Izaiya 49
49
AIzarayeli ba atu osakulriwa na Mulugu
1Kavwani nyo atu munakala vilambo nnakala tcherela ya bara. Kareyani mabaru nyo atu munakala olapela. Yehova ohodiitana miyo dahanabaliwe. Liye ohodivaha nzina dagali mbani mwa mma. 2Liye ohosakanya wanoni waga ira ukale nnga supada noirwa. Liye ohodikumbarela na mandaye. Liye ohodisakanya ira dikale nnga nifumo noirwa. Liye ohodikoya muwari mwa tumba naye nokoyamo mafumo. 3Liye ohodiwandela ira: <<Weyo Izarayeli uli namalaba waga. Atu anerege dititimiha na mwasa wa weyo.>>#49:3 Weyo Izarayeli uli namalaba waga. Atu anerege dititimiha na mwasa wa weyo. Ku wonga youmbuwela ya Mulugu para aIzarayeli ali ira muwari momuroromela, atu a malogo ohiyana-hiyana kamutitimihe. 4Mbwenye miyo dohowonga ira: <<Doholaba mabasa ohokana mpindu. Danongile kopolo daga vasayi vene. Masiki eno dihiiziwa ira Yehova unoza adivahe jejo jili jofwanela kala jaga. Yotambilra yaga ili mmandani mwa Mulugu waga.>>
5Yehova gudiwombile mbani mwa mma ira dikale namalaba waye ira daawelihede akuda Jako wa liye eto ira daagumanihe aIzarayeli vakwikwive na liye.#49:5 Nagavwile ira: Weyo Izarayeli uli namalaba waga. (Izaiya 49:3), nnovwa eto zela mutu mmohiwa unawonga ira: Yehova gudiwombile mbani mwa mma ira dikale namalaba waye ira daawelihede akuda Jako wa liye eto ira daagumanihe aIzarayeli vakwikwive na liye. Ku wonga vaimwananne aIzarayeli kala anamalaba okwakwanela, Mulugu afuna nvenyiha mutu mmohiwa ira aawelihede aIzarayeli wa Mulugu. Tchoira miyo nnorihediwa vamentoni va Yehova. Nnofwanya kopolo muwari mwa Mulugu waga. 6Nabwiya unawonga ira: <<Ira weyo ulabege mabasa okala namalaba waga oavenyiha akuda Jako eto oaweliha aIzarayeli kakoyiwe ira kawelele kala ilambo ya waniwa, tchi yengo isimbwile yeva. Miyo eto mabasawo nnafuna duusakanye ira ukale moneya wa malogo matene a atu ira vulusa waga ufiye ante magomo wa ilambo ya vati.>>#49:6 duusakanye ira ukale moneya wa malogo matene a atu ira vulusa waga ufiye ante magomo wa ilambo ya vati. Jengo jidjindji jawongiwa zela namalaba wa Mulugu jinamuwonga Yesu. Nione Lukaji 2:27-32. Peno eto Yesu unalaba mabasaye oziha moneya wa atu a malogo matene muwari mwa atwaye omunyindela. (Joira ja Anamarumiwa 13:47) 7Yehova Namawombola eto Mulugu Otchena wa Izarayeli unawonga na atu osimbwa lramwisiwa, atu oidiwa na malogo amohiwa, atu oalaba amwene. Liye unawonga ira: <<Amwene kauona, anoza kavenye. Asogolrelri anoza kagwe vati vamentoni vawo muwari moukokorela. Jeji jinaza jiireye na mwasa wa Yehova wenno uli ororomeleya. Liye gu Mulugu Otchena wa Izarayeli wenno uusakunlre.>>
Mulugu unoza aavenyihe aIzarayeli akoka
8Yehova unawonga ira: <<Muwari mwa tempu yapama, miyo dohouwakula. Eto siku nofuna vulusiwa nagazile, miyo dohoukamiheda. Miyo nnoukoya eto nnoza disakanye ira ukunge yopangana yaga na atu ira ilambo yewa iwelihediwe eto kakalemo akoka muwari mwa ilambo imanle nongeya. 9Nnoza daawongena anyakadeya ira: <Kakumanimo.> Eto nnoawongana ale anafwanyeya muisini ira: <Mukumele vooneya.> Anoza kafwanye jodja jiwa mmambalo mwa ndila. Masiki kawendaga mmikumani mohokala mitengo, anerege patihiwa jodja mwemo. 10Kiza kakana ndala nne ntona. Kiza kaona nipevo nokaha nne nzuwa. Tchoira wenno unaairela tangaranga unoza aasogolrelre, aavelele mwemo munafwanyeya visime dowenda mahindje. 11Miyo nnoza disandutche mwango daga datene ira dikale ndila dowendamo. Eto nnoza divenyihe marampa aga malukulu. 12Kaing'anani, atwaga anoza kakumele olapela. Kaing'anani ala anakuma pandi ya norti, ala anakumela pandi ya mavirelo wa nzuwa, ala anakuma ilambo ya Sinimi.>>
13Imbani mohagalala nyo jopandutchiwa ja zulu. Nyo jopandutchiwa ja ilambo ya vati ziveliwani. Romani imba nyumbo nyo mwango nyo. Tchoira Yehova udidiliha murima wa atwaye. Liye unoawendela tangaranga atwaye kaonihiwe goyi.
14Mbwenye atu a Siyawu kohowonga ira: <<Yehova unihiya hiyo. Nabwiya wehu umala nidiwala.>> 15Evale Nabwiya unafuka ira: <<Kodi muhiyana unowanda mudiwala mwanaye owamwa? Kodi liye kanakana tangaranga na mwanaye wa mwanapongwe umbanle liye? Masiki muhiyana amudiwale mwanaye, miyo mbwenye hehi, kannaudiwala. 16Kaing'anani, miyo dihimala lrembamo dezenyo mmandani mwaga yofwalrafwana na sidadi ya Jeruzalemu. Tempu datene dene miru da sidadi ya Jeruzalemu dili vamentoni vaga. 17Ahiminyu anowelela wa nyo mobaranya, mbwenye atu anne kauonihetchani goyi anoza kadowe olapela wene wa nyo. 18Muvenyihe meswinyu, muing'ane wu na wu, muone jinaireya. Atwawo atene anagumana, anaza wa weyo. Miyo nnolumbelela kalawo waga ira atu anoza kaurihedege weyo. Unawonga gu Yehova. Atu kaza, weyo unoza uoneye nnga muteli wa muhiyana.
19<<Na ibaribari ilambo yawo masiki yagamanleve bwanyuliwa, eto yagamanle nyanyaliwa, inowelela kanamo atu pwi fiyeda inoza yuyevele na mwasa oindjiva wa atu anafuna kalamo. Eto ale kaunongetcha anoza kakale olapela wene na weyo. 20Ahimawo kabaliwe tempu yanla we Babiloniya anoza kawongelege baruni wawo ira: <Ilambo ihiniyevela. Muniulukulihede ilambo yehu ira hiyo nikalegemo.> 21Weyo unerege vifuka mmirimani mwawo ira: <Udibalele ahimala bani? Ahimaga atene kohomala kwa eto kadabala akoka. Dohotukuleliwa ilambo imohiwa ira dakale muzari eto dohomala lanyiwa. Nnga bani udiulukulihedile ahima anne? Miyo dihanle meka. Nnga ahima anne kakumile waani?> >>
22Nabwiya Yehova unawonga ira: <<Kaing'anani, nnoza divenyihe ndanda naga daaitanaga malogo amohi, digwelihe bandera ira aliwa kaze. Kazaga anerege azana ahimawo a anapongwe kagaatukunle mmandani. Eto anoazana ahima a anavihiyana awo kagaakapatchihile vanifudini. 23Amwene anakala nnga ababi kaaulukulihe ahimawo. Amwadi amwene anoza kakale nnga mma oawamwiha ahimawo. Anoza kagwihe kove diwa vati kaukokorelagani. Anoza kanyangulre tumbulru nili mmanyaloni mwenyu muwari moviyeviha. Jaireya eno, munoza muiziwe ira miyo dili Yehova. Wenno unadidediha miyo kaza anyaswihiwa.>>
24Kodi munyakondo wa kopolo unowanda wakiwa jiwakile liye kondoni? Kodi atu ohindiwa na mwene wa uwali anowanda vulumutchiwa? 25Yehova mbwenye unawakula ira: <<Atu ohindiwa na atu a kopolo anoza kavulumutchiwe. Eto mwene wa uwali unoza awakiwe jiwakile liye kondoni. Tchoira miyo nnowana na anno anawana na nyo. Eto nnoavulumutcha ahiminyu. 26Miyo nnosakanya ira ale anauonihani goyi kapananege fiyeda kadjananege okiwa, kalrezelre na sangiri newa nnga mutu alrezelraga na vinyu muxa. Pa eva vanafuna atu atene kaiziwe ira miyo dili Yehova, Nvulusi wawo eto Namawombola wawo, Mulugu wa Kopolo wa Jako.>>
လက္ရွိေရြးခ်ယ္ထားမွု
Izaiya 49: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral