Sáni Juánu 3
3
Ménteru antap'enuni
1Jarhaspti fariseo ma, enka Nikodemu arhinhempka, enka judiouechani jinkuni k'éri ampepka. 2Ima chúrekua niraspti Jesusini p'urhempeni, ka arhispti:
–Jurhentpiri, míteskachi eskakini Diósï axaska jurhentpeni, jimpoka nónema úpirinka xárhati milagru úani ísï eska t'u na úak'a, enka Diósï no ima jinkuni japirinka. 3Jesusi arhispti:
–Sési jimpokini arhixaka eska ne enka no ménteru uéntaska antap'enuni, eska ima no úsïnka Diósïri Irechekuani exeni.
4Nikodemu kurhamarhespti:
–¿Ka néna ua ma ménteru antap'enuni enka t'arhepeakia? ¿Anti ua ma nánte jémpani ménteru inchaakuntani, ka ménteru uéntani antap'enuni?
5Jesusi arhispti:
–Sési jimpokini arhisïnka eska ne enka no itsï ka espiritu jimpo antap'enuska, no úsïnka Diósïri Irechekuarhu inchani. 6Ne enka k'uiripu uáp'eka, parhakpeni anapuesti, ka ne enka espiritu jimpo antap'enuka, espirituesti. 7Ásï nósesi xe enkakini arhik'a: K'uanisïnti eskari ménteru antap'enuntaaka. 8Tarhiata nirasïnti nani enka isï uékak'a, ka náuek'i ri kurhani jarhani, nóri mítesïnka naniasï tarhiaxaki. Ísïstiksï iámentu imat'u enkaksï espirituni jimpo antap'enuntak'a.
9Nikodemu ménteru kurhamarhespti:
–¿Ka nénasï úaia ísï úkorheni?
10Jesusi arhispti:
–T'u, enkari Israelicheri jurhentpirika, ¿Nóri míteski? 11Sési jimpokini arhisïnka eskani jucha imani ampe uantasïnka enkachi míteka, ka imani ampechi uantant'a'sïnka enkachi exerika; ka cháts'ï no jakak'usïnka enkaksïni arhini jarhak'a. 12Enkats'ïni no jakak'uchek'a parhakpeni anapu ampe enkaksïni aiankuni jarhak'a, ¿Nénats'ïnisï jakak'ucheaia enkaksïni auantarhu anapu ampe uantaxecheaka?
13“Nónema karhanchetisti auantarhu, imak'u enka auantarhu uératini kétsetika; Acha Uáp'anisïni arhini jaka. 14Ka ísï eska Moisesi na akuitseni iótakuarhu tarhatapka jima enka nónema irekaka, Acha Uáp'at'u ísï tarhatanhaati, 15ka eska ne enka imani mintsikaaka, méntku isï anapu tsípekua jatsiati.”
Na enka xáni Diósï xénhchaka parhakpenini
16“Jimpoka Diósï parhakpeni anapuechani xáni xénhchaaska jimposï jamperi Uáp'ani íntspeti, imani enka mák'ueka, eska ne enka imani mintsikak'a no uarhiaka, eska méntku isï anapu tsípekua kámaaka. 17Jimpoka Diósï, Uáp'ani no parhakpeni arhinharhikpeni axaska, sánteru sáni axasti eska imani jimpo parhakpeni p'ímutanhantaaka.”
18“Ne enka Diósï Uáp'ani jakak'uk'a, no k'amanharhiranhant'aati; k'óru ima enka Diósï uáp'ani enka jantiók'ueka no jakak'uk'a, k'amanharhirantskatestia jimpoka no jakak'ukusïnka. 19Ima enkaksï no jakak'uk'a, k'amanharhiranhantastiksïa, jimpokaksï nósesi ampe úsïrempka. Jiák'ani enka parhakpeni anapu eramarhantekua juka, páp'akantekuanksï erakusti ka nóksï eramarhantekuani erakuni. 20Iámentu ima enkaksï nósesi ampe niátak'a nóksï xénhchasïnti eramarhantekuani, ka nóksï antarherasïnti jimpoka ísï jámani mítekorheaka ampe enkaksï úni jaka. 21K'óru ima enkaksï irekani jaka eska néka, antarherasïntiksï eramarhantekuani, eska xarharaaka eskaksï iámentu ampe ísï úsïnka eskamentu néka Diósïri eratsekua.”
Nónema úati ampe ma jatsikorheni enka no Diósï íntskuaka
22Tátsekua enka na inte ampe úkorhepkia, Jesusiksï jurhenkorhericha jinkuni Judea isï niraspti, jimaksï jarhaspti namoni jurhia itsï atats'ïkpeni. 23Jini Enoni, Juánut'u itsï atats'ïkpexapti, jini enka Salimi no iauani jarharetinika, jimpoka jimesï kánekua itsï uéraxapka; ka ninhasïrempti ka itsï atats'ïnhasïrempti. 24I ampe, urheta ísï úkorhespti enkaksï Juánuni k'ataperakuarhu nótki incharani jápka.
25Ka máru Juánueri chúnkumatichaksï uénaspti judio ma jinkuni jupats'ïtperantskueri ampe uinhamu uantaxeni, 26ka Juánuniksï niraspti arhini:
–Jurhentpiri, ima enka t'u jinkuni jámani jápka Jordani iurhekuarhu parhikutini, ima enkari aiankpekuntaka, imat'u itsï atats'ïkpexati ka iámentuksï chúxapasïnti.
27Juánu arhiaspti:
–Nónema úati ampe ma jatsikorheni enka no Diósï íntskuaka. 28Cháts'ïni sésimentu kurhach'askia eskani ji no Krístueska, eskani imeska enkani urhetatapunhaka. 29Tempuchakuarhu ma, tempuchasï tsípeni jarhat'i tempunhani exeni; ka tempucheri p'íchpiri enka pámpeni jámani jarhak'a, tsípenitsipesïnti tempuchani kurhach'ani enka uantant'a'ni jarhak'a. Jít'uni iásï ísï tsípenitsipexaka. 30Imeri k'érikua jatsisti kánepani jarhani, ka ji sapichuentapani jarhani.
Ima enka auadarhu uératini jurhani jaka
31“Ima enka auantarhu uératini jurhani jaka, iámentu karhakua jakuasti. Ima enka echeririka parhakpeni anapuesti, ka parhakpeni anapu ampe uantaxesïnti. K'óru ima enka auantarhu uératini jurhak'a iámentuechani karhakua jakuasti, 32ka uantant'a'sïnti eska xáni ampe exeka ka kurhani; enka úka, imeri uantantskuani nónema jiókorhesïnti. 33K'óru enka nema jiókorhek'a, ísï jámani chuperasïnti uantant'a'ni eska Diósï no chkuántirasïnka; 34jimpokachka ima enka Diósï axaka, Diósïri uantakuechani jimpo uantaxesïnka, jimpoka Diósï imeri Espirituni kánhachani íntspesïnka. 35Diósï Táte, Uáp'ani xénhchasïnti, ka iámentu ampe jimpo juramukua íntskusti. 36Ne enka Uáp'ani mintsikak'a, méntku isï anapu tsípekua jatsistia, ka ima enka Uáp'ani no uék'a mintsikani, imeni jásï tsípekua no intsïnhaati, ka Diósï ikimestia.”
လက္ရွိေရြးခ်ယ္ထားမွု
Sáni Juánu 3: BI-PURHE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia en P´urhépecha, Michoacán, México © Sociedad Bíblica de México, A.C.