Izaiya 44
44
Yehova eka gu Mulugu
1Yehova unawonga ira: <<Kavwa we Jako, namalaba waga, kavwa we Izarayeli wenno dimusakunlre miyo. 2Unawonga gu miyo Yehova uusakannye, uuwombile wagali mmbani mwa mmawo eto unaukamiheda. Kuove weyo Jako namalaba waga wenno unamuziveliwa miyo eto duusakunlre miyo. 3Nnoza dikutulele mahindje ilambo yenno inna ntona, nnoza diwendihe mahindje va teya youmma. Nnoavaha ahimawo Munemba waga. Nnoavaha ahima anaabala we mareliho aga. 4Aliwa anoulukula pama muwari mwa malatchi nnga mitengo dimenle tcherela ya muhindje owenda. 5Mutu mmohi unoza awongege ira: <Miyo dili wa Yehova.> Mmohiwa unoza amuitanege na nzina na Mulugu wa Jako. Mmohiwa unoza alrembe vandandani vaye ira: <Miyo dili wa Yehova>, liye viitanaga ira: <Miyo dili muIzarayeli.> >>
6Yehova, Mwene wa Izarayeli eto Namawombola waye, Yehova wa Makuru Matene unawonga ira: <<Miyo dili oroma eto dili ogomiheda. Hiya miyo kaliwo mulugu mmohiwa. 7Bani unalingana na miyo vano? Aimele, awonge, adiwandele jengo jaireyile wanle vakungile miyo atwaga wanle. Eto awonge jejo jinafuna za ireya.#44:7 awonge jejo jinafuna za ireya: Agali atu ohara vikwamutu josema kinawanda wonga jinafuna ireya sogolro, Mulugu mbwenye unowongetcha ja sogolro eto jinawonga liye jinoireya. Mulugu gwawongile zela za wa mahindje tempu ya Nowe (Jenesesi 6:13-14) eto zela baliwa wa Izaki mwana Abarahamu (Jenesesi 17:19-21) eto zela dowa wa aIzarayeli Ijipitu (Jenesesi 15:13-14) eto ohowonga zela kuma wewa ilambo ya Ijipitu na jengo jimohi pwi. 8Kamurendjeye eto kamuove, kahi miyo diromile wanle uwandelani ja sogolro? Nyo muli amboni aga. Kodi ukalawo mulugu mmohiwa hiya miyo vano? Nari. Kaniliwo nibwe nimohi niwa. Dihiziwa ira kaniliwo nibwe nimohi ahali miyo Yehova.>>
Mazu a Yehova oapeta aliba sakanya vikwamutu josema
9Atene anne anasakanya jolandaniha josemiwa, atene anno kinna mabasa. Eto amilugu anno anaariheda atu kinna mpindu. Ale anahidedela umboni amilugu anno ba atu ohoona, ba atu ohoiziwa yengo. Anagomela nyaswihiwa bahi. 10Kodi muwari mosakanya isi mulugu, muwari monyungulrutcha momba ira jisakanyiwe jilandaniho muli mpindu nni? 11Kaing'anani, atene anailobela ikwamutu yosema anagomela nyaswihiwa. Anasakanya vikwamutu josema ba atu bahi. Atene anno kagumana, kaimela vamohi, anagomela rendjeya eto anonyaswihiwa vamohi.
12Maliba hana unotukula momba, unohela veko. Na muwono waye wa kopolo, unoroma bubuda na martelu ira ikale yengo. Akana ndala, liye unowaheya. Ahang'we mahindje, unokala ogomene. 13Namasema unopima yengo inafuna liye sakanya. Amala unolremba vogomela na yolrembana yaye. Amala unomala sema na josemana jinna liye. Unoisakanya yengo ira ikale nnga mutu. Unosakanya mutu oriya ira ahiye mmba. 14Unagwiha mitengo da seduru. Owu hehi unodowa muguguruni, liye sakulra mutengo wa pinyu na mutengo wa karvaliyo, liye umbuwela ira mutengo wenno aulukula, nnafuna disakanyena ikwamutu yosema. Owu hehi unazala mutengo mmohi eto unohiya ira aulukule pama na muzongwe. 15Agaulukunle, muwari mwa mutengo ule munokuma kuni, liye tukula vikwakwari, otana jaye. Eto muwari mwa mutengo mmohive munokuma kuni dowotchana pawu. Eto mutengo mmohive unosakanyana mulugu waye, liye roma mulobelaga, unosakanya nlandaniho nosemiwa, liye kokorelaga. 16Pandi imohi ya mutengo unotumbanyana munlo, unowotchana nyamaye, liye dja fiyeda rumbala. Unoota vamunloni evo ira: <<Peno mbwenye. Munlo ula udikola.>> 17Eto mutengo mmohive, unosakanyana mulugu waye agali nlandaniho nosemiwa. Unoioramela, liye itamalelaga eto ilobelaga eraga: <<Udivulumutche mwasiwa weyo uli mulugu waga.>>
18Atu anairana eji kinaiziwa yengo eto kinaonelramo yengo mwasiwa meso ewa kohomala fungiwa ira kahawande ona eto mirima diwa kahawande iziwa yengo. 19Kalivo unawanda umbuwela pama eto kalivo unakana zelru nne unawanda onelramo ira: <<Mutengo mmohi, pandi imohi ditumeyile veko. Dihiwotchavo pawu na makalriwa. Eto dihiwotcha nyama, miyo dja. Eto mutengo mmohive, pandi imohi dihisakanya yengo yotakaletchetcha. Nnga inawandeya avi dilobele imiri?>> 20Maliba ilobela ikwamutu yosema gu mutu odja ndora. Joumbuwela jaye jihimala mudimeliha ira ahawande vulumutcha ingumi yaye. Eto liye kanawanda umbuwela ira: <<Yengo ili mmandani mwaga ila kinawanda dikamiheda. Tchi yengo yonama.>>
Yehova Nvulusi wa aIzarayeli
21Yehova unawonga ira: <<Uumbuwele eji Jako mwasiwa we Izarayeli uli namalaba waga. Miyo guuwombile eto weyo uli namalaba waga. Kadiza dudiwala weyo Izarayeli. 22Dihimala kumihawo jotega jawo nnga murambo agamuwaga. Eto jotega jawo dihimala kumihawo nnga ifunga yabalaleyaga. Uwele uze wa miyo mwasiwa miyo duhuwombola. 23Imbani nyo jopandutchiwa jatene ja zulu-zulu. Mwasiwa Yehova guirilena. Kuwani nyo mamburo odiha a ilambo ya vati. Romani imba nyumbo nyo mwango na nyo guguru na mitengo datene dilimo mwasiwa Yehova uhumuwombola Jako eto uhumuoniha Izarayeli undimuwa waye.>>
24Yehova Namawombola wawo wenno uuwombile wagali mbani mwa mmawo unawonga ira: <<Miyo dili Yehova wenno upandutchile jatene. Ditandaga zulu, dali meka. Eto digudubulraga ilambo ya vati, dali mekave. 25Miyo nnosakanya ira jionihedo ja anamafiyiheda onama jahaireye. Miyo eto nnoasandutcha aliba wombeza makanga ira kakale azimora. Miyo eto nnofutukuliha jowonga ja aliba zelru, daaonihaga ira zelru diwa kadinna mabasa.
26<<Miyo nnorumelela jowonga ja namalaba waga eto nnokwakwaneliheda jowonga ja sogolro ja aliba milanyo aga. Gu miyene eto unawonga zela Jeruzalemu ira: <Atwaga kaze kakalemo akoka.> Eto gu miyene unawonga zela sidadi da Juda ira: <Sidadi da Juda dimangiwe akoka.> Nnoza eto divenyihede madebe ewa. 27Gu miyene eto unawonga na bara ilukulu ira: <We bara kaumma. Na mihindje dawo dene datene nnomala ummiha.> 28Gu miyo eto unawonga na Siru ira: <Weyo uli namakumbuza waga. Weyo eto unoza uirena jatene jinaumbuwela miyo. Weyo eto gunafuna kumiha nlamulo ira Jeruzalemu amangiwe akoka eto aliserisi wa Nyumba ya Yehova amangiwe.> >>#44:28 Jeruzalemu amangiwe akoka eto aliserisi wa Nyumba ya Yehova amangiwe: Mulugu awongaga mazwala muwari mwa Izaiya, Jeruzalemu ali ahanabwanyuliwe. Mbwenye nnga mwawongele Mulugu, Jeruzalemu ohobwanyuliwa eto ohomangiwa akoka. (2 Amwene 25:8-10; Nemiya 6:15)
လက္ရွိေရြးခ်ယ္ထားမွု
Izaiya 44: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral