizjih zoq ruxndeq, dix zoq rongx doiqdix maz, cham doiqdix: "Gaenqsu baenzzaqrawz hoakzaqnaeh? Baenzzaqrawz hawj lug zaiz paenqdix naengz zaeu nauq mux?" 19Doiqdix hoiz: "Puj nyingz Cizboahlaiz mboq daj puj nyingz Aizjih dungzlumj, paenqdix zaengx taeuq. Gaenqpiu naengz mwz mboq taeng, paenqdix haeuz zowngx ndae." 20Yaq dij Sen doiq song goanz puj saeh daenh deq lug naeh ndae taeuq. Dij goanz Yixsowhleh gaj laeng gaj raengh, gaj laeng gaj haen. 21Song goanz puj saeh daenh deq lug naeh ruxndeq mbu dij Sen, dij Sen zoq gumx paenqdix, goj hawj paenqdix baenzrownz. 22Doaklaeng laux hongz Aizjih hoanx naeh yaix dij goanz Aizjih dix: "Gaenqsu aeu sowh lug zaiz puj Cizboahlaiz zowngx daeuj mawq naeh viangh bae ndaw dah Nihloah nauq, leux gaj lug nyingz paenqdix zaeu."
လက္ရွိေရြးခ်ယ္ထားမွု
Ni Aizjih 1: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.