Sáni Juánu 4
4
2. Na enka mámaru jánhaka Jesusini japarini
(4.1—6.71)
Jesusi Samaria anapu ma uarhiti jinkuni uantaxespti
1Fariseouechaksï mítespti eska Jesusi sánteru uáneraaxapka jurhenkorherichani, ka eska Juánuni jinkuni exent'aparini, sánteru uánekua itsï atats'ikpexapka. 2Nót'u Jesusisï itsï atats'ïkpeni jápti, imeri jurhenkorherichaksïsï ísï jámani jápti.
3Enka Jesusi aiankunhapka eskaksï fariseouecha mítespkia, Judea uéakuntaspti ka Galilea k'uanhatsentani.
4Níntani jámani, Samaria isï nitamantapirinti. 5Ka ísï jámani Samaria anapu ma iretarhu jamantaspti enka Sikari arhinhak'a, jimak'u isï enka Jakobu uáp'a Joseni echeri jurak'ukuapka. 6Jima jarhaspti itsï uératirhu enka Jakobu xéntapka. Jesusi, kuataratini xáni xanharani, imani itsï p'itakuarhu uaxamukuspti. Teruxutini isïspti.
7Uarhiti ma Samaria anapu jima niáraspti itsï p'itani ka Jesusi arhispti:
–Intsïmperini sáni itsï.
8Jurhenkorherichaksï iretarhu jámaxapti t'irekua sáni piákorheni.
9Ka jimpokaksï judiouecha ikiatsperasïnka Samaria anapuecha jinkuni, uarhiti arhispti:
–¿Antirinisï jínteni itsï kurhachek'i? ¿T'úri judioueska, ka ji Samaria anapueska?
10Jesusi arhispti:
–Enkari mítepirinka ampe enka Diósï íntspek'a, ka ekari mítepirinka nékinisï itsï kurhacheni jaki, t'úrisï itsï kurhakupirinka, ka imakini itsï tsípiti íntskupirinti.
11Uarhiti arhispti:
–Tata, itsï p'itarakua jámperiri no kámasïnka, ka jimini kánekua jauanhesti: ¿Nénarinisï itsï tsípiti íntskuaia? 12Íni itsïnits'ïni Juchari táte Jakobu jurak'uchesti, ixuksï itsïmasirempti imat'u ka imeri uáp'echa ka karichicha enka ima kánkorheauempka. ¿Anti t'u sánteru k'éri ampeski eska ima?
13Jesusi arhispti:
–Ne enka ixu p'itakata itsïmaska, ménteru k'arhichaati; 14ka ne enka imani itsïmaska enkani ji íntskuaka, nóteru méni k'arhichaatia. Jimpoka itsï enkani ji íntspek'a, méntkisï anapu itsï uérati úp'entasïnti, enka tsípekua méntkisï anapu íntspek'a.
15Uarhiti arhispti:
–Tata, imeni jásï itsïrini íntsku, eskani nóteru méni jámaaka k'arhichani ka nóteru uétarheni eskani ji ixu juuaka itsï p'itani.
16Jesusi arhispti:
–Ni urheta p'irani chéti achetini.
17Ka uarhiti arhispti:
–Ji achetini no kámasïnka.
Jesusi arhispti:
–Sésiri arhisïnka eskari no kámasïnka achetini; 18jimpokari iúmu káaskia, ka ima enkari jinkuni iásï jámani jaka no chéti achetisti. Ísïsti eskari na uantaka.
19Ísï kurharini, uarhiti uantaspti:
–Tata, jánhaskaskia eskari Diósïri uantariska. 20Juchari ióntki anapuechaksï Samaria anapuecha, ixu íni juátarhu Diósïni k'éri ampe arhisti; ka cháts'ï judiouecha uantasïnka eska Diósï Jerusalenisï k'éri arhikueka.
21Jesusi arhispti:
–Uarhiti, jakak'ucherini, jimpoka janoxakaia jurhiata enkats'ï cha k'éri ampe arhiaka Táteni ka no uétarheati eskats'ï ixu juuaka juátarhu nít'u Jerusaleni nirani. 22Cháts'ï no míteska nénits'ï k'éri ampe arhisïni; ka jucha míteska néni enkanichi k'éri ampe arhik'a, jimpoka p'ímutantskua judiouecha jimpoeska. 23Ka janoxatiia jurhiata, ka iásïstia, eska ima enkaksï sési jimpo k'éri ampe arhik'a Táteni, sésimentuksï mintsita jinkuni k'éri ampe arhiaka. Jimpoka Táte imechanisï uékaani jaka enkaksï ísï k'éri arhiaka. 24Diósï Espirituesti, ka ima enkaksï k'éri ampe arhik'a, sési jimpoksï mintsita jinkuni k'éri ampe arhisïnti.
25Uarhiti arhispti:
–Ji míteska eska Mesiasi juuaka (enka Krístueka); ka eka ima janoaka, iámu ampets'ïni jánhastaati.
26Jesusi arhispti:
–Jískachkania, enkakini uantaxecheni jaka.
27Enka ísï úkorheni jápka, niántasptiksï jurhenkorhericha, ka ískuksï pakarerani enka Jesusi uarhiti ma jinkuni uantaxeni jápka. K'óru nónema tekaaspti kurhamarheni ima imani uarhitini jinkuni ampesï uékempki, ka ampeksï uantaxexapi. 28Uarhiti jima jurak'uspti k'amukua ka iretarhu aiankpeparini jámaxapti:
29–Ju je exeni achetini ma enkarini iámu ampe arhika eskani xáni ampe ji jámatika. ¿Cha no arhik'i eska ima Diósïri axakatekia?
30Jiák'ani k'óru uéakunhaspti iretarhu ka ninhaspti jima enka Jesusi jápka. 31Enka nótki niaranhani jápka jurhegorherichaksï arhisïrempti Jesusini:
–Jurhentpiri, a sáni ampe.
32K'óru ima arhiaspti:
–Ji jatsikorheska ma jásï t'irekua enka cha no míteka.
33Jurhenkorherichaksï kurhamarhperaspti:
–¿Anti nema juáku ampe ma t'irekua?
34Ka Jesusi arhiaspti:
–Jucheti t'irekua aristi: Úni ampe enka ima uék'a enkarini axaka ka no jurarkukuni, k'amarakuni. 35Cháts'ï uantasïnka: T'ámu kutsï jimpoteru p'íkuntskueuatia; ka jíksïni arhixaka eskats'ï eraataaka tarhetani, jimpoka p'ikuntskueskia. 36P'ikuntsti maiamunhasïnti, ka p'ikuntskata méntki isï anapu tsípekuesti, ka ísïksï jámani tsíri jatsïri ka p'ikunsti márku tsípeati. 37Jimpokaksï sésku arhisïnka eska: Ma tsíri jatsisïnka ka máteru nema p'ikuntani. 38Ka jíksïni chánksïni p'ikurantani jima axaska enkats'ï nómpema ánchekorheta incharhetaka; máteruksï ánchekorhesti, ka cháts'ï imecheri ánchekorheta jimpo sési uéraska.
39Uánekuaksï jakak'ukuspti Jesusini imani ireta Samaria anapuecha, enka ima uarhiti k'amak'amasï aiankuapka: “Iámu amperini arhisti eskani xáni ampe jámatika.” 40Ka ísï jimpo, enkaksï Samariauecha niárapka, kómu arhisptiksï Jesusini eska jima pakarapirinka. Ima jima pakaraspti tsimani jurhia, 41ka uánekuateruksï jakak'uspti kurharini enka ima uantempka. 42Ka uarhitinksï arhispti.
–Jakak'uskachia, no imani jimpok'u enkats'ïni t'u aiankuka, támu jimpokani jucha kurhaskia ka míteskachi eska sési jimpo inte parhakpeni P'ímutantspitiska.
Jesusi irecheri ánchekorheri uáp'ani ma ampakerantasti
(Mt 8.5-13; Lk 7.1-10)
43Enka na nitamapka ima tsimani jurhia, Jesusi Samaria uéakuntaspti ka xanhari jatant'a'spti Galilea nirani. 44Jimak'ani isï, Jesusi uantaspti eska Diósïri uantari ma, imeri iretarhu no janhanharhinhasïnka. 45Enka niárapka Galilea, jimesï anapuechaksï sési jiókaspti, jimpokaksï imat'u niraspka Páskueri k'uínchekuarhu Jerusaleni ka exesptiksï enka xáni ampe ima jima úpka.
46Jesusi k'uanhatsentaspti Kana, Galilea, jima enka itsïni kauikua úntapka. Ka irecheri jántspiri urhets'ïkuri ma, uáp'ani Kafarnaumi p'amenchataxapti. 47Enka urhets'ïkuri mítepka eska Jesusi Galilea niántaspka, Judea uéntatini, niraspti uantaxekuni ka kómu arhispti eska nipirinka chénjempo ka eska uáp'ani ampakerantapirinka, enka uarhini jápkia. 48Jesusi arhispti:
–Cháts'ï no úsïnka jakak'uni enkats'ï no urheta ampe ma xarharani exek'a ka milagruechani exearini.
49K'óru, urhets'ïkuri arhispti:
–Tata, ju kókuani, k'óru t'uíni jucheti sapi uarhiatia.
50Jesusi jimak'ani arhispti:
–Ni níntani; chéti sapi sési jarhastia.
Acheti jakak'uspti enka Jesusi uantapka ka níntaspti. 51Enka níntani jápka kúmantasptiksï jántspiri jémpecha ka arhinksï:
–¡Chári sapi sési jarhastia!
52Ima kurhamarheaspti ampe jántu uénaspi imeri sapi sési p'ikuarherani, ka arhisptiksï:
–Uitsintekua ték'amatiru kéntikukusti tinharakua.
53Tátjempa, jimak'ani jánhaskantaspti eska ima jántu Jesusi arhispka: “Chéti sapi sési jarhastia”; ka iámentuksï jakak'ukuspti Jesusini, imao anapuecha.
54Jesusi, íni tsimani úni jámani milagru úspti, enka Judea uéntatini Galilea janonkuapka.
လက္ရွိေရြးခ်ယ္ထားမွု
Sáni Juánu 4: BI-PURHE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia en P´urhépecha, Michoacán, México © Sociedad Bíblica de México, A.C.