Kueraakua 3
3
K'uiripueri no kurhantirakua
1Iámentu manakorhericha enka ACHA Diósï kueraaka, akuitse sánteru únharhitpitispti ka akuitse kurhamarhespti nanakani: ¿Ísïski eskaksïni ACHA Diósï arhiska eskats'ï no jámaaka akurhutani nóma jásï ámanhech'akua enka xáni jukaka?
2Ka nanaka arhispti akuitseni: Úakachi akurhutani ámanhech'akuechani enka xáni jukaka.
3Diósïts'ïni arhisti: Ásï jama je akurhuta imani anhatapuni enka teruakuni jaka, ásï p'árhe je, jimpokats'ï sési jimpo uarhiaka.
4Tátsekua akuitse arhispti nanakani: Nóts'ï uarhiaka.
5Diósï sési mítetixati, eska imani jurhia enkats'ï jima akurhutaaka, p'enonharhiakats'ï, ísïuakats'ï eska Diósï, míteakats'ï ampesï sési ka ampesï no sési.
6Nanaka erarhutaspti ka ámanhech'akua kánekua sési jánharhispti ka uékaspti mímixeni. P'ikurhutaspti ka arhaspti ka íntskuspti uámpa jémpani ka imat'u arhaspti. 7Jiáni uératiniksï tsimarheni p'enonharhisti ka exekorhesptiksï eskaksï xásku jarhaspka, jígusï chkúrhiksï sïrikuspti ka imani jimpoksï óch'uspti.
8Temunkurhiriniskï ACHA Diósïni kurhaaspti, enka ima jima uanak'urhani jápka enka tarhiani jápka ka uiriasptiksï sïpakorhekuni ACHA Diósïni. 9ACHA Diósï uantap'aspti tatakani ka arhispti: ¿Naniri jarhaski?
10Ka ima arhispti: Anhatapurhu jantukutini ísïkini kurhaaspka ka chéspka, jimpokani xásku jarhaska, jimposïni jirikorhepka.
11Diósï arhispti: ¿Ka nékini arhiski eskari xásku jarhaska? ¿Akurhutaskiri jima enkakini arhipka eskari no jamapirinka akurhutani?
12Ka Tataka arhispti: Nanaka enkarini íntskuka eska jucheti márkuepirinka imarinisï íntskuti ámanhech'akua ka ji arhaska.
13Tátsekua ACHA Diósï arhispti nanakani: ¿Amperisï ú? Ka nanaka arhispti: Akuitserini únharhitasti ka ji arhaska.
14Tátsekua ACHA Diósï arhispti akuitseni: Inteni jimpo enkari úka, ¡T'úri sánteru no ampakitiuaka iámentu manakorhericha, ikimenhari ka no ikimenharhichani jinkuni! Antsikorheakari chéti k'úparhata jimpo ka echeriri t'ireaaka enkari xáni irekaaka.
15Úaka eskats'ï no sési páp'eraaka nanaka jinkuni, ni eskaksï chéti sïrukua sési páp'eraaka, nanakeri sïrukua jinkuni; imakini ch'atats'ïkuati ka t'úri irhanturhakua katsantukuaka.
16Nanakani arhispti: Kánekuari p'ameraaka enkari sapini kámani jámaaka, chéti acheti jinkuni jánhchaaka ka imakini juramucheati.
17Tatakani arhispti: Jimpokari kurhach'aska chéti témpani ka arhaskari imani ama anhech'akua enkakini arhipka eskari no apirinka, chéti jimpo no sési jasï incharhetixati echeri; ka kánekua úkua jimpori ánchetaaka ampe jatsini ka ampe p'ikuntani enkari xáni t'úeuaka.
18Echerirhu uitsakua tsurhumu antaraati ka xakuari t'ireaaka. 19Ka aparhekunt'akari t'irekua antakorheaka, enkari jamperi jántaaka, jimpokari jima uéraska, echeriskari ka echeriri úkorhent'aaka.
20Adani, témpani, Eba jakankurhitaspti, jimpoka ima nánteska iámentu tsípiticheri. 21Tátsekua ACHA Diósï t'ipich'ukua sïkuiriri úkuaspti ka tsimarheni xukutapsti. 22Ka ACHA Diósï uantaspti: Iásï k'uiripu mák'uenisti eska jucha, jimpoka míteskia ampeski sési, ka ampeski no sésini, ásï iásï akurhute enka tsípekuerika ámanhech'akua ka méntku isï ireke.
23Tátsekua, ACHA Diósï petataspti Edenirhu, eska ánchetapirinka echerini, imani echeri enka jimpo kueraakatepka. 24Enka na kéntint'aapka k'uiripuni, jurhiata antarakuarhu isï péraasti Kerubinichani ka tiámu atap'etarakua ma enka étskurhini jápka ka iápuru ísï manakorhempka xanharini kuáni enka tsípekueri anhatapu jukaka.
လက္ရွိေရြးခ်ယ္ထားမွု
Kueraakua 3: BI-PURHE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Biblia en P´urhépecha, Michoacán, México © Sociedad Bíblica de México, A.C.