Kueraakua 4
4
Kaíni ka Abeli
1Adani mítespti Ébani, imeri témpa jémpani ka sóntku charhakuni erokorhexapti ka Kaínini kánkorhespti ka uantaspti: ACHArini tatakani ma kóntesti. 2Tátsekua máteru charhakuni kánkorhespti ka Abeli jakankurhitaspti enka Kaíniri erachi jémpempka. Abeli karichi erankutispti ka Kaíni tsíri jatsiri.
3Sáni ióni jimpo, Kaíni ACHAni kéts'ïtakuspti, imani ampe enka xáni p'ikunt'apka. 4Abelit'u kéts'ïtakuspti urheti ka sánteru sési jarhati ka amparhati karichichani ka ACHA jaiapanhent'aspti Abeliri kéts'ïtakua. 5K'óru no mák'ueni exespti Kaínini ka imeri kéts'ïtakuani, imani jimpo Kaíni kánekua no sési nínharhint'aspti ikiani. 6ACHA arhispti Kaínini: ¿Antirisï ikiani jaki? ¿Antirisï xáni no sési nínharhini jaki? 7Ekari sési ampe úpirinka, sésiri nínharhini japirinka, ka nóri úsïnka jimpokakini k'amanharhintskua no jurak'unt'axaka. K'óru ásï jurak'utakorhe eskakini antaaka.
8Kaíni arhispti erachi jémpa Abelini: Ju juátarhu. Ka enkaksï na juátarhu jápkia, Kaíni jima ataspti uántikuni erachi jémpa Abelini. 9ACHA arhispti Kaínini: ¿Nani jarhaski chéti erachi Abeli? Ka ima arhispti: No míteska ¿Anti ji imani erankuni jarhasïnki?
10ACHA arhispti: ¿Amperisï úia? Iurhiri enka xáni chéti erachi tsïtaka íni echerirhu, kurhachexatirini eskani maiampetarantaaka imani enka ataka.
11Echerikini ikimchaati, imani jimpo enka chéti eracheri iurhirini tapokaka enka t'u tsïtakuka. 12Enkari tarheaka, nóteru ampe ma antaraati ka ískuri jámaka ma parhakpeni.
13Kaíni arhispti ACHAni: Ji no úaka xáni kánekua ampe maiampent'ani.
14Iásïrini chúxapa ixu uératini, ka nóteruni t'únkeni jinkuni jauakia, ískuni jamani jauaka iápuru ísï íni parhakpeni ka ne uék'i enkarini exent'aaka uántikuatirini.
15ACHA arhintaspti: Ne enka uántikuaka Kaínini, iúmu tsimani xanhari maiampent'aati, ka ACHA mítetarantskua ma jatsikuspti Kaínini, ne enka exepirinka eska no uántikupirinka.
16Kaíni uéakuspti jima enka ACHA jápka ka Nodi echerirhu niraspti irekani, jima enka Edeni jurhiata antarakuarhu ísï jaka.
Kainiri sïrukua
17Kaíni nanakani ma mítespti ka témpa úspti, ka Enokiniksï kámaspti. K'éri ma ireta uaxastaspti ka iretani Enoki jakankurhitaspti, mák'ueni eska imeri uáp'a. 18Ka Iradini, Enoki uáp'espti, ka Iradi, Mejujaeli uáp'espti, ka Mejujaeli, Metusaeli uáp'espti ka Lameki, Metusaeli uáp'esti. 19Lámeki tsimani uarhitichani káaspti: Ma Ada arhinhaspti ka máteru Síla. 20Ada, Jabalini kánkorhespti, Jabali uénaspti uákasï erankutini ka imeri uáp'echaksï kuákuecharhu irekaspti ka uákasï erankutisptiksï. 21Jubali erachi jémpespti, ka Jubalini uénaspti kústatini, ka imeri uáp'echaksï sétimu ka píruli kústatispti. 22Síla, Túbalikaini kánkorhespti ka ima tiámu úrispti ka Túbalikainiri pirenchi jémpa Naama arhinhaspti.
23Ka Lámeki arhiaspti imeri uarhiti jémpechani: Ada ka Silani, k'urhach'atsïni je, ne enkarini ampe ma no sési úcheska órini uékani atani, tsíuerati ma o tumpi ma, ji uántikuaka. 24Enka Kaíni jimpo iúmu tsimani xanhari maiampetaranhant'aaka, ka Lámekini jimpo tanimu ekuatse ka témpeni iúmu tsimani (70) maiampetaranhant'aati.
Adani ka Ebari tanimu úni jamani uáp'a
25Adani, ménteru tempani jinkuni k'uíspti, ka charhakuni ma kámaspti ka Séti jakankurhitaspti ka témpa uantaspti: Diósïrini k'uanhaskuchent'asti tatakani ma, jimpo Kaíni, Abelini uántikuska.
26Seti imat'u sapini ma kámaspti, ka Enosi jakankurhitaspti, jiáni uénaspti ACHAeri jakankurhikua kómu arhinhani.
လက္ရွိေရြးခ်ယ္ထားမွု
Kueraakua 4: BI-PURHE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia en P´urhépecha, Michoacán, México © Sociedad Bíblica de México, A.C.