Izaiya 47
47
Gondjihiwa wa Babiloniya
1Yehova unawonga ira katita weyo namwali wa Babiloniya, weyo wahamuiziwile mulombwana, ukale vati vatumbulruni. We namwali mwana wa aKalidewu ukume vampandoni va umwene, ugarati vati. Mwasiwa kuza uromoliwagave mutu oriyetchetcha nne oteteliwa.#47:1 Babiloniya ti nzina na ilambo. Eto aKalidewu ti nzina na atu kakala muwari mwa ilambo ya Babiloniya. Ku wonga aBabiloniya na aKalidewu ba amohive. 2Utukule mwanapelo, utchile utu. Ukumihewo nguwo inakala wintoni wawo. Uwunyungule nguwo dawo, mendo dawo dioneye, ulambuwe mihindje. 3Umandave wawo unoza uoneye eto unoza unyaswe valukulu. Nnoza diwelihe kunyakunya. Kalivo unafuna za dihiyiha.
4Namawombola wa hiyo aIzarayeli, Yehova wa Makuru Matene ti nzina naye. Liye gu Mulugu Otchena wa Izarayeli.
5Ugarati wagali pee. Uvolowe muisini namwali mwana wa Babiloniya we. Mwasiwa kuza uromoliwagave mwene wa muhiyana otonga maumwene. 6Dohotakaleliwa na atu aga. Dohatakaliha atu daasakunlre miyo. Dohavelela mmandani mwawo ira waagondjihe. Mbwenye kwaawendenle tangaranga. Weyo were akapatchiha atu oulula nigogolo nonyemela nohokala na masika.#47:6 Dohavelela mmandani mwawo ira waagondjihe. Mbwenye kwaawendenle tangaranga. Mulugu aavahile atwaye aIzarayeli mmandani mwa aBabiloniya na mwasa wa jotega jiwa. Mbwenye Mulugu eto ohatonga aBabiloniya zela makalelo abure kaairele atu aIzarayeli. 7Eto wawongetcha ira: <<Miyo nnoza dikale mwene wa muhiyana kala no kala.>> Eto kuumbuwenle mmirimani mwawo makalelo wafuna we ireliwa. Nne kuwandile tulela makalelo wafuna we gomela.
8Na mwasa wenno, kavuruwana, we mutu ohara jouziveliha, weyo unagarati pama, we unaumbuwela mmirimani mwawo ira: <<Miyo gu miyene bahi. Kalivo mmohi ahali miyo. Kadiza dikala makwele eto ahimaga kiza kakwa.>> 9Mbwenye siku nimohive, ora imohive, jengo mbinli jejo jinoza juireyele. Ahimawo atene anokwa eto unokala makwele wa muhiyana. Jatene ejo jinoza juireyele tempu imohive masiki wagalive mutu okwima bure na kopolo dilukulu dozela vindjilrisi dawo.
10Weyo waroromela ubure wawo. Waumbuwela ira: <<Kalivo unadiona.>> Iziwa wawo na zelru dawo jihimala uviringaniha. Mmirimani mwawo waumbuwela ira: <<Gu miyo bahi, eto dihiya miyo, kalivo mmohiwa.>> 11Mbwenye makatamiho anafuna uzela, kunawanda hiyiha muwari mwa vindjilrisi dawo. Weyo kuza ukana kopolo domaliha nongiwa unafuna ufwanya. Bwanyuliwa wahadedihedave we unoza ufwanye mobaranya.
12Uimele pama na vindjilrisi dawo na jolowa jawo jejo jalabiha we roma unamwali wawo. Afwase jinowanda ukamiheda eto afwase unowanda atutchana atu. 13Zelru didjindji davwa we dihimala uwaheyiha. Ale kauvahetcha zelru kaze peno, kauvulumutche. Kaze ale anafundja ja zulu eto anaing'ana nyenyedi anno anawonga malambo a mwedi muxa kauwandelaga jinafuna uireyela. 14Kaing'anani, aliwa anakala nnga makata anafuna ja na munlo, nne kinawanda vivulumutcha muwari mwa kopolo da malumi a munlo. Eto munlo wenno kahi owanda otiwa. Eto kahi owanda susediwa kala vakwikwive. 15Ale kalabetcha na weyo anoza kakale eno. Anno kasakanyetcha malronda vamohi na weyo roma unamwali wawo, kada mutu unoza abalrabanduwele waye wene. Kalivo unafuna uvulumutcha.
လက္ရွိေရြးခ်ယ္ထားမွု
Izaiya 47: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral