Izaiya 43
43
Yehova gu Nvulusi wa aIzarayeli
1Unawonga gu Yehova wenno uupandutchile we Jako, wenno uuwombile we Izarayeli. Unawonga ira: <<Kuove mwasiwa duhuwombola. Miyo duitanne na nzina nawo eto uli waga. 2Walambuwaga muwari mwa mahindje, miyo nnokala na weyo. Walambuwaga mihindje, mihindje dile kannaubwabwiha. Waviraga vamunloni, kunaja eto nne malumi a munlo kinautumeya. 3Mwasiwa miyo dili Yehova Mulugu wawo. Dili Mulugu Otchena wa Izarayeli eto dili Nvulusi wawo.
<<Dafunaga uwombola weyo, nnoavelela aIjipitu. Nnaavaha akuda Etiyopiya na akuda Seba vamalroni vawo. 4Voira weyo uli ofuneya valukulu vamentoni vaga eto uli waga wa vamirimani eto nnouziveliwa, nnoavelela atu malro mwa weyo. Nnoavelela malogo a atu dafunaga wombola ingumi yawo.
5<<Kuove. Miyo dili na weyo. Miyo nnoawelihawo ahimawo uli atu makumelo wa nzuwa. Miyo nnoagumaniha ahimawo uli atu mavirelo wa nzuwa. 6Nnoza daawandele atu kali pandi ya norti ira: <Mudivahe ahimaga atene.> Eto nnoza daawandele atu kali pandi ya suli ira: <Kamwaahiyihe atwaga za.> Anapongwe aga kaze kumela olapela uli atu. Anavihiyana aga kaze kumela magomelo wa ilambo ya vati uli atu. 7Kaze atene anaitaniwa na nzina naga, anno daapandutchile miyo ira undimuwa waga uoneye, anno daawombonle miyo eto daasakannye miyo.>>
8Mwaakumihemo atu ohoona kagannave meso nari ohovwa kagannave mabaru. 9Malogo matene a atu kagumane vamohi. Atu a unde kaze, kakale vamohi. Bani mwa aliwa uwandile oneyiha yengo ya sogolro? Bani awongile jengo jaireyile wanle jahanaireye? Aliwa kinna amboni ewa ira karumelelena. Eto kinawanda wonga ira: <<He, tcha ibaribari.>> 10Yehova unawonga ira: <<Nyo muli amboni aga.#43:9-10 Bani awongile jengo jaireyile wanle jahanaireye? Va Mulugu unawonga ira amilugu a atu a unde tchawandile wonga ja sogolro nnga jinera liye. (Izaiya 42:9) Fwanyeya ira atu a unde anoimwanana mbwenye aIzarayeli kohomala ona makalelo matene Mulugu awandile liye irana ja sogolro jawongile liye. Nona Yehova awongaga: Nyo muli amboni aga. Eto nyo muli namalaba waga umusakunlre miyo ira nyo muiziwe eto mudiroromele miyo eto muonelremo ira miyo dili Yehova. Kahi ira ohokalawo mulugu aliwo miyo dahanakalewo, nari. Eto sogolro uwa kuli mulugu mmohi unafuna za. 11Miyo gu miyene dili Yehova. Hiya miyo kuli nvulusi mmohiwa. 12Miyo guwongile ja sogolro eto miyo guvulusileni eto guvweyihileni. Ora yenno kavali mulugu mmohiwene awanda ukamihedani. Nyo muli amboni aga. Unawonga gu Yehova. Miyo dili Mulugu. 13Roma mukalakala wa mundulri, miyo dili. Datonga na ndanda naga, kalivo unawanda muvunela nfwaye. Mabasa analaba miyo kalivo unawanda dihiyiha.>>
Yehova unoza aagwihe aBabiloniya
14Yehova Namawombola wenyu, Mulugu Otchena wa Izarayeli unawonga ira: <<Nnoaruma anyakondo ira kadowe kawane na akuda Babiloniya ira duuvulumutcheni. Miyo nnoatamangiha aKalidewu ira katawena mwadeya dedo dahagalalana atu.#43:14 Babiloniya ti nzina na ilambo. Eto aKalidewu ti nzina na atu kakala muwari mwa ilambo ya Babiloniya. Ku wonga aBabiloniya na aKalidewu ba amohive. 15Miyo dili Yehova, Mulugu Otchena wenyu, Namapandutcha wa Izarayeli, Mwene wenyu.>> 16Unawonga gu Yehova wenno unawanda sakanya ndila muwari mwa bara, unawanda helavo vovira vari va mahindje owopiha, 17wenno eto unawanda ziha aterelado na kavalo na nikuru na anyakondo a kopolo eto unawanda agonatiha ira kahawelele venya, so katimihiwe nnga panti yamorela mmahindjeni.
18Yehova unawonga ira: <<Kamuumbuwele jivirile eto kamutulele ja wanle. 19Kaing'anani, miyo nnoirana yengo ixa eto iroma oneya. Kodi nyo kamuonne? Miyo nnohula rampa mukokolani eto nnohula mihindje muisalesaleni. 20Vinyama da mukokolani nnerege ditamalela. Anambwa a mukokolani na pilru da mukokolani nnerege ditamalela. Mwasiwa miyo nnavaha mahindje a mukokolani eto nnosakanya ira mihindje diwendege muisalesaleni ira atwaga osakulriwa kang'wege. 21Anno ba atu daawombile miyo ira kakale aga eto ira kakale atu ovweyiha joditamalela.
Takaleliwa wa Yehova zela aIzarayeli
22<<Masiki eno nyo akuda Jako kamudiitanne. Nyo akuda Izarayeli muhudigomana. 23Kamuzilena wa miyo mabila enyu ira kakale mikuto dotumeya. Kamuditamalenle na mikuto dinyu. Jovelela javepa miyo ira muvelele kajali jounyemelihani. Jonukela javepa miyo ira muditumeyele kajali jouwaheyihani. 24Kamudigulenle mihale donukela na kobiri. Eto kamudirumbalihile na makura a mikuto dinyu. So nyo muire dinyemeliha na jotega jenyu. Eto nyo muire diwaheyiha na joviringaniha jenyu.
25<<Miyo gu miyene nnatimiha joviringaniha jenyu ira undimuwa waga uoneye. Miyo kannawelela umbuwela jotega jenyu. 26Mudiwumbutche miyo vano, ndoweni niwongeleni vamohi, muwongemo milandu dinyu ira nyo muvahiwe razawu. 27Babinyu oroma ohotega. Ale kakala vari va miyo na nyo kohokonda tongiwa na miyo. 28Na mwasa wenno nnoza daatakalihe andimuwa anakala Nyumba ya Yehova. Nnoza dimuvelele Jako ira atolotchiwe eto Izarayeli ira alramwisiwe.>>
လက္ရွိေရြးခ်ယ္ထားမွု
Izaiya 43: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral