Izaiya 45
45
Yehova unamuitana Siru
1Yehova unawonga na osakulriwa waye Siru wenno umuhindile liye na muwono waye odjana ira agondjihe malogo a atu eto ira amalihe kopolo da amwene. Eto Yehova unohula misuwo vasogolro va Siru ira milango dahawande fungiwa. 2Yehova eto unawonga ira: <<Nnoza dikale vasogolro vawo, disakanye ira jitukutuku jatene jikale razo, dikotole misuwo da mukuwa eto digwade magaradi a momba. 3Nnoza duvahe jorayela jikoyiwe muisini eto nnoza duvahe jengo jokoyeya ja peresu ilukulu. Noira eno, unoza uiziwe ira miyo dili Yehova Mulugu wa Izarayeli wenno unauitana moromola nzina nawo. 4Na mwasa wa namalaba waga Jako, na mwasa wa Izarayeli osakulriwa waga, nnouitana moromola nzina nawo, nnouvaha nzina norihediwa masiki weyo wahadiiziwileve. 5Miyo dili Yehova, kalivo mmohiwa. Hiya miyo, kaliwo Mulugu mmohiwa. Miyo nnouvaha kopolo masiki wahadiiziwileve. 6Nnoirana eji ira atu atene kuma makumelo wa nzuwa ante mavirelo wa nzuwa kaiziwe ira kaliwo mulugu mmohiwa ahali miyo. Miyo dili Yehova eto kaliwo mmohiwa. 7Miyo nnosakanya moneya eto nnopandutcha isi. Miyo nnoziha murendele eto nnopandutcha ubure. Miyo dili Yehova wenno unairana jatene eji.
Yehova gu Namapandutcha eto gunawongola jatene
8<<We zulu karumbwiha muzongwe okumela zulu. Nyo mirambo murumbwihe upama. Ilambo ya vati ihuleye ira ing'we muzongwe wenno ira iwande mela vulumuwa na upama. Miyo Yehova gupandutchile jatene eji.>>
9<<Udilu wa wenno unakangana na wenno amuwombile. Tchoira maliba kangana unafwanyeya agali yombwe muwari mwa jombwe afwaye. Kodi ulongo unowanda nfuka mutu umuwombile ira: <Unawomba nni?> Owu hehi: <Namawomba we kunna toto?> 10Udilu wa wenno unanfuka babaye ira: <Mubanle nni?> Owu unanfuka mmaye ira: <Mubanle nni?> >>
11Yehova Mulugu Otchena wa Izarayeli eto Namaomba wa Izarayeli unawonga ira: <<Mudifuke zela jengo jinafuna za ireya. Mbwenye kuxixe diruma miyo zela makalelo anafuna miyo airela ahimaga na mabasa anafuna miyo laba na mandaga. 12Gu miyene usakanyile ilambo ya vati eto miyo gumpandutchelemo mutu. Mandaga batandile ilambo ya zulu. Eto unatonga jomoneya jatene ja zulu gu miyo.
13<<Muwari mwa upama waga, dimuvenyihile Siru. Nnoza diwongole ndila datene nnafuna liye vira. Liye unoza amange sidadi yaga ya Jeruzalemu. Liye unoza aamasule atwaga anafwanyeya muuzarini. Liye kanamasula mokosa kobiri owu yengo imohiwa. Unawonga gu miyo Yehova wa Makuru Matene.>>
14Yehova unawonga ira: <<Jorayela ja Ijipitu na joguliha ja Etiyopiya jinoza jikale jenyu. Atu anakala Seba, atu olapa anoza wa nyo ira kakale azari enyu eto anerege uharani. Anoza kagali omangiwene na makurenti eto anoza kaukokorelegeni. Anoza kauvepegeni keraga: <Nimuhare Mulugu wenno uli na nyo, mwasiwa kaliwo mmohiwa. Hiya liye kaliwo Mulugu mmohiwa.> >>
15Na ibaribari nyo Mulugu munavikoya nyokave. Muli Mulugu wa Izarayeli eto muli Nvulusi. 16Atene anasakanya vikwamutu josema anoza kanyaswihiwe eto kakale tchulriya. Anoza kagomele gwagwaru. 17Mbwenye aIzarayeli anoza kavulumutchiwe na Yehova. Vulumuwa wewa unokala kala no kala. Kiza kanyaswihiwa nne kiza kakala tchulriya kala no kala. 18Unawonga gu Yehova upandutchile zulu, liye gu Mulugu wenno uombile eto usakanyile ilambo ya vati, liye igaratiha pama. Liye kapandutchile ira mwahakaleve yengo. Apandutchile ira atu kakalegemo. Liye unawonga ira: <<Miyo dili Yehova, kaliwo mmohiwa.>>
19Yehova unawonga ira: <<Miyo kadiwongile yengo yokoyeya ilambo imohiwene ili isi. Eto kadiwongile na akuda Jako ira: <Mudivende vasayi vene.> Mbwenye miyo Yehova nnawonga yengo ya ibaribari. Eto nnawonga jili jowongowa jene.
Yehova gu Mulugu wa atu atene
20Nyo muhanle okumela malogo ohiyana-hiyana, mugumane, muze, mukwivele vakwikwive vamohi. Atu anne anatemba jolandaniha josemiwa jisemile atu ja imiri, aliwa alobelaga amilugu ohowanda vulumutcha, aliwa kinna zelru. 21Kawongani nyo, muwonge mulandu wenyu eto muwelruzane mutu mmohi na nfwaye. Bani aromile onihiwa jeji tempu ya wanle? Bani awongile yenno wanle? Kahi miyo vano Yehova? Eto kaliwo mulugu mmohiwa ahali miyo, Mulugu wapama eto Mulugu Nvulusi. Kaliwo ahali miyo bahi.
22<<Nyo atene munafwanyeya magomelo wa ilambo ya vati murungunuwele wa miyo ira muvulumuwe. Tchoira miyo dili Mulugu, kalivo mmohiwa. 23Dihilumbela na nzina naga, vamilomoni vaga vihikuma mazu a ibaribari. Anno kiza katchindjeya. Nibodo natene nnoza nidikokorele eto nlumi nili natene nnoza nilumbelele na nzina naga.
24<<Atu anerege wonga zela miyo ira: <Upama na kopolo jinafwanyeya muwari mwa Yehova bahi.> Mbwenye atene anno kamutakaleliwilena, anoza kaze wa liye, kakayena manyazo. 25Mbwenye muwari mwa Yehova, ahima atene a Izarayeli anoza kakalihiwe pama eto kakayena hagalala.>>
လက္ရွိေရြးခ်ယ္ထားမွု
Izaiya 45: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral