Izaiya 42
42
Namalaba wa Yehova
1Yehova unawonga ira: <<Kaing'anani, ula gu namalabaga, wenno unamuhideda miyo, wenno damusakunlre miyo, wenno unadihagalaliha kalawo waga. Dihela Munemba waga muwari mwa liye. Liye unosakanya ira atu a malogo matene kakayena matongelo a ibaribari. 2Liye nne kanakana madugudugu, nne kaza akuwa movweya, nne kanavivweyiha murampani. 3Liye kaza anyenya murere okotoliwa na wanle, nne kaza atimiha munlo uhanle vang'ono ira atime.#42:3 kaza anyenya murere okotoliwa na wanle, nne kaza atimiha munlo uhanle vang'ono ira atime: Ku wonga Yesu makalelo afuna liye za kana kaali makalelo oanonga atu ovuta mbwenye liye afuna aavenyihe. Liye unofiyeda kunga tonga mororomeleya eto mwa ibaribari. 4Kaza akukumuwa nne kaza akala lohulo ante agarateyihe matongelo a ibaribari mwilamboni ya vati. Vilambo dowandamelana mbara anodediha malamulo aye.>>
5Mulugu gu Yehova wenno upandutchile jatene jili zulu, liye tandaga zulu. Liye eto ohotanda ilambo ya vati na jatene jinafwanyeya emo. Liye ohavaha yovuma atu anakala mwilamboni muno. Liye ohovaha ingumi jatene jinawenda emo. Liye unawonga na namalabaye ira: 6<<Miyo dili Yehova. Miyo duitanani muwari mwa upama waga. Miyo nnoza duhidede ndanda eto dukoye. Nnoza disakanye ira ukunge yopangana yaga na atu,#42:6 Nnoza disakanye ira ukunge yopangana yaga na atu: Mulugu upanganne nipangano naye nixa na atu muwari mwa sangiri na Yesu. Nione Lukaji 22:20. ukale moneya oamoneyela malogo matene. 7Weyo unoza uhule meso a aliba haona. Unoza waatapule atu anafwanyeya omangiwene mukadeya. Unoza waakumihemo mukadeya atu anagarati muisini. 8Miyo dili Yehova. Nzina naga ti neni. Miyo undimuwa waga kadiza dinvaha mutu mmohiwa. Tamaleliwa ofwanela ira ditamaleliwe, kadiza dirumela ira jolandaniha ja amilugu jagali josemiwa jiwatchele tamaleliwa wewo. 9Kaing'anani, jengo jawongile miyo jahanaireye jihimala ireya mwa ibaribari. Miyo nnouwandelani jengo jixa. Eto jengo jili jahanaireye, miyo nnovayela uiziwihani.>>
Nyumbo ixa yomutamalela Yehova
10Mmuimbele Yehova nyumbo ixa. Mmutamalele nyenne munafwanyeya magomelo wa ilambo ya vati. Nyo munafwanyeya mbara muwendaga na mwadeya nari jopandutchiwa jatene jinakala mbara mmutamalele. Nyo vilambo nnafwanyeya tcherela ya mbara vamohi na atu atene anakalamo, imbani nyumbo domutamalela. 11Kokola na sidadi datene da wewule dimutamalele Mulugu. Tatamo da akuda Kedari dimutamalele. Atu anakala sidadi ya Sela kamuimbele mohagalala. Kakuwe kagaimenle vazulu va mwango. 12Aliwa kamutitimihe Yehova eto kalaleye jomutetela vilambo dowandamelana mbara. 13Yehova unadowa kondoni nnga mutu wa kopolo. Unavenyiha uwali waye nnga munyakondo. Unokuwa no kuwa ulukulu. Liye unavioniheda kopolo daye awanaga na amwidanaye.
14Mulugu unawonga ira: <<Miyo dali omiyalene tempu ilukulu. Dalive pee, miyo vihiyiha meka. Mbwenye kuwa waga unokala wa kopolo nnga kuwa wa muhiyana tempu yaye yobala yafiyaga.#42:14 Mulugu awongaga ira Dalive pee… Mbwenye kuwa waga unokala wa kopolo nnga kuwa wa muhiyana tempu yaye yobala yafiyaga. Ku wonga Mulugu ohofiyeda mwezo olaba mwa ibaribari. Kalaga nnga mutu asimbwa takaleliwa na mutu mmohiwa, unofiyeda hawandaga vuma pama na mwasa wa rayiva. Ku wonga Mulugu na mwasa wa rayiva nanna liye zela atwaye, ohofiyeda mwezo wenno. Nnokuwa nnga mutu avumaga mogwadagwada na mabefu. 15Nnoza dinonge mwango na mikuma. Nnoza diummihe jomela jatene jili emo. Nnoza disandutche mihindje ira dikale suwa. Eto nnoza diummihe matiya. 16Nnoza daasogolrelre atu ohoona na ndila yahaiziwile atu. Nnoza daavelele ndila dali atu kahanarome vira. Nnoza disandutche isi ili vasogolro vewa ira ikale moneya. Eto nnoza divuhelele mamburo otimbeya timbeya. Eji ti jengo jinairetchana miyo. Eto kadiza daahiya mundila.
17<<Atene ananyindela nlandaniho nosemiwa, atene anawonga na jilandaniho jonyungulrutchiwa ira: <Ba amilugu ehu>, anoza kayevihiwe eto kanyaswihiwe.>>
AIzarayeli tchawandile ona nne vwa
18Vwani nyo atu ohovwa nyo! Kaing'anani, nyo atu ohoona nyo ira muwande ona! 19Kodi wenno ahanawanda ona bani ahali namalaba waga? Nnga bani ahanawanda vwa nnga maliba milanyo waga wenno umurumile miyo? Kodi wenno ahanawanda ona bani nnga wenno umuhambihile miyo? Ahanawanda ona nnga namalaba wa Yehova bani? 20Liye unoona jengo jidjindji mbwenye kanawanda tapulela joona jiwa. Mabaru aye kali ohuleyene eto kanavwa.#42:19-20 Ahanawanda ona nnga namalaba wa Yehova bani? Fwanyeya ira muwari mwa kapitulu mmohive, ukala namalaba mmohi wa Mulugu unafuna aahule meso aliba haona eto aatapule atu anafwanyeya omangiwene mukadeya. (Izaiya 42:7; Lukaji 4:17-21, 7:22) Mutu unawongiwa eva gu Yesu. Eto ukala namalaba wa Mulugu ahanawanda ona eto ahanawanda vwa. Wenno gu Izarayeli. (Izaiya 42:24, 44:21; 1 Amwene 8:41-43) 21Na mwasa wa upama wa Yehova, Yehova ofuna ira malamulo aye kakale otukuleleya eto orihediwa. 22Mbwenye peno atu anna kohowakiwa eto kohobeliwa jengo jiwa. Atene kohomorihediwa mmulihani eto kohokoyiwa mukadeya. Kohotukuliwa kalaga nnga jengo jotukuliwa kondoni eto kalivo aavunenle. Kohindiwa kondoni eto kalivo awongile ira: <<Mwaawelihe.>> 23Kodi ukalawo mutu mmohi mwa nyo unafuna za vuruwana jejo? Bani unafuna za reya nibaru amala aabalre roma peno dowa sogolro? 24Bani umutukunle Jako, amuvelelaga mmandani mwa aliba waka? Bani waavelenle aIzarayeli mmandani mwa amadjuba? Airilena eji ali Yehova wenno namutegenle hiyo, nikondaga wenda na ndila daye eto nahavwelelaga malamulo aye. 25Na mwasa wenno liye ohonioniha uwali waye ulukulu eto ohonioniha goyi kondoni. Uwali waye wali nnga munlo oarungunuwa, mbwenye aIzarayeli tchawandile onelramo. Munlo wenno ohajiha mbwenye kilivo yafundjilevo atu.
လက္ရွိေရြးခ်ယ္ထားမွု
Izaiya 42: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral