Izaiya 48
48
Mazu a Mulugu para akuda Jako
1Kavwani nyo akuda Jako, nyo munaitaniwa na nzina na Izarayeli, nyo mukumile muwari mwa vizulu da Juda eto munalumbela na nzina na Yehova eto munaromola nzina na Mulugu wa Izarayeli. Mbwenye ejo kamunairana muwari mwa murima wa ibaribari na wapama. 2Nyo munawonga ira munakala muwari mwa sidadi yotchena eto munamunyindela Mulugu wa Izarayeli, Yehova wa Makuru Matene ti nzina naye.
3Yehova unawonga na Izarayeli ira: <<Ja wanle jahanaireye, miyo dohovayela wonga wanle. Jeji jakumile muwano mwaga eto dohovayela jilaleya. Eto mobaranya mwene dohokwakwaneliheda eto johoireya. 4Mwasiwa miyo dohoiziwa ira weyo uli mutu ohofuna vwa eto munikohini mwawo munafwanyeya misepa da momba eto vakoveni vawo vinafwanyeya vagali va mukuwa. 5Dohovayela uwandela ja sogolro roma wanle. Jengo jiwa jahanaireye, dohovayela uwandela tawiha ira unaze uwongege ira: <Ikwamutu yosema yagela ilabile atu ti ji. Nlandaniho nosemiwa naga nne, yofwalrafwaniha yaga ya momba ile tcheniyo iwongile ira jeji jiireye.>
6<<Jatene ejo weyo wohomala vwa, ujiumbuwele pama jatene eji. Kodi weyo kunawanda rumela ira jili eno? Roma peno dowa sogolro nnouwandelani jengo jixa, jengo jokoyeya jahanarome we iziwa. 7Jengo jeji jinapandutchiwa tchineneva hiya ja wanle. Ante fiyeda peno kunavwe tawiha ira unaze uwonge ira: <Kaing'anani, jeji dohomala jiiziwa na wanle.> 8Romela wanle kunavwe eto romela wanle kuiziwile mwasiwa romela wanle mabaru awo kalive ofungeyene. Mwasiwa dohomala iziwa ira weyo kuli ororomeleya. Roma mabaliwelo awo, unaoneya nnga mutu okonda tongiwa.
9<<Ira atu karihede nzina naga, miyo nnododoma muwari mwa uwali waga. Ira atu kaditamalele miyo, nnodidiliha uwali waga zela weyo ira dahaunonge kala no kala. 10Kaing'ana, miyo dohoutcheniha. Utcheniha uwa, kadautchenihile na munlo nnga na makalelo anatcheniha atu parata mbwenye miyo duhuxixa muwari mwa hofu wa makatamiho. 11Ira undimuwa waga uoneye, muwari mooniha undimuwa waga miyo nnoirana. Nnafuna dihiye avi ira nzina naga nilramwisiwe? Miyo undimuwa waga kadiza dinvaha mutu mmohiwa.>>
12Yehova unawonga ira: <<Kavwani nyo akuda Jako, nyo aIzarayeli duitanneni miyo. Mulugu gu miyo. Miyo dili oroma eto dili ogomiheda. 13Mandaga kohomanga aliserisi wa ilambo ya vati. Miyo dohotapula ilambo ya zulu na ndanda naga nodjana. Muwari moitana, ilambo ya vati na ilambo ya zulu jinoimela vamohi.
14<<Zela amilugu amohiwa, bani aromile wonga ja sogolro? Nyo atene mugumanne eto muvuruwane ja sogolro jinafuna miyo wonga. Wenno Yehova unamuziveliwa liye unoairela aBabiloniya jejo jifunne liye. Unowana na ndanda naye na kopolo na akuda Kalidewu.#48:14 liye unoairela aBabiloniya jejo jifunne liye: Fwanyeya azile agondjiha aBabiloniya ali Siru, mwene wa Persiya. Mulugu ohomulimbiha ira awande agondjiha aBabiloniya. (Izaiya 45:1) Babiloniya ti nzina na ilambo. Eto akuda Kalidewu ti nzina na atu kakala muwari mwa ilambo ya Babiloniya. Ku wonga aBabiloniya na aKalidewu ba amohive. 15Miyo gu miyene dawongile eto damuitanile. Dohomuzana eto jatene jinomuwendela pama. 16Muze vakwikwive ira muvwe jinafuna miyo wonga. Romana voroma vene miyo kannarome wonga mokoyeya. Tempu eji jaireya atu, miyo dagaliwo wanle.>> Peno Nabwiya Yehova udiruma eto udivaha Munemba waye.
17Yehova Namawombola wawo, Mulugu Otchena wa Izarayeli unawonga ira: <<Miyo dili Yehova Mulugu wawo, wenno unaufundjiha ira jengo juwendele pama. Nnousogolrelra ndila yofwanela ira weyo uviremo. 18Ahakale nnga uvwelela malamulo aga, murendele ogoufwanya nnga mahindje a muhindje owenda eto upama wawo akala nnga mahindje omanganyeya a mbara. 19Ahimawo kogoindjiva nnga miseva eto vizulu dawo dogokala nnga tumbulru. Mazina ewa tchaza kakumihiwavo eto tchaza katimihiwa kala no kala vamentoni vaga.>>
20Kakumanimo mwilamboni mwa Babiloniya, katawanimo mwilamboni mwa aKalidewu, muvweyihe jeji mohagalala, mujilaleye ante mufiyihe magomelo wa ilambo ya vati, muwonge ira Yehova uhumuwombola namalaba waye Jako. 21Tempu yaasogolrelretcha liye muisalesaleni, aliwa tchanna ntona. Liye eretcha avaha mahindje owenda okumela vanibweni. Ohodurumula nibwe evale kohokuma mahindje pwi. 22Mbwenye Yehova unawonga ira: <<Kavali murendele para atu abure.>>
လက္ရွိေရြးခ်ယ္ထားမွု
Izaiya 48: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral